~~~~~~~~⊰❂ unicode ❂⊱~~~~~~~~

တာချီလိတ်တွင် လက်နက်ဖမ်းဆီးရမိမှုနှင့် ဆက်စပ်သည့် ဟိုမိန်းပြည်သူ့စစ်ဌာနေတစ်ဦးအား မိုင်းဖြတ်၌ လက်နက်နှင့်အတူ ဖမ်းဆီးရမိ
**********
ရှမ်းပြည်နယ်(အရှေ့ပိုင်း) တာချီလိတ်မြို့ ဟွေရဲပူးပေါင်းစစ်ဆေးရေးဂိတ်၌ ဖမ်းဆီးရရှိသည့် လက်နက်မှုနှင့် ဆက်စပ်သည့် ဟိုမိန်းပြည်သူ့စစ်ဌာနေ (SSS)တစ်ဦးအား မိုင်းဖြတ်မြို့နယ်အတွင်း လက်နက်နှင့်အတူ ဖမ်းဆီးရမိသဖြင့် မိုင်းဖြတ်မြို့မရဲစခန်းတွင် ၂၀၁၈ ခုနှစ်၊ ဇူလိုင်လ (၁၄)ရက်နေ့က အမှုဖွင့်စစ်ဆေးနေကြောင်း သိရသည်။

တာချီလိတ်မြို့ ဟွေရဲပူးပေါင်းစစ်ဆေးရေးဂိတ်တွင် ဇူလိုင်လ (၁၂)ရက်နေ့က လက်နက်၊ခဲယမ်းများ ဖမ်းဆီးရမိမှုနှင့် ဆက်စပ်ပြီး စစ်ဆေးရာ ဖမ်းဆီးရမိသည့် မော်တော်ယာဉ်မှာ ဟိုမိန်းပြည်သူ့စစ်ဌာနေ (SSS)မှ ကျိုင်းနောင့် (ခ) အုံးခိုင်(ခ) အိုက်ကျိုင်း၏ ကားဖြစ်ကြောင်း သိရသဖြင့် မိုင်းဖြတ်မြို့နယ်၊ မိုင်းဟဲကျေးရွာအုပ်စု၊ ဟိုခန့်ကျေးရွာရှိ ကျိုင်းနောင့်(ခ) အုံးခိုင်(ခ)အိုက်ကျိုင်း၏ နေအိမ်အား  ဇူလိုင်လ(၁၃)ရက်နေ့၌ ရဲတပ်ဖွဲ့က ဝင်ရောက်ရှာဖွေခဲ့ရာ ထူးခြားမှုမတွေ့ရကြောင်း သိရသည်။

ကျိုင်းနောင့်(ခ) အုံးခိုင်(ခ)အိုက်ကျိုင်းနှင့် ဇနီး နန်းလာတို့မှာ တာချီလိတ်သို့ ထွက်ခွာသွားကြောင်းသိရပြီး ယင်းနေ့ ညနေ(၄)နာရီ (၄၅)မိနစ်တွင် ရဲတပ်ဖွဲ့က နားဟိုင်းကျေးရွာအနီး၊ တာချီလိတ် - မိုင်းဆတ်ကားလမ်းတွင် ကျိုင်းနောင့်(ခ) အုံးခိုင်(ခ)အိုက်ကျိုင်းမောင်းနှင်လာသည့် မော်တော်ယာဉ်အား တွေ့ရသဖြင့် စစ်ဆေးရှာဖွေရာ သြစတေးလျနိုင်ငံထုတ် KPX GLOCK အမျိုးအစား ၉ မမ ပစ္စတိုသေနတ် နံပါတ် ၉၃၉ (၁)လက်နှင့် ကျည်(၃၀)တောင့်၊ ကျည်ကဒ်(၂)ခုတို့အား ရှာဖွေတွေ့ရှိရခြင်းဖြစ်ကြောင်း သိရသည်။

လက်နက်နှင့်ဖမ်းဆီးရမိသည့် ကျိုင်းနောင့်(ခ) အုံးခိုင်(ခ) အိုက်ကျိုင်းအား တာချီလိတ်မြို့မရဲစခန်းတွင် စစ်ဆေးပြီးနောက် ၎င်းအား မိုင်းဖြတ်မြို့မရဲစခန်းတွင်  (ပ) ၁၃ / ၂၀၁၈  ရှမ်းလက်နက်  ၁၂(က)ဖြင့် အမှုဖွင့်အရေးယူထားကြောင်း သိရသည်။

သတင်း #ငြိမ်းချမ်း(ပြည်)
ဓါတ်ပုံ #ရဲတပ်ဖွဲ့