~~~~~~~~⊰❂ unicode ❂⊱~~~~~~~~

ရှမ်းပြည်နယ်(အရှေ့ပိုင်း)၊ တာချီလိတ်မြို့၊ တာလော့ရပ်ကွက်၊ သရဖီလမ်းရှိ အားကစားဝတ်စုံများ ရောင်းသည့် ဆိုင်၏ လေးထပ်တိုက် အပေါ်ဆုံးတွင် ၂၀၁၈ခုနှစ် ဇန်နဝါရီလ(၆)ရက်နေ့ နံနက်(၁၀)နာရီကျော်က ဖြစ်ပွားသည့် မီးလောင်မှုမှာ ဘုရားမီး ပူဇော်ထားသည့် ဖယောင်းတိုင် လဲကျရာမှ တဆင့် ကူးစက် လောင်ကျွမ်းရခြင်း ဖြစ်ကြောင်း မြို့နယ်မီးသတ် ဦးစီးဌာနထံက သိရသည်။

မီးလောင်မှုကြောင့် လေးထပ်တိုက်အပေါ်ဆုံးတွင် သိုလောင်ထားသည့် အားကစားဝတ်စုံ အထည်များ၊ အားကစားဝတ်စုံများ၊ မွေ့ယာနှင့် ခြင်ထောင်များ မီးလောင်ထဲ ပါသွားသည့်အပြင် မျက်နှာကျက်၊ တံခါးများ လောင်ကျွမ်း သွားခဲ့သော်လည်း နေအိမ်အတွင်းရှိ လူများမှာ ထိခိုက်ဒဏ်ရာရရှိမှု မရှိကြောင်း သိရသည်။

မီးလောင်မှုဖြစ်ပွားရာသို့ တာချီလိတ်ခရိုင်အုပ်ချုပ်ရေးမှူး ဦးတင်ဝင်းရွှေ၊ ခရိုင်ရဲတပ်ဖွဲ့မှူး ဒုတိယရဲမှူးကြီး ထိန်ဝင်း နှင့် မြို့နယ်ရဲတပ်ဖွဲ့မှူး ရဲမှူး သန်းနုတို့က ဦးဆောင်ကြီးကြပ်၍ ရဲတပ်ဖွဲ့ဝင်များ၊ မြို့နယ်မီးသတ် ဦးစီးဌာန မှ မြို့နယ်ဦးစီးမှူး ဦးအောင်ဇော်လင်း နှင့် မီးသတ်တပ်ဖွဲ့ဝင်များ၊ အရန်မီးသတ် တပ်ရင်းမှ ဒုတပ်ရင်းမှူး ဦးရဲနန္ဒါလင်း နှင့် အရန်မီးသတ်တပ်ဖွဲ့ဝင်များ၊ ကြက်ခြေနီတပ်ဖွဲ့ဝင်များ၊ တာချီလိတ်နာရေး ကူညီမှုအသင်း ဥက္ကဌ ဦးလှမိုး နှင့် အသင်းဝင်များ၊ တာလော့ရပ်ကွက်အုပ်ချုပ်ရေးမှူး နှင့် ပြည်သူများက ဝိုင်းဝန်းမီးငြှိမ်းသတ်ရာ မိနစ်(၂၀)ဝန်းကျင်အကြာတွင် မီးလုံးဝငြှိမ်းသွားခဲ့ကြောင်း သိရသည်။

အဆိုပါ မီးလောင်မှု ဖြစ်ပွားသည့် နေအိမ်မှ ဒေါ်နန်းရွှကြော အား တာချီလိတ်မြို့မရဲစခန်းတွင် အမှုဖွင့် အရေးယူဆောင်ရွက်လျက်ရှိကြောင်း သိရသည်။