~~~~~~~~⊰❂ unicode ❂⊱~~~~~~~~

ကယားပြည်နယ်၏ ပထမဆုံးရုပ်ရှင်ရုံ ဒါရိုက်တာဝိုင်းက လွိုင်ကော်တွင် စတင်တည်ဆောက်နေ
************
ကယားပြည်နယ်၏ ပထမဆုံးရုပ်ရှင်ရုံအဖြစ် ဒါရိုက်တာဝိုင်း၏ကုမ္ပဏီက လွိုင်ကော်မြို့ရှိ လွိုင်ကော်တက္ကသိုလ်အရှေ့ဖက် ထေးငှါးလျားကန်ဘေးတွင် တည်ဆောက်မည့် Ours  ရုပ်ရှင်ရုံပန္နက်တင်ခြင်းအား ၂၀၁၈ ခုနှစ်၊ သြဂုတ်လ (၅) ရက်နေ့တွင် စတင်ပြုလုပ်နေပြီဖြစ်သည်။

Feel & Touch Co, Ltd က တည်ဆောက်မည့် အဆိုပါရုပ်ရှင်ရုံတွင် အသေး(၁)ရုံ၊ အကြီး(၁) ရုံပါဝင်မည်ဖြစ်ပြီး Snack Bar များလည်းထည့်သွင်းတည်ဆောက်မည်ဖြစ်ကြောင်း သိရကာ ပန္နက်တင်ခြင်း အခမ်းအနားသို့ ကယားပြည်နယ်ဝန်ကြီးချုပ်နှင့် ပြည်နယ်အစိုးရအဖွဲ့ ဝန်ကြီးများ၊ ပြည်နယ်လွှတ်တော် ဒုတိယဥက္ကဌတို့လည်း တက်ရောက်ခဲ့ကြသည်။

အဆိုပါ ရုပ်ရှင်ရုံတည်ဆောက်ရေးမှာ ၂၀၁၈ ခုနှစ်၊ မေလ(၂၆)ရက်နေ့က ကျင်းပခဲ့သည့် Kayah State Investment Forum ၌ ကယားပြည်နယ်တွင်း ရင်းနှီးမြုပ်နှံမှုလုပ်ဆောင်လိုကြောင်း ဆွေးနွေးခဲ့သည့် ကုမ္ပဏီ(၁၀)ခုတွင် ပါဝင်ခဲ့ခြင်းဖြစ်သည်။

အဆိုပါ ရင်းနှီးမြုပ်နှံမှုဖိတ်ခေါ်ပွဲတွင် ကယားပြည်နယ်အတွင်း ရုပ်ရှင်ရုံတည်ဆောက်လိုသူများအဖြစ် ဦးနေလင်းနှင့် ဒါရိုက်တာ ဝိုင်း(Feel & Touch Co., Ltd) နှင့် ရုပ်ရှင်သရုပ်ဆောင် မေသန်းနု ( ရွှေဆင့်ဆင့် ကုမ္ပဏီ)တို့က တင်ပြခဲ့ကြခြင်းဖြစ်သည်။

အဆိုပါဖိုရမ်တွင် ကယားပြည်နယ်တွင်း ရင်းနှီးမြုပ်နှံမှု လုပ်ကိုင်လိုသည့်လုပ်ငန်းများအဖြစ်
ရုပ်ရှင်ရုံလုပ်ငန်းဆောင်ရွက်ရန် ကုမ္ပဏီ(၂)ခု၊ မာဘယ်ကျောက် ထုတ်လုပ်ရေးလုပ်ငန်း ဆောင်ရွက်ရန် ကုမ္ပဏီ(၃)ခု၊ ပွန်ချောင်း Advendure Tourism အပန်းဖြေစခန်းတည်ဆောက်ရန် ကုမ္ပဏီ (၁)ခု၊ နှစ်ရှည်ပင်စိုက်ပျိုးရေး ကုမ္ပဏီ (၁)ခု၊ ဟိုတယ် လုပ်ငန်း ဆောင်ရွက်ရန် ကုမ္ပဏီ (၂)ခု၊ သတ္တုနှင့် စိုက်ပျိုးရေးလုပ်ငန်းဆောင်ရွက်ရန် ကုမ္ပဏီ(၁)ခု စုစုပေါင်း (၁၀)ခုတို့ ဆွေးနွေးခဲ့ကြခြင်းဖြစ်သည်။

သတင်း၊ဓါတ်ပုံ #ဆန်းဖြိုးထွန်း