~~~~~~~~⊰❂ unicode ❂⊱~~~~~~~~

မကွေးမြို့တွင်ပြုလုပ်သည့် (၆) ကြိမ်မြောက် နိုင်ငံတကာလူငယ်များနေ့အခမ်းအနား ယခုနှစ်တွင် ပါဝင်သူပိုများလာ
***************
(၆)ကြိမ်မြောက် နိုင်ငံတကာလူငယ်များနေ့အခမ်းအနားကို သြဂုတ်လ(၁၂)ရက်နေ့ ညနေပိုင်းနှင့် ညပိုင်းတို့တွင် မကွေးတိုင်းဒေသကြီး၊ မကွေးမြို့ရှိ ဗိုလ်ချုပ်အောင်ဆန်းမြင်းစီးကြေးရုပ်ပန်းခြံ၌ ကျင်းပခဲ့ရာ ယခင်နှစ်များကထက် ပါဝင်သူပိုများလာကြောင်း သိရသည်။

"ဒီနှစ်က (၆)ကြိမ်မြောက်ကျင်းပတာဆိုပေမဲ့ အရင်နှစ်တွေက မြို့တော်ခန်းမမှာ ကိုယ့်လူတွေနဲ့ ကိုယ်ပဲ ကျင်းပခဲ့ရတာဖြစ်ပြီး ဒီနှစ်မှာတော့ ဒီနေ့ဟာ နိုင်ငံတကာလူငယ်များနေ့ ဆိုတာကို လူငယ်တွေ ပိုပြီးကျယ်ကျယ်ပြန့်ပြန့် သိရှိစေဖို့နဲ့ လူငယ်တွေကိုယ်တိုင် ဦးဆောင်နိုင်စေဖို့ အလွှာစုံက လူငယ်တွေပါ ဝင်လာအောင် ပြည်သူများအလွယ်တကူလာရောက်နိုင်တဲ့  ပန်းခြံမှာ ပြုလုပ်ခဲ့တာပါ။ ဒါကြောင့်လည်း အရင်နှစ်တွေကထက် ပိုကျယ်ပြန့်ပြီး ပိုပြီးစည်စည်ကားကား ရှိခဲ့ပါတယ်" ဟု ပွဲဖြစ်မြောက်ရေးတာဝန်ခံ ကိုသင့်ထက်ဝေက တာချီလိတ်သတင်းအေဂျင်စီသို့ ပြောသည်။

အဆိုပါအခမ်းအနားတွင် လူငယ်နှင့်အလုပ်အကိုင်အခွင့်အလမ်း၊ အမျိုးသမီးအပ်ချုပ်သင်တန်း၊ အလှပြင်သင်တန်း၊ ဆောက်လုပ်ရေးကဏ္ဍ၊ ဆိုင်ကယ်ပြင်သင်တန်း၊ အော်ဂဲနစ်သီးနှံပြခန်း၊ လူငယ်နှင့်မျိုးဆက်ပွားကျန်းမာရေးပြခန်း၊ လူငယ်နှင့်ဖက်ရှင်ပြခန်း၊ လူငယ်ရေးရာမူဝါဒပြခန်းများပါရှိပြီး တိုင်းရင်းသား ရိုးရာအစားအစာအရောင်းဆိုင်၊ တိုင်းရင်းသားရိုးရာ အကအလှများပါဝင်သည့် ဖျော်ဖြေရေးအစီအစဉ်များ ၊ လူငယ်ရေးရာ မူဝါဆိုင်ရာအသိပညာပေး လက်ကမ်းစာရွက်များ ဖြန့်ဝေခြင်း၊ လူငယ်များနေ့ဖြစ်ပေါ်လာပုံနှင့် လူငယ်ရေးရာအကြောင်းများကို ရှင်းလင်းဆွေးနွေးခြင်း အစီအစဉ်များ၊ လူငယ်ရေးရာ ပဟေဠိအမေးအဖြေအစီအစဉ်များပါရှိကြောင်း သိရသည်။

နိုင်ငံတစ်နိုင်ငံတွင် လူငယ်များ၏ အခန်းကဏ္ဍအရေးပါမှုများအား သက်ဆိုင်ရာအစိုးရအဖွဲ့နှင့် ပြည်သူများ သိရှိနားလည်ပြီး ပါဝင်ဖြည့်ဆည်းလာနိုင်စေရန်၊ လူငယ်မူဝါဒများအား ဆွေးနွေး၍ အကောင် အထည်ဖော်ဆောင်နိုင်ပြီး အနာဂတ်ခေါင်းဆောင်များ ဖြစ်လာမည့် လူငယ်များ၏စွမ်းဆောင်ရည်မြှင့်တင် ကာ ပိုမိုကောင်းမွန်သည့် နိုင်ငံတော်ကိုတည်ဆောက်သွားနိုင်စေရန်၊ လူငယ်များ ကျောင်းသားဘဝတွင် ဖြစ်စေ၊ လုပ်ငန်းခွင်များတွင်ဖြစ်စေ  လွတ်လပ်သော၊ လုံခြုံစိတ်ချရသော ရပ်ဝန်းတစ်ခု၌ ရောက်ရှိနေစေ ရန် ရည်ရွယ်၍ နိုင်ငံတကာလူငယ်များနေ့ အခမ်းအနားအား ကျင်းပရခြင်းဖြစ်ကြောင်း သိရသည်။

သတင်း၊ဓါတ်ပုံ #ဖီးနစ်