~~~~~~~~⊰❂ unicode ❂⊱~~~~~~~~

ဒုက္ခသည်စခန်းများတွင် နေထိုင်သူများအား ကယားပြည်နယ်တွင်း ပြန်လည်နေရာချထားရေးဆွေးနွေး
****************
ဒုက္ခသည်စခန်းများတွင်နေထိုင်သူများကို ကယားပြည်နယ်တွင်း ပြန်လည်နေရာချထားရေးအတွက် ကရင်နီဒုက္ခသည်များ ပြန်လည်နေရာချထားရေးနှင့် ပြန်လည် ပေါင်းစည်း ရေးလုပ်ငန်းအဖွဲ့ (KnRRRWG) က ပြည်နယ်အစိုးရအဖွဲ့အား လွိုင်ကော်မြို့တွင် ဖေဖေါ်ဝါရီလ (၉)ရက်နေ့က လာရောက်တွေ့ဆုံဆွေးနွေးကြောင်း သိရသည်။

အဆိုပါအဖွဲ့သည် ကယားပြည်နယ်တွင်း ပြန်လည်နေရာချထားရေးအတွက် ပြည်နယ်အစိုးရအား လာရောက်တွေ့ဆုံသည့် လေးခုမြောက်အဖွဲ့ဖြစ်ပြီး UNHCR ကလည်း ပြန်လည်နေရာချထားရေးအတွက် ပြည်နယ်အစိုးရနှင့် ဆွေးနွေးမှုများ လုပ်ဆောင်နေကြောင်း သိရသည်။

ကရင်နီဒုက္ခသည်များ ပြန်လည်နေရာချထားရေးနှင့် ပြန်လည် ပေါင်းစည်း ရေးလုပ်ငန်းအဖွဲ့ (KnRRRWG)က နေရပ်ပြန်လာမည့်သူများအတွက် ဆောင်ရွက်ပေးနိုင်မည့် အခြေအနေ၊ ပညာရေး၊ ကျန်းမာရေး၊ စားဝတ်နေရေး၊ အလုပ်အကိုင်အခွင့်အလမ်းများနှင့်ပတ်သက်ပြီး ပြည်နယ်အစိုးရအဖွဲ့ထံ တင်ပြဆွေးနွေးရာ ပြည်လည်နေထိုင်လိုသူများအား ဥပဒေ၊ မူဘောင်များနှင့်အညီ နိုင်ငံသားတစ်ယောက်၏ အခွင့်အရေး အပြည့်အဝ ရရှိရေးကို အစိုးရအနေဖြင့် ဆောင်ရွက်ပေးမည်ဖြစ်ကြောင်း ပြည်နယ်အစိုးရအဖွဲ့ ဝန်ကြီးချုပ် ဦးအယ်လ်ဖောင်းရှိုက ဆွေးနွေးကြောင်း သိရသည်။

ပြည်နယ်အတွင်း ပြန်လည်နေထိုင်မည့်သူများအတွက် လိုအပ်သည်များ ဆောင်ရွက်ပေးနိုင်ရန် ပြန်ရောက်လာမည့် အရေအတွက်နှင့် နေရပ်တို့အား တင်ပြရန် ဆွေးနွေးထားကြောင်း သိရသည်။

အဆိုပါတွေ့ဆုံဆွေးနွေးပွဲသို့ ကယားပြည်နယ် အစိုးရအဖွဲ့၊ ပြည်နယ်ဝန်ကြီးချုပ်၊ ပြည်နယ်အစိုးရအဖွဲ့ဝင် ၀န်ကြီးများ၊ ပြည်နယ် ဥပဒေချုပ်၊ ပြည်နယ်စာရင်းစစ်ချုပ်နှင့် ဌာန ဆိုင်ရာတာဝန်ရှိသူများ တက်ရောက်ကြပြီး နေရပ်ပြန်ကိစ္စနှင့်ပတ်သက်၍ ဌာနဆိုင်ရာအလိုက် ဖော်ဆောင်နေသည့် လုပ်ထုံးလုပ်နည်း များ၊ ကူညီဆောင်ရွက်ပေးနိုင်မည့် အစီအမံများ၊ အခက်အခဲရှိပါက ဖြေရှင်း ဆောင်ရွက်နိုင်သည့် အခြေအနေများ၊ ဆောင်ရွက်ပေးနိုင်သည့် လုပ်ငန်းစဉ်များအား အသီးသီး ဆွေးနွေးခဲ့ကြကြောင်း သိရသည်။

ဓါတ်ပုံ #ပြည်နယ်အစိုးရ