~~~~~~~~⊰❂ unicode ❂⊱~~~~~~~~

 မဲခေါင်-လန်ချန်းမြစ်ကြောင်း ပူးပေါင်းကင်းလှည့်ခြင်းအပေါ် မြန်မာ၊ တရုတ်၊ လာအို၊ ထိုင်းနိုင်ငံ အဆင့်မြင့်အရာရှိကြီးများ အစည်းအဝေးကျင်းပ
****************
မဲခေါင်-လန်ချန်းမြစ်ကြောင်း ပူးပေါင်းကင်းလှည့်ခြင်းအပေါ် မြန်မာ၊ တရုတ်၊ လာအို၊ ထိုင်းနိုင်ငံတို့မှ အဆင့်မြင့်အရာရှိကြီးများ ညှိနှိုင်းအစည်းအဝေး ကို ၂၀၁၈ ခုနှစ်၊ ဇန်နဝါရီလ (၁၁) ရက်နေ့နှင့် (၁၂)ရက်နေ့များ၌ ရန်ကုန်မြို့တွင် ကျင်းပနေကြောင်း သိရသည်။

အဆိုပါ အစည်းအဝေးတွင် မဲခေါင်ဒေသတွင်း လုံခြုံရေးနှင့် တရားဥပဒေစိုးမိုးရေးအတွက် သတင်းအချက်အလက်ဖလှယ်မှုများ ပိုမို မြှင့်တင်ပူးပေါင်း ဆောင်ရွက်ရေး၊ မဲခေါင်မြစ်ကြောင်း ပူးပေါင်းဆောင်ရွက်ရေး အစီအစဉ်တွင် နယ်စပ်ဆက်ဆံရေးရုံးများ၏ အခန်းကဏ္ဍနှင့် ပူးပေါင်း ဆောင်ရွက်မှုကိုလည်း မြှင့်တင်ဆောင် ရွက်ရေး၊ နှစ်နိုင်ငံနယ်စပ်ဒေသများတွင် ဖြစ်ပွားမှုအများဆုံးဖြစ်သည့် မူးယစ်ဆေးဝါး၊ လူကုန် ကူးမှု၊ လောင်းကစားမှုနှင့် တရားမဝင်ကုန်ပစ္စည်းများ သယ်ဆောင် ရောင်းဝယ်မှုများ တားဆီးနှိမ်နင်းရေးလုပ်ငန်းများ ပိုမိုမြှင့်တင် ဆောင်ရွက်ရေး၊ နယ်စပ်ဒေသတွင် တာဝန်ထမ်းဆောင်နေသော ခရိုင်အဆင့်၊ မြို့နယ်အဆင့်များ အချင်းချင်း ပူးပေါင်းဆောင်ရွက်မှုနှင့် ချစ်ကြည်ရင်းနှီးမှု၊ ယုံကြည်မှုများ ပိုမိုမြှင့်တင်နိုင်ရေး ဆိုင်ရာကိစ္စရပ်များ ဆွေးနွေးနေခြင်းဖြစ်ကြောင်း သိရသည်။

အဆိုပါ (၄)နိုင်ငံ ပူးပေါင်းဆောင်ရွက်မှုတွင် ကင်းလှည့်ဆောင်ရွက်ခြင်း အပါအဝင် လုံခြုံရေးနှင့် တရားဥပဒေစိုးမိုးရေးဆိုင်ရာများကို ပူးပေါင်းဆောင်ရွက်ခြင်း၊ ပြန်လည်သုံးသပ်ဆွေးနွေးခြင်း၊ အပြန်အလှန်ကူညီပေးခြင်းများ ဆောင်ရွက်နေကြခြင်းဖြစ်ပြီး အကြမ်းဖက်မှု၊ မူးယစ် ဆေးဝါးမှု၊ လူကုန်ကူးမှု၊ ငွေကြေးခဝါချမှုနှင့် ဆိုက်ဘာမှုခင်းများ လျော့နည်းကျဆင်းရေးအတွက် ပူးပေါင်းဆောင်ရွက်ကြရန် အရေးကြီးကြောင်း ပြည်ထဲရေးဝန်ကြီးဌာန၊ ဒုတိယဝန်ကြီး ဗိုလ်ချုပ်အောင်စိုးက အဖွင့်အမှာစကားတွင် ထည့်သွင်းပြောကြားခဲ့သည်။

အဆိုပါအစည်းအဝေးဖွင့်ပွဲအား ရန်ကုန်မြို့ Summit Parkview Hotel တွင် ကျင်းပရာ ပြည်ထဲရေးဝန်ကြီးဌာန၊ ဒုတိယဝန်ကြီးဗိုလ်ချုပ် အောင်စိုး၊ အမှတ်(၂)လုံခြုံရေးရဲ ကွပ်ကဲမှုအဖွဲ့မှူး၊ ရေကြောင်းရဲတပ်ဖွဲ့မှူး၊ ရန်ကုန်တိုင်းဒေသကြီးရဲတပ်ဖွဲ့မှူး၊ မြန်မာနိုင်ငံဆိုင်ရာ တရုတ်နိုင်ငံသံရုံးမှ ရဲဆက်ဆံရေးသံမှူးကြီး၊ ဖိတ်ကြားထားသော ဧည့်သည်တော်များနှင့် မြန်မာ၊ တရုတ်၊ လာအို၊ ထိုင်းနိုင်ငံတို့မှ ကိုယ်စားလှယ်များ စုစုပေါင်း (၅၀) ဦးတက်ရောက်ကြပြီး မြန်မာ - ထိုင်းနယ်စပ်ဒေသ ဖြစ်သည့် ရှမ်းပြည်နယ်(အရှေ့ပိုင်း) တာချီလိတ်မှ ခရိုင်ရဲတပ်ဖွဲ့မှူး ဒုရဲမှူးကြီး ထိန်ဝင်းလည်း အဆိုပါ အစည်းအဝေး တက်ရောက်နေကြောင်း သိရသည်။

တရုတ်နိုင်ငံတွင် လန်ချန်းဟုခေါ်သည့် မဲခေါင်မြစ်၏ မြစ်ကြောင်းတလျှောက် လုံခြုံရေးနှင့် တရားဥပဒေစိုးမိုးရေးကို ထိရောက်စွာ အကောင်အထည်ဖော် ဆောင်ရွက်နိုင်ရန်အတွက် နယ်နမိတ်ထိစပ်နေသည့် မြန်မာ၊ တရုတ်၊ လာအိုနှင့် ထိုင်းနိုင်ငံတို့ ၂၀၁၁ ခုနှစ်မှစ၍ ညှိနှိုင်းဆွေးနွေးခဲ့ပြီး ပူးပေါင်းကင်းလှည့်ခြင်းကို ဆောင်ရွက်ခဲ့ခြင်းဖြစ်ကြောင်း သိရသည်။

သတင်း #အင်မိုင်ခ