~~~~~~~~⊰❂ unicode ❂⊱~~~~~~~~

အဆိုပါ ဖမ်းဆီးရမိမှုမှာ ၂၀၁၈ ခုနှစ်အတွင်း ဒုတိယအကြိမ်မြောက် ဖမ်းဆီးရမိခြင်းဖြစ်ပြီး ဖေဖော်ဝါရီလ အတွင်းက သတင်းပေးတိုင်တန်းချက်အရ တစ်ကြိမ်ဖမ်းဆီးရမိခဲ့ကြောင်း သိရသည်။

“အခုတစ်ကြိမ်ကတော့ ပုံမှန်စစ်ဆေးမှုကနေ ဖမ်းဆီးရမိခဲ့တာပါ။ အခုလ ဖေဖော်ဝါရီလအတွင်းကတော့ သတင်းပေး တိုင်တန်းချက်အရ ဖမ်းမိတာပေါ့။ ထိုင်းနိုင်ငံကနေ အေးခဲအသား တရားဝင်တင်သွင်းခွင့်ရယူ လုပ်ဆောင်နေတာက လက်ရှိမှာတော့ ရှမ်းအရှေ့တစ်ခုလုံးမှာ တာချီလိတ်အခြေစိုက် ကုမ္ပဏီနှစ်ခုပဲ ရှိပါတယ်”ဟု ကျိုင်းတုံခရိုင် စားသုံးသူအငြင်းပွားမှုဖြေရှင်းရေးအဖွဲ့ အတွင်းရေးမှူး ဦးသန်းစိုးက တာချီလိတ်သတင်း အေဂျင်စီသို့ ပြောသည်။

ကျိုင်းတုံမြို့ နောင်နွန်းပူးပေါင်းစစ်ဆေးရေးစခန်းတွင် အကောက်ခွန်ဦးစီးဌာန၊ ကုန်သွယ်ရေးဦးစီးဌာန၊ ကျိုင်းတုံ ပို့ကုန်သွင်းကုန်စခန်းမှ ဝန်ထမ်းများနှင့်ကျိုင်းတုံခရိုင် စားသုံးသူအငြင်းပွားမှူဖြေရှင်းရေးအဖွဲ့တို့ ပါဝင်သည့် ပူးပေါင်းအဖွဲ့ဖြင့် စစ်ဆေးနေစဉ် မတ်လ (၄)ရက်နေ့ ည(၇)နာရီခွဲဝန်းကျင်တွင် တာချီလိတ်မှ တောင်ကြီးသို့ သွားမည့် ခရီးသည်တင်ယာဉ် ( ၂ ) စီးတွင် ထိုင်းနိုင်ငံထုတ် အေးခဲအသား၊ငါးများအား အကောက်ခွန်မဲ့ တရားမဝင်သယ်ဆောင်လာသည်ကို စစ်ဆေးတွေ့ရှိရခြင်းဖြစ်ကြောင်း သိရသည်။

လွိုင်နမ့်ခုံးယာဉ်လိုင်းနှင့် မိုးကုတ်မန်းယာဉ်လိုင်းများမှ ခရီးသည်တင်ယာဉ်နှစ်စီးတွင် ထိုင်းနိုင်ငံထုတ် အေးခဲအသားနှင့်ငါး စုစုပေါင်း(၇၄၄)ကီလိုအား စစ်ဆေးတွေ့ရှိရသဖြင့် မတ်လ (၅)ရက်နေ့ နေ့လယ် (၂)နာရီအချိန်တွင် ကျိုင်းတုံမြို့ မီးရထားဘူတာရုံဝန်းအတွင်း၌ သက်ဆိုင်ရာဌာနဆိုင်ရာများ၊ ရပ်ကွက် အုပ်ချုပ်ရေးမှူးများ၊ အသင်းအဖွဲ့များက မီးရှို့ဖျက်ဆီးလိုက်ခြင်းဖြစ်ကြောင်း သိရသည်။

အေးခဲအသားများ တင်သွင်းရာတွင် တိရိစာ္ဆန်မွေးမြူရေးနှင့် ကုသရေးဦးစီးဌာနမှ စစ်ဆေး ခွင့်ပြုချက် အပါအဝင် သက်ဆိုင်ရာဌာနများ၏ ခွင့်ပြုချက်ရယူတင်သွင်းရခြင်းဖြစ်ကြောင်း သိရသည်။

သတင်း - အင်မိုင်ခ
ဓာတ်ပုံ - စားသုံးသူရေးရာ ကျိုင်းတုံ