~~~~~~~~⊰❂ unicode ❂⊱~~~~~~~~

တာချီလိတ်၌ လူကုန်ကူးမှု တားဆီးကာကွယ်ရေးအဖွဲ့အသစ်ပြင်ဆင်ဖွဲ့စည်း
**************
ရှမ်းပြည်နယ်(အရှေ့ပိုင်း) တာချီလိတ်ခရိုင် လူကုန်ကူးမှုတားဆီးကာကွယ်ရေးအဖွဲ့အား ၂၀၁၈ ခုနှစ် ဖေဖေါ်ဝါရီလ (၉)ရက်နေ့တွင် အသစ်ပြင်ဆင်ဖွဲ့စည်းလိုက်ပြီး ကြိုတင်ကာကွယ်တားဆီးနှိမ်နင်းရေး လုပ်ငန်းများ၊ ပူးပေါင်းဆောင်ရွက်မည့်လုပ်ငန်းစဉ်များ ဆွေးနွေးကြကြောင်း သိရသည်။

အသစ်ပြင်ဆင်ဖွဲ့စည်းလိုက်သည့် အဖွဲ့တွင် ခရိုင်အထွေထွေအုပ်ချုပ်ရေးဦးစီးဌာနမှ ခရိုင်အုပ်ချုပ်ရေးမှူးက ဥက္ကဌနှင့် ခရိုင်ရဲတပ်ဖွဲ့မှူးရုံးမှ ခရိုင်ရဲတပ်ဖွဲ့မှူးက ဒုတိယဥက္ကဌများအဖြစ် တာဝန်ယူကြပြီး လူကုန်ကူးမှု တားဆီးနှိမ်နှင်းရေးရဲတပ်ဖွဲ့စု တပ်ဖွဲ့စုမှူးက အတွင်းရေးမှူးနှင့် ခရိုင်အထွေထွေအုပ်ချုပ်ရေးဦးစီးဌာန၏ လက်ထောက်ညွှန်ကြားရေးမှူးက တွဲဖက်အတွင်းရေးမှူးအဖြစ် ပါဝင်ဖွဲ့စည်းထားခြင်းဖြစ်ကြောင်း သိရသည်။

အဆိုပါအဖွဲ့တွင် အဖွဲ့ဝင်များအဖြစ် ခရိုင်မီးသတ်ဦးစီးမှူး၊ ခရိုင်ဥပဒေအရာရှိ၊ ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာန ခရိုင်ဦးစီးအရာရှိ၊ ခရိုင်ငါးလုပ်ငန်းဦးစီးဌာန ခရိုင်ဦးစီးဌာနမှူး၊ ခရိုင်ကုန်းလမ်းပို့ဆောင်ရေးညွှန်ကြားမှုဦးစီးဌာန ခရိုင်ဦးစီးမှူး၊ အလုပ်သမားညွှန်ကြားရေးဦးစီးဌာန ခရိုင်ဦးစီးမှူး၊ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ခရို်င်ဦးစီးမှူး၊ ခရို်င်ပညာရေးမှူး၊ ခရို်ငပြည်သူ့ကျန်းမာရေးဦးစီးဌာနမှူး၊ ခရိုင်လူမှုဝန်ထမ်းဦးစီးဌာန ခရိုင်ဦးစီးမှူး၊ ခရိုင်ကြက်ခြေနီ သူနာပြုတပ်ဖွဲ့ ခရိုင်တပ်ဖွဲ့မှူး၊ ခရိုင်အမျိုးသမီးရေးရာအဖွဲ့ ဥက္ကဌ၊ ခရိုင်မိခင်နှင့်ကလေးစောင့်ရှောက်ရေးကြီးကြပ်မှုအဖွဲ့ ဥက္ကဌတို့ပါဝင်ကြောင်း သိရသည်။

အဆိုပါအဖွဲ့အနေဖြင့် လူကုန်ကူးမှုတိုက်ဖျက်ရေးတွင် ပြည်သူလူထုပူးပေါင်းပါဝင်လာရေးအတွက် အောက်ခြေအထိ စည်းရုံးဆောင်ရွက်ခြင်း၊ လုပ်ငန်းစီမံချက်များကို မြို့နယ်များတွင် ထိရောက်စွာ အကောင်အထည်ဖေါ်ရေး ကြီးကြပ်ခြင်း၊ လူကုန်ကူးမှုဖြစ်ပွားမှုများသည့်ဒေသများတွင် သီးခြားပညာပေး ဆောင်ရွက်ခြင်း၊ ရပ်/ကျေးအုပ်ချုပ်ရေးမှူးများအား သင်တန်းပေးခြင်း၊ ရပ်/ကျေးစောင့်ကြည့်ရေးအဖွဲ့များ ဖွဲ့စည်းသင်တန်းပေးခြင်း၊ ဒေသတွင်း အလုပ်အကိုင်အခွင့်အလမ်းရရှိရေးဆောင်ရွက်ခြင်း၊ အဓမ္မလုပ်အားစေခိုင်းမှု မဖြစ်ပွားရေး အသိပညာပေးခြင်း၊ လူကုန်ကူးမှုများအား ထိရောက်သော ပြစ်ဒဏ်ချမှတ်ရန်နှင့် လူကုန်ကူးခံရသူများ နစ်နာကြေးရရှိရေး ပူးပေါင်းညှိနှိုင်းဆောင်ရွက်ခြင်း၊ လူကုန်ကူးခံရသူများ နေရပ်ပြန်ရာတွင် ပြန်လည်ထူထောင်ရေးနှင့် အလုပ်အကိုင်အခွင့်အလမ်းရရှိရေး ညှိနှိုင်းဆောင်ရွက်ပေးခြင်း၊ လူကုန်ကူးမှုတားဆီးရေး ဗဟိုအဖွဲ့၊ မြန်မာနိုင်ငံနှင့် မိတ်ဆက်အဖွဲ့များဖြင့် လုပ်ငန်းပူးပေါင်းဆောင်ရွက်ခြင်း၊ အစီရင်ခံစာတင်ပြခြင်းတို့ကို ဆောင်ရွက်ရမည်ဖြစ်ကြောင်း သိရသည်။

ဓါတ်ပုံ #ခရိုင်ထွေအုပ်