~~~~~~~~⊰❂ unicode ❂⊱~~~~~~~~

မြန်မာ့တပ်မတော်နှင့် တရုတ်နိုင်ငံတွင် တွေ့ဆုံဆွေးနွေးပွဲနှင့်ပတ်သက်၍ KIO က ထုတ်ပြန်ချက်တစ်စောင် ထုတ်ပြန်
**************
မြန်မာ့တပ်မတော်၏ ကိုယ်စားလှယ်အဖွဲ့နှင့် KIO ဗဟိုကော်မတီအဖွဲ့တို့ တရုတ်နိုင်ငံ ယူနန်ပြည်နယ် တာလီမြို့၌ ၂၀၁၈ ခုနှစ် ဖေဖော်ဝါရီလ (၁)ရက်နေ့က တွေ့ဆုံမှုနှင့်ပတ်သက်၍ KIO ဗဟိုကော်မတီက ဖေဖေါ်ဝါရီလ (၈)ရက်နေ့ နေ့စွဲဖြင့် ထုတ်ပြန်ချက်တစ်စောင်ကို ထုတ်ပြန်ထားသည်။

အဆိုပါ တွေ့ဆုံဆွေးနွေးပွဲသည် မြန်မာ့တပ်မတော်နှင့် KIO ဗဟိုတို့ သီးခြားတွေ့ဆုံသည့် ပထမဆုံး ဆွေးနွေးပွဲဖြစ်ပြီး အဆိုပါ တွေ့ဆုံဆွေးနွေးပွဲတွင် နှစ်ဦးနှစ်ဖက် ကတိကဝတ်ပြုသည့် သဘောတူညီမှု တစ်စုံတစ်ရာ မရရှိခဲ့သော်လည်း ထပ်မံတွေ့ဆုံဆွေးနွေးသွားကြရန် နှစ်ဖက်စလုံးက သဘောဆန္ဒရှိကြောင်း ပြောဆိုခဲ့ကြပါသည်ဟု ထုတ်ပြန်ချက်တွင် ဖေါ်ပြထားသည်။

တရုတ်ပြည်သူ့သမ္မတနိုင်ငံ အာရှရေးရာအထူးသံတမန်၏ ကြားဝင်စေ့စပ်ကူညီဆောင်ရွက်ပေးမှုဖြင့် မြန်မာ့တပ်မတော် ကာကွယ်ရေးဦးစီးချုပ်၏ ကိုယ်စား ဒုတိယဗိုလ်ချုပ်ကြီး ထွန်းထွန်းနောင်ဦးဆောင်သည့် ကိုယ်စားလှယ်အဖွဲ့နှင့် KIO ဗဟိုကော်မတီဥက္ကဋ္ဌ ဗိုလ်ချုပ်ကြီးအင်ဘန်လ ဦးဆောင်သည့် ဗဟိုကော်မတီဝင်များအဖွဲ့တို့ တွေ့ဆုံခဲ့ကြခြင်းဖြစ်ကြောင်း သိရသည်။

ဆွေးနွေးပွဲတွင် မြန်မာ့တပ်မတော်ဘက်က  KIA တပ်ရင်း(၁၄)ဌာနချုပ်အပါအဝင် KIA တပ်စခန်းများ ဖယ်ရှားပေးရန်နှင့် အချို့သော KIA တပ်မဟာများတည်ရှိမှုကို အသိအမှတ်မပြုနိုင်ကြောင်း ဆွေးနွေးခဲ့ပြီး KIO အဖွဲ့က ယခုလက်ရှိဖြစ်ပွားနေသော တိုက်ပွဲများကိစ္စအပါအဝင် ဒေသတည်ငြိမ်ရေး၊ တိုက်ပွဲများလျှော့ချရေး၊ ငြိမ်းချမ်းရေးဆောင်ရွက်ရာတွင် အားလုံးပါဝင်ရေးနှင့် ပင်လုံစာချုပ် ပင်လုံကတိကဝတ်နှင့်အညီ ဖက်ဒရယ်ပြည်ထောင်စုတည်ဆောက်ရေးတို့ကို ဆွေးနွေးခဲ့ကြောင်း ထုတ်ပြန်ချက်တွင် ဖေါ်ပြထားသည်ကို တွေ့ရသည်။

သတင်း #အင်မိုင်ခ