~~~~~~~~⊰❂ unicode ❂⊱~~~~~~~~

ဇနီးနှင့် ငါးနှစ်အရွယ် သမီးဖြစ်သူကို သတ်ပြီး ထွက်ပြေးနေသူအား တောထဲမှ ဖမ်းဆီးရမိ
************
ရှမ်းပြည်နယ်(အရှေ့ပိုင်း) ကျိုင်းတုံမြို့ မိုင်းနော့/ဖာတကျေးရွာအုပ်စု၊ ပန်မောက်ရွာမှ နေအိမ်တစ်လုံးတွင် ဇနီးနှင့် အသက်ငါးနှစ်အရွယ် သမီးဖြစ်သူတို့အား သတ်၍နေအိမ်သော့ပိတ်ထားခဲ့ကာ ထွက်ပြေးနေသူကို ကျိုင်းတုံမြို့မရဲစခန်းက မတ်လ (၂၉)ရက်နေ့တွင် ဖမ်းဆီးရမိကြောင်း သိရသည်။

ဇနီးဖြစ်သူ ယေထနှင့် သမီးဖြစ်သူ ယေမိန်းတို့ကို သတ်ပြီးထွက်ပြေးနေသည့် အားဖာ(ခ)အားရှို့အား ရဲတပ်ဖွဲ့က ကျိုင်းတုံမြို့ လွယ်မွေအုပ်စု၊ ဟိုလတ်(၁)ရွာ တောထဲတွင် ဖမ်းဆီးရမိခဲ့ခြင်းဖြစ်ကြောင်း သိရသည်။

ပန်မောက်ရွာမှ မယေထ၏နေအိမ်မှာ သုံးရက်ခန့် သော့ပိတ်ထားသည်ကို တွေ့ရပြီး ကြမ်းပြင်မှ သွေးများကျနေသည်ကို တစ်ရွာတည်းနေသူက သတိထားမိသဖြင့် မယေထ၏ ဖခင်ရှိရာ မိုင်းဇင်းအုပ်စု ဂျိူးဖြူရွာသို့ ကျေးရွာသားတစ်ဦးက မတ်လ (၂၈)ရက်နေ့တွင် သွားရောက်အကြောင်းကြားခဲ့ခြင်းဖြစ်ကြောင်း သိရသည်။
သေဆုံးသူ မယေထ၏ ဖခင်ဖြစ်သူက သားဖြစ်သူအားခေါ်ဆောင်ပြီး ပန်မောက်ရွာမှ သမီးဖြစ်သူ၏ နေအိိမ်သို့ သွားရောက်ကာ ရွာသားများနှင့်အတူ သော့ဖျက်ဝင်ခဲ့ရခြင်းဖြစ်ကြောင်း သိရသည်။

နေအိမ်တွင် သမီးဖြစ်သူနှင့် မြေးဖြစ်သူတို့မှာ နေအိမ်ဧည့်ခန်းတွင် ဓါးဒဏ်ရာများဖြင့် သေဆုံးနေပြီး စောင်များအုပ်ထားသည်ကို တွေ့ရသဖြင့် ကျိုင်းတုံမြို့မရဲစခန်းသို့ မတ်လ (၂၉)ရက်နေ့တွင် တိုင်ကြားခဲ့ကာ အလောင်းများအား နှလုံးလှပိုင်ရှင်များ နာရေးကူညီမှုအသင်းက ပြည်သူ့ဆေးရုံသို့ ပို့ဆောင်ပေးခဲ့ခြင်း ဖြစ်ကြောင်း သိရသည်။

မယေထသည် မတ်လ (၂၆)ရက်နေ့က သမီးဖြစ်သူ၊ ခင်ပွန်းဖြစ်သူ အားဖာ(ခ)အားရှို့တို့နှင့်အတူ လယ်ယာလုပ်ငန်းသွားရောက် လုပ်ကိုင်ပြီး ညနေပိုင်းတွင် နေအိမ်ပြန်လာကာ ချက်ပြုတ်စားသောက်ပြီးနောက် စကားများရန်ဖြစ် ထုရိုက်သံများ ကြားခဲ့ရသည်ဟု အိမ်နီးချင်းများထံမှ သိရသည်။

ဖမ်းဆီးရမိသည့် အားဖာ(ခ)အားရှို့၏ ထွက်ဆိုချက်အရ ၎င်းမှာ စိတ်မထိန်းနိုင်ဘဲ ဇနီးနှင့် သမီးတို့အား ဓါးဖြင့် ခုတ်သတ်ခဲ့သည်ဟု ထွက်ဆိုကြောင်း သိရသည်။

အဆိုပါအမှုအား ကျိုင်းတုံမြို့မရဲစခန်းတွင် (ပ) ၉၁/၂၀၁၈၊ ရာဇသတ်ကြီးပုဒ်မ ၃၀၂ ဖြင့် အမှုဖွင့်ဆောင်ရွက်နေခြင်းဖြစ်ကြောင်း သိရသည်။

သတင်း #စိုင်းဇေယျာ
ဓါတ်ပုံ #နှလုံးလှပိုင်ရှင်များအသင်း