~~~~~~~~⊰❂ unicode ❂⊱~~~~~~~~

ဖားကန့်တွင် ဇူလိုင်လအတွင်း ဒုတိယအကြိမ် မြေစာပုံပြိုကျ ကယ်ဆယ်ရေးအခက်တွေ့နေဆဲ
************
ကချင်ပြည်နယ် ဖားကန့်မြို့နယ်တွင် ဇူလိုင်လအတွင်း ဒုတိယအကြိမ် လုပ်ကွက်မြေစာပုံပြိုကျမှု ၂၀၁၈ ခုနှစ်၊ ဇူလိုင်လ(၂၄)ရက်နေ့ နံနက် (၅)နာရီဝန်းကျင်ကဖြစ်ပွားရာ လက်ရှိအချိန်ထိ ပျောက်ဆုံးသူများ ရှာဖွေကယ်ဆယ်ရေးအတွက် အခက်အခဲတွေ့နေရဆဲဖြစ်ကြောင်း သိရသည်။

ဖားကန့်မြို့နယ် ဆပ်မူကျေးရွာအုပ်စု၊ မက်မံကျေးရွာအပိုင်၊ အောက်မက်လင်ချောင်ကျေးရွာအနီးရှိ ဧရာရတနာကုမ္ပဏီ၏ သက်တမ်းကုန်လုပ်ကွက်မှ ကမ်းပါးနံရံပြိုကျသွားခြင်းဖြစ်ပြီး နေ့လယ်(၁)နာရီခွဲအချိန်ထိ ဖားကန့်မြို့နယ်အထွေထွေအုပ်ချုပ်ရေးမှူးနှင့် ဖားကန့်မြို့နယ် NLD ပါတီမှ ပြန်ကြားရေးတာဝန်ခံ ဒေါ်မိုးမိုးတို့ ရရှိထားသည် ပျောက်ဆုံးသူအမည်စာရင်းများအရ (၁၀)ဦးကို အတည်ပြု၍ ရထားကြောင်း သိရသည်။

ရေမဆေးကျောက်ရှာဖွေသူ (၄၀)ခန့်ပါသွားသည်ဟု အရပ်သတင်းများကဆိုသော်လည်း အတည်ပြုနိုင်ခြင်းမရှိသေးဘဲ လက်ရှိအချိန်ထိ အတည်ပြုနိုင်သူများမှာ ချန်းဗီတာ၊ အဝိဝမ်ဒီးဆားရ်၊ ဆာရ်ဝမ်ဖုန်ဆန်း၊ မလောင်ဘန်ဆားရ်၊ ဒခွမ်ဆင်ဗေးဆားရ်၊ ကျော်ဆန်း၊ နန်ဇရက်၊ ရမိုင်ဇုန်၊ မျိုးဝင်းထွန်းနှင့် ချင်လေ အွမ်းဆားရ်တို့ ပါသွားကြောင်း မျက်မြင်များ ပြောကြားချက်အရ သိရသည်။

လက်ရှိတွင် ကယ်ဆယ်ရေးလုပ်ဆောင်ရန် အခက်အခဲဖြစ်နေပြီး ပျောက်ဆုံး၊ သေဆုံးအရေအတွက်ကို အတည်မပြုနိုင်သေးကြောင်း သိရသည်။

၂၀၁၈ ခုနှစ် ဇူလိုင်လ (၁၄)ရက်နေ့ နေ့လယ် (၂)နာရီဝန်းကျင်ကလည်း ဖားကန့်မြို့နယ် လုံးခင်းကျေးရွာအုပ်စု၊ ဆန်ခါကျေးရွာအနီး မဟာအစပထမကျောက်စိမ်းတူးဖော်ရေးကုမ္မဏီ၏ ကျောက်စိမ်းလုပ်ကွက်တွင် ကမ်းပါးနံရံပြိုကျမှုကြောင့် လူအစုလိုက်အပြုံလိုက်သေဆုံးမှုဖြစ်ခဲ့သဖြင့် ကချင်ပြည်နယ်အစိုးရအဖွဲ့၊ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး ဦး Hလအောင်က ကျောက်စိမ်းတွင်းဒေသတွင် (၂)ရက်တာ ကွင်းဆင်းလေ့လာပြီး ပြန်သွားသည့် (၂၄)နာရီမပြည့်မီ မြေပြိုမှုထပ်မံဖြစ်ပွားခြင်းဖြစ်ကြောင်း သိရသည်။

သတင်း #ဇော်မိုးထက် (ဖားကန့်)
ဓါတ်ပုံ#မိုးမိုး