~~~~~~~~⊰❂ unicode ❂⊱~~~~~~~~

ထိုင်းနိုင်ငံ၊ ချာချင်ဆောင်မြို့အသွားတွင် မော်တော်ယာဉ်တိမ်းမှောက်မှုမှ သေဆုံးမြန်မာရွှေ့ပြောင်း လုပ်သားများအား မိသားစု၏ ဆန္ဒနှင့်အညီ သဂြိုလ်နိုင်ရေး၊ ဆေးကုသမှုခံယူနေရသူများ ကုသစရိတ်နှင့် နစ်နာသူများ ရထိုက်သည့် အခွင့်အရေးများ ရရှိရေး ထိုင်းနိုင်ငံ ဘန်ကောက်မြို့မှ မြန်မာအလုပ်သမား သံအရာရှိရုံး အပါအဝင် မြန်မာတာဝန်ရှိသူများက ဆောင်ရွက်ပေးနေကြောင်း သိရသည်။

ထိုင်းနိုင်ငံ၊ ချာချင်ဆောင်မြို့ ကွန်ပျူတာစက်ရုံတွင် အလုပ်လုပ်ကိုင်ရန်အတွက် မဲဆောက်မြို့မှ ချာချင်ဆောင်မြို့သို့ မြန်မာရွှေ့ပြောင်းအလုပ်သမား အမျိုးသမီး (၅၁) ဦးအား တင်ဆောင်လာသည့် မော်တော်ယာဉ်သည် ဧပြီလ (၉)ရက်နေ့ ဒေသစံတော်ချိန် ည(၈)နာရီ (၅၀)မိနစ်တွင် ထွက်ခွာသွားပြီး ည (၁၀)နာရီ (၅၀)မိနစ်အချိန်ခန့်၌ မိုင်တိုင်အမှတ် (၆၈) အနီးတွင် တိမ်းမှောက်သွားခြင်းဖြစ်ကြောင်း သိရသည်။

ယင်းမော်တော်ယာဉ် တိမ်းမှောက်မှုကြောင့် အမျိုးသမီး (၆) ဦး သေဆုံးခဲ့ပြီး တာ့ခ်မြို့ရှိ ဆေးရုံတွင် အတွင်းလူနာအဖြစ်(၁၂) ဦးနှင့် ဒဏ်ရာအနည်းငယ်ရသူ (၆)ဦးရှိခဲ့သော်လည်း ဧပြီလ (၁၀)ရက်နေ့တွင် အတွင်းလူနာများအနက် (၂)ဦးမှာ သက်သာလာသဖြင့် ဆေးရုံမှဆင်းနိုင်ပြီဖြစ်ကြောင်း သိရသည်။

မော်တော်ယာဉ် တိမ်းမှောက်မှုဖြစ်ပွားရာသို့ ထိုင်းနိုင်ငံ ဆိုင်ရာ မြန်မာစစ်သံမှူး၊ မြဝတီခရိုင် အုပ်ချုပ်ရေးမှူး၊ ထိုင်းနိုင်ငံ တာ့ခရိုင်မှ စစ်ဗျူဟာမှူး၊ တာ့ခရိုင် အုပ်ချုပ်ရေးမှူးနှင့် တာဝန်ရှိသူများ၊ အလုပ်သမားသံအရာရှိရုံးမှ အလုပ်သမားသံအရာရှိ ဦးအောင်ခင်မြင့်နှင့် ဦးနိုင်မင်းသူ၊ မြန်မာ ပြည်ပ အလုပ်အကိုင် ဝန်ဆောင်မှု လုပ်ငန်းရှင်များအဖွဲ့ချုပ်မှ တွဲဘက်အထွေထွေ အတွင်းရေးမှူး (၁) နှင့် အဖွဲ့ဝင်များ၊ မြန်မာ အေဂျင်စီ၊ ထိုင်းအလုပ်ရှင်တို့က သွားရောက်ကြည့်ရှုပြီး မြန်မာလုပ်သားများအတွက် လိုအပ်သည်များ ကူညီဆောင်ရွက်ပေးကာ တာ့ခ်မြို့ရှိ ဆေးရုံတွင် ဆေးကုသမှု ခံယူနေရသူများကိုလည်း ကူညီပေးနေကြောင်း သိရသည်။

မော်တော်ယာဉ်တိမ်းမှောက်မှုကြောင့် ပဲခူးတိုင်းဒေသကြီးအတွင်းမှ ဖြူးမြို့နယ် ညောင်ကားယားကျေးရွာမှ မအေးငြိမ်းသူ၊ လက်ပတန်းမြို့နယ် ကုလားချောင်းကျေးရွာမှ မဇင်ဇင်နိုင်၊ ညောင်လေးပင်မြို့နယ် ပုဇွန်မြောင်းကျေးရွာမှ မဇင်မိုးဦး၊ မကွေးတိုင်းဒေသကြီးအတွင်း အောင်လံမြို့နယ် ရွှေပန်းတော့ကျေးရွာမှ မလှလှမိုး၊ နတ်မောက်မြို့နယ် ရွာတော်ကျေးရွာမှ မဇာနှင့် မန္တလေးတိုင်းဒေသကြီး ပျော်ဘွယ်မြို့နယ် ကျွန်းတုံးရွာမှ မဇာခြည်ခိုင်တို့ သေဆုံးသွားကြောင်း သိရသည်။

သတင်း - အင်မိုင်ခ
ဓာတ်ပုံ - မြန်မာအလုပ်သမားသံအရာရှိရုံး