**************
သွေးသစ်အမည်ဖြင့် မှတ်ပုံတင်ထားသည့် Better Burmeses Health Care အဖွဲ့၏ ကျန်းမာရေး စောင့်ရှောက်မှုရံပုံငွေအတွက် ရန်ကုန်မြို့ ဘိုကလေးစျေးလမ်းရှိ ပန်သူရိယအနုပညာပြခန်းတွင် ရံပုံငွေပန်းချီလေလံတင်ရောင်းချပွဲကို ဖေဖေါ်ဝါရီလ (၁၀)ရက်နေ့ ညနေ (၅)နာရီတွင် ကျင်းပမည်ဖြစ်သည်။

ပုသိမ်ထီးများတွင် ရေးဆွဲထားသည့်ပန်းချီများကို ကြမ်းခင်းစျေး အမေရိကန်ဒေါ်လာ (၂၀၀) ဖြင့် ပန်းချီပညာရှင် (၃၉)ဦးက ပန်းချီရေးဆွဲထားသည့် ပုသိမ်ထီး (၆၆)ခုအား လေလံတင်ထားခြင်းဖြစ်သည်။

၂၀၁၄ ခုနှစ်မှစ၍ နှစ်နှစ်တစ်ကြိမ်ကျင်းပသည့် အဆိုပါရံပုံငွေပန်းချီပြပွဲအား ၂၀၁၈ ခုနှစ် ဖေဖေါ်ဝါရီလ (၃)ရက်နေ့မှ (၁၀)ရက်နေ့အထိ ပြသထားခြင်းဖြစ်ပြီး ပန်းချီရေးဆွဲထားသည့် ပုသိမ်ထီးများအပြင် အခြား ရံပုံငွေ ကံစမ်းမဲလက်မှတ်များ၊ ရံပုံငွေထည့်ဝင်ခြင်းအစီအစဉ်များလည်း ပါဝင်ကြောင်း သိရသည်။

“ကျန်းမာရေးစောင့်ရှောက်မှုအတွက် ရှေ့ဆက်ပြီးတော့ ပိုကောင်းတဲ့အစီအစဉ်တွေလုပ်ဖို့ရှိပါတယ်။ ဒီလိုတွေ လုပ်နိုင်ဖို့အတွက် အနုပညာရှင်တွေရဲ့ ကမ်းလက်တစ်ဖက်အဖြစ် ဒီလိုပွဲလေးလုပ်နိုင်ဖို့ လက်ခံရရှိခဲ့တာပါ။ အခုဆိုရင် သုံးကြိမ်မြောက်ရှိသွားပါပြီ။ သူတို့က ဒီပန်းချီကားတွေကို ပုံဖေါ်ပြီးတော့ ရောင်းရငွေရဲ့အချိုးတစ်ခုကို ဉာဏ်ပူဇော်ခပေးပြီး ကျန်တာကို ကျွန်မတို့ ကျန်းမာရေးစောင့်ရှောက်မှုအတွက် လှူဒါန်းပါတယ်”ဟု သွေးသစ်အဖွဲ့တည်ထောင်သူတစ်ဦးဖြစ်သည့် ပြည်ကုတင် ၅၀၀ ဆေးရုံကြီးမှ မေ့ဆေးအထူးကုဆရာဝန်ကြီး ဒေါက်တာမြင့်မြင့်စိန်က တာချီလိတ်သတင်းအေဂျင်စီသို့ ပြောသည်။

၂၀၁၄ ခုနှစ်တွင် သွေးသစ်အမည်ဖြင့် မှတ်ပုံတင်သည့် Better Burmeses Health Care (BBHC)အဖွဲ့အဖြစ် ၂၀၀၅ ခုနှစ်ကတည်းက စတင်ခြင်းဖြစ်ပြီး လက်ရှိတွင် တောင်ဒဂုံမြို့နယ်နှင့် အရှေ့ဒဂုံမြို့နယ်များတွင် အထိုင်ဆေးခန်း (၃)ခုနှင့် ၂၀၀၈ ခုနှစ်ကတည်းက စတင်သည့် ရွေ့လျားဆေးခန်းမှာ (၄)ခုအထိရှိနေပြီဖြစ်ကြောင်း သိရသည်။

 “ပြည်သူ့ကျန်းမာရေးအဆင့်အတန်းကိုမြှင့်ချင်ဖို့ဆိုရင် ပြည်သူတွေကိုယ်တိုင်ပါဝင်မှ ရမယ်။ ပြည်သူတွေအနေနဲ့ ကျန်းမာအောင် ဘယ်လိုနေရတယ်ဆိုတာသိရမယ်။ အဲဒီလိုပြုနေထိုင်ရမယ်ဆိုတာကို သိဖို့အတွက် တစိုက်မတ်မတ် လုပ်ခဲ့တယ်။ ဆေးအလကားကုရုံတင်မဟုတ်ဘူး အဲဒါကို သူတို့ကိုယ်တိုင် တာဝန်ယူရမယ်ဆိုတာ သိအောင်လုပ်ပေးတာပါ။ ဆီးချို၊သွေးချိုဖြစ်နေတဲ့သူတွေဆိုတာ စိတ်ဓါတ်ကျနေရုံနဲ့ မရဘူး။ စိတ်မညစ်ညူးဘဲနဲ့ ရှိတဲ့ရောဂါကို ရင်ဆိုင်ဖြေရှင်းရမယ်ဆိုတာကို တိုက်တွန်းတယ်။ ဒီရောဂါတွေနဲ့ပဲ သက်တမ်းစေ့ဘယ်လိုနေနိုင်တယ်ဆိုတာကို သူတို့ကို အသိပညာပေးတယ်။ လူနာတွေနဲ့ ရင်းရင်းနှီးနှီး နွေးနွေးထွေးထွေးဆက်ဆံတယ်။ ဒီတော့ သူတို့ ယုံကြည်မှုတွေ ရလာတယ်။ ဒီတော့ ဒဂုံဝန်းကျင်တင်မကဘူး ရပ်ဝေးတွေကပါ လာရောက် ကုသမှုခံယူကြတော့ ရန်ပုံငွေလိုအပ်လာတယ်”ဟု ပြည်ကုတင် ၅၀၀ ဆေးရုံကြီးမှ မေ့ဆေးအထူးကုဆရာဝန်ကြီး ဒေါက်တာမြင့်မြင့်စိန်က ပြောသည်။

သွေးသစ်အဖွဲ့သည် ပြည်သူလူထုအား ကျန်းမာရေးစောင့်ရှောက်မှုအပြင် ကျန်းမာရေး အလေ့အကျင့်ကောင်းများ ရှိစေရေး၊ မျိုးဆက်သစ်ဆရာဝန်များအနေဖြင့် လူနာနှင့်ဆရာဝန် တိုက်ရိုက်ထိတွေ့မှု ပုံစံပြောင်းလဲရေးတို့ကိုလည်း လုပ်ဆောင်နေခြင်းဖြစ်ကြောင်း သိရသည်။

“ခေါင်းဆောင်မှုပေးတဲ့ ဆရာဝန်တွေအပိုင်းမှာလည်း ခံယူချက်ပြောင်းလဲအောင် ကြိုးစားပါတယ်။ သွေးသစ်ဆိိုတဲ့နာမည်အတိုင်းပဲ မျိုးဆက်သစ်ဆရာဝန်တွေအနေနဲ့ လူနာတွေရဲ့စိတ်ကို ကိုယ်ချင်းစာပြီးတော့ နားလည်ပြီးတော့ သူတို့နဲ့ထိတွေ့ ကုသမှုပြန်ပေးနိုင်အောင် လေ့ကျင့်ပေးပါတယ်”ဟု သွေးသစ်အဖွဲ့မှ မေ့ဆေးအထူးကုဆရာဝန်ကြီး ဒေါက်တာမြင့်မြင့်စိန်က ပြောသည်။

အဆိုပါအဖွဲ့အား ၂၀၀၅ ခုနှစ်တွင် မေ့ဆေးအထူးကုဆရာဝန်ကြီး ဒေါက်တာ ဆမားဂျာလင်၊ ကလေးအထူးကုဆရာဝန်ကြီး ဒေါက်တာ စန်းစန်းဦး၊ ပြည်ကုတင် ၅၀၀ ဆေးရုံကြီးမှ မေ့ဆေးအထူးကုဆရာဝန်ကြီး ဒေါက်တာမြင့်မြင့်စိန်နှင့် Finance Manager Mr. Robert Berg တို့က စတင်တည်ထောင်ခဲ့ခြင်းဖြစ်ပြီး တည်ထောင်သူလေးဦး၏ ထည့်ဝင်ငွေဖြင့် လုပ်ငန်းစတင် လည်ပတ်နေခြင်းဖြစ်ရာ လူနာများလာချိန်တွင် ရန်ပုံငွေလိုအပ်ချက်ရှိလာသဖြင့် ရန်ပုံငွေရှာဖွေရေးပွဲအား လုပ်ဆောင်နေခြင်းဖြစ်ကြောင်း သိရသည်။

 “ဒီအဖွဲ့မှာလုပ်ဖြစ်တာက ကျန်းမာရေးစောင့်ရှောက်မှုကို ထိထိရောက်ရောက်လုပ်နေတာဖြစ်တဲ့အတွက်ရော၊ ဘွဲ့ရပြီးခါစ အတွေ့အကြုံမရှိသေးခင်မှာ အတွေ့အကြံုရှိပြီးသားစီနီယာတွေနဲ့ လက်တွဲလုပ်ခွင့်ရတဲ့ အတွက်ရော လုပ်ဖြစ်ပါတယ်။ ဒီမှာသုံးနှစ်လောက် အလုပ်လုပ်ပြီးတဲ့အခါမှာ လူနာတွေနဲ့ ထိတွေ့ဆက်ဆံမှုအပိုင်းမှာ အများကြီး အတွေ့အကြံုရလာပါတယ်။ ဒီမှာက ကျွန်မတို့လို အငယ်တွေကတော့ လုပ်အားခလည်းရပါတယ်”ဟု သွေးသစ်အဖွဲ့တွင် သုံးနှစ်ကြာကူညီလုပ်ဆောင်လာသည့် ဒေါက်တာ အိမ့်ရွှေဇင်သိန်းက ပြောသည်။

အဆိုပါအဖွဲ့တွင် လက်ရှိတာဝန်ထမ်းဆောင်နေသည့် ဆရာဝန်များက ကုသမှုအပိုင်းတွင် ကူညီလုပ်ဆောင်ပေးနေကြခြင်းဖြစ်ပြီး အထိုင်ဆေးခန်း(၃)ခုနှင့် ရွေ့လျားဆေးခန်း (၄)ခုတွင် လက်ရှိအချိန်ထိ ကုသပေးနေရသူစုစုပေါင်း လူနာ (၅၀၀)နီးပါးရှိနေကြောင်း သိရသည်။

သတင်း၊ဓါတ်ပုံ #ချယ်ရီထိုက်