~~~~~~~~⊰❂ unicode ❂⊱~~~~~~~~

ကျေးရွာမြေများ ဂရန်မြေအဖြစ်သတ်မှတ်ထုတ်ပေးရေး စီမံချက်မလုပ်နိုင်၍ တစ်ဦးချင်း လျှောက်ထား ရယူနိုင်
***********
ကျေးရွာများတွင် အိမ်ခြံမြေများကို ဂရန်မြေအဖြစ်သတ်မှတ်ထုတ်ပေးရေးစီမံချက်များ လုပ်ဆောင်ရန် နိုင်ငံတော်ဘဏ္ဍာငွေသုံးစွဲခွင့်ပြုနိုင်မှုအကန့်အသတ်ကြောင့် မလုပ်ဆောင်နိုင်သေးဘဲ တစ်ဦးချင်း လျှောက်ထားမှုများကိုသာ စိစစ်လုပ်ဆောင်ပေးနေကြောင်း သိရသည်။

ကျေးရွာများတွင် အဆိုပါစီမံချက်လုပ်ဆောင်ရန်မှာ မြေပိုင်ဆိုင်မှု အထောက်အထားများရရှိနိုင်ရေး ဆောင်ရွက်ရမည့် လုပ်ငန်းစဉ်များပြားခြင်း၊ ပိုင်ဆိုင်မှု အရှုပ်အရှင်းကင်းစေရန် စိစစ်ရခြင်း၊ ကျေးရွာမြေများကို ကွက်စိပ်/ကွက်ကျဲတိုင်းတာနိုင်ရန် နိုင်ငံတော် ဘဏ္ဍာငွေသုံးစွဲ ခွင့်ပြုနိုင်မှုအပေါ် မူတည်ခြင်း၊ အခြားနည်းသုံးစွဲခွင့်ရရှိရန် လုပ်ငန်းအဆင့်အလိုက် စိစစ်ဆောင်ရွက်ရခြင်းများကြောင့် လုပ်ဆောင်နိုင်ခြင်း မရှိခြင်းဖြစ်ကြောင်း ပြည်ထဲရေးဝန်ကြီးဌာနက ဒုတိယ ဝန်ကြီး ဗိုလ်ချုပ်အောင်စိုးက ပြည်သူ့လွှတ်တော်တွင် ပြောကြားခဲ့သည်။

မြေယာအရှုပ်အရှင်းကင်းသည့် ကျေးရွာများအနက် တစ်မြို့နယ်လျှင် တစ်ရွာစီရွေးချယ်ပြီး ကျေးရွာမြေငှားဂရန် ပြုလုပ်ပေးခြင်းလုပ်ငန်းကို ပြည်ထောင်စုအစိုးရအဖွဲ့၏  ၂၀၁၅ ခုနှစ် ဇွန်လ (၅) ရက်နေ့ ရက်စွဲပါအမိန့် ကြော်ငြာစာ အမှတ် (၅၄/၂၀၁၅)ဖြင့် ၂၀၁၅ ခုနှစ်အတွင်း သုံးလစီမံချက်ချမှတ်ပြီး အကောင်အထည်ဖော် ဆောင်ရွက်ခဲ့ပြီးနောက်  စီမံချက်အနေဖြင့် ဆက်လက်လုပ်ဆောင်နိုင်ခြင်းမရှိတော့ခြင်းဖြစ်ကြောင်း သိရသည်။

တစ်နိုင်ငံလုံးတွင် ကျေးရွာပေါင်း (၆၃၃၄၆) ရွာရှိသည့်အနက် မြေတိုင်းခြင်း၊ မြေပုံထုတ်ခြင်း၊  ဦးပိုင်တပ်ခြင်းများ လုပ်ဆောင်ပြီးသည့် ကျေးရွာအချို့ရှိသော်လည်း တိုးချဲ့ရွာများအပါအဝင် အချို့ကျေးရွာများတွင် တိုင်းတာသတ်မှတ်ထားနိုင်ခြင်း မရှိသေးကြောင်း သိရသည်။

ကျေးရွာမြေများအား ဂရန်မြေများအဖြစ် သတ်မှတ်ထုတ်ပေးနိုင်ခြင်းရှိမရှိကို မတ်လ (၂၉) ရက်နေ့တွင် ကျင်းပသော ပြည်သူ့လွှတ်တော်အစည်းအဝေးတွင် ဝေါမဲဆန္ဒနယ်မှ ဦးတင်ထွေးက မေးမြန်းခဲ့ခြင်းဖြစ်သည်။