~~~~~~~~⊰❂ unicode ❂⊱~~~~~~~~

“အဓိက ကတော့ လူမျိုးမရွေး၊ ဘာသာမရွေး၊ အယုတ်အလတ် အမြတ်မရွေး ငွေကြေး မတတ်နိုင်သူ အပါအဝင်ပေါ့ မီးသင်္ဂြိုလ်နိုင်မယ်။ အရိုးပြာကို ဂူသွင်းသင်္ဂြိုလ်နိုင်မယ်။ တစ်ချို့လည်း ရေမျောချင်ရင်လည်း သဘောပေါ့။ အဓိက ကတော့ မြမြေုပ်သင်္ဂြိုလ်တာ ခွင့်မပြုဘူးပေါ့။ သုဿန်အဟောင်းနေရာမှာ မလုပ်တာက လက်ရှိ အုတ်ဂူအဟောင်းတွေနဲ့ ဆိုတော့ ဖျက်ရပြုရဆိုတော့ အချိန်လည်းကြာမယ်ပေါ့။ ဒါကြောင့် ဆရာတော်ဆီမှာ မြေနေရာအလှူခံတော့ ဆရာတော်ကလည်း ဖြစ်စေချင်တယ်လေ။ ဒီနယ်စပ် တာချီလိတ်မြို့မှာ မီးသင်္ဂြိုလ်စက်က မရှိတော့ ဒါလေး လိုအပ်နေတယ်ဆိုပြီး ဆရာတော်က မြေနေရာလှူတယ်။ ဦးအားဖာ(တပင်ရွှေထီး)က ငွေကြေးမတည်ပြီး စလုပ်နေတာပါ”ဟု တာချီလိတ်မြို့ မီးသင်္ဂြိုလ်စက် တည်ဆောက်ရေးအတွက် လိုက်ပါ ဆောင်ရွက်နေသည့် တာချီလိတ်ခရိုင်ရဲတပ်ဖွဲ့ ခရိုင်လုံခြုံရေးအကူတပ်ခွဲမှူး ဒုရဲမှူးစံသိန်းက တာချီလိတ်သတင်းအေဂျင်စီသို့ ပြောသည်။

ဆရာတော် လှူဒါန်းသည့် မြေနေရာတွင် မီးသင်္ဂြိုလ်စက်နှင့် အရိုးအိုးမြုပ်ရန် နေရာများကို စနစ်တကျ အကောင်အထည်ဖော် သွားမည်ဖြစ်ပြီး တောင်ပေါ်အသွားလမ်းကို ကတ္တရာ သို့မဟုတ် ကွန်ကရစ်လမ်း ခင်းသွားရန် စီစဉ်ထားကြောင်း သိရသည်။

“ဒါကိုစပြီး အကောင်အထည်ဖော်မယ်ဆိုတာက အခု မတည်အလှူရှင် တပင်ရွှေထီး ဦးအားဖာပေါ့။ ဒါနဲ့ ဆရာတော်ဆီမှာ မြေနေရာ အလှူခံတော့ ဆရာတော်က မီးသင်္ဂြိုလ်စက်ဆောက်ဖို့ တောင်ကုန်းနေရာ တစ်ခုနဲ့ တစ်ဆက် တစ်စပ်တည်းရှိတဲ့ တောင်ကုန်းနေရာ(၂)ခုကိုပါ လှူပါတယ်။ အဲဒီတောင်ကုန်းတွေ ဘက်ကို ကတ္တရာလမ်း ဒါမှမဟုတ် ကွန်ကရစ်လမ်းခင်းမယ်။ တောင်ကုန်း(၂)ခုနေရာမှာ အရိုးပြာတွေ မြုပ်နိုင်ဖို့ (၂)ပေပတ်လည် ဂူနေရာလေးတွေပေးပြီး ကြားမှာ လျှောက်လမ်းတွေ၊ ပန်းခြံလို ပန်းပင် စိုက်ပျိုးထားတာတွေ သန့်သန့် ရှင်းရှင်းလုပ်မယ်”ဟု တာချီလိတ်မြို့ မီးသင်္ဂြိုလ်စက် တည်ဆောက်ရေးအတွက် လိုက်ပါ ဆောင်ရွက်နေသည့် တာချီလိတ်ခရိုင်ရဲတပ်ဖွဲ့ ခရိုင်လုံခြုံရေးအကူတပ်ခွဲမှူး ဒုရဲမှူးစံသိန်းက ဆိုသည်။

ဆရာတော်က ၂၀၁၈ ခုနှစ် အောက်တိုဘာလ (၇)ရက်နေ့တွင် လက်မှတ်ရေးထိုး၍ မြေလှူဒါန်း လိုက်ခြင်းဖြစ်ပြီး သက်ဆိုင်ရာမှ ခွင့်ပြုချက်ရရှိသည်နှင့် လမ်းများ၊ ပန်းခြံများ၊ တရားနာဓမ္မာရုံ၊ မီးသဂြိုလ်စက်၊ သန့်စင်ခန်းများ တည်ဆောက်သွားမည်ဖြစ်ကာ တာချီလိတ်မြို့မှ လုပ်ငန်းရှင်များက ငွေအား၊ စက်ယန္တရားများ ကူညီ လုပ်ဆောင်ကြမည်ဖြစ်ကြောင်း သိရသည်။

အဆိုပါ မီးသဂြိုလ်စက်နှင့် အရိုးအိုးမြုပ်နှံမည့် နေရာများ တည်ဆောက်ရေး အတွက် မြို့ကိုယ်စားပြုဆောင်ရွက်ပေးမည့်သူများ ပါဝင်သည့် အဖွဲ့ဖြင့် လုပ်ဆောင်သွားမည်ဖြစ်ကြောင်း သိရသည်။

Tachileik News Agency
ဓာတ်ပုံ - မောင်ဖိုးစံ(ဒူးယား)