~~~~~~~~⊰❂ unicode ❂⊱~~~~~~~~

“ရန်ကုန်ကလွဲရင် တစ်နိုင်ငံလုံးမှာ လုပ်ဆောင်ပေးမှာပါ။ လတ်တလောမှာတော့ အကောက်ခွန် ဦးစီးဌာနက ကောက်ခံမယ့် ဒဏ်ကြေးနှုန်းထားတွေတော့ ရောက်မလာသေးပါဘူး။ အသေးစိတ် ညွှန်ကြားချက်တွေ ထွက်တာနဲ့ အသိပေးသွားမှာဖြစ်ပါတယ်”ဟု တာချီလိတ်ခရိုင် ကုန်းလမ်းပို့ဆောင်ရေး ညွှန်ကြားမှုဦးစီးဌာနမှ ခရိုင်ဦးစီးမှူး ဦးစိုင်းလုံကျောက်က တာချီလိတ်သတင်းအေဂျင်စီသို့ ပြောသည်။

မှတ်ပုံတင်မဲ့ သုံးဘီးမော်တော်ဆိုင်ကယ်များကို One Stop Service စီမံချက်ဖြင့် မှတ်ပုံတင်ပေးခြင်းကို တစ်နိုင်ငံလုံးရှိ ကုန်းလမ်းပို့ဆောင်ရေးညွှန်ကြားမှုဦးစီးဌာနရုံး (၄၉)ရုံးတွင် ဆောင်ရွက်ပေးမည့်အပြင် အချက်အချာကျသောမြို့ပေါင်း (၃၉)မြို့တွင် စနေနေ့များ၌ Mobile Team ဖြင့် လှည့်လည် ဆောင်ရွက်ပေးမည် ဖြစ်ကြောင်း သိရသည်။

မှတ်ပုံတင်ဆောင်ရွက်ပေးမည့် စီမံချက်တွင် ၂၀၀၈ ခုနှစ်နှင့်အထက် မော်ဒယ်များကိုသာ ဆောင်ရွက် ပေးမည်ဖြစ်ပြီး အိုမင်းဟောင်းနွမ်းများ၊ လူစီးသုံးဘီးမော်တော်ယာဉ်များ၊ ဆိုင်ကယ်ဘေးတွဲများ၊ တောတွင်းနှင့် ကမ်းစပ်သုံးသည့် လေးဘီးပါ မော်တော်ဆိုင်ကယ်များ၊ မှတ်ပုံတင်ထားပြီး သက်တမ်း (၅)နှစ်ကျော်ပြတ်နေသော သုံးဘီးဆိုင်ကယ်များကို မှတ်ပုံတင်ဆောင်ရွက်ပေးမည်မဟုတ်ကြောင်း သိရသည်။

ယင်းကဲ့သို့ One Stop Service စီမံချက်ဖြင့် မှတ်ပုံတင်ပေးခြင်းကို ၂၀၁၀ ခုနှစ်၊ ၂၀၁၂ ခုနှစ်နှင့် ၂၀၁၄ ခုနှစ်များတွင် ဆောင်ရွက်ပေးခဲ့သည်။

Tachileik News Agency