~~~~~~~~⊰❂ unicode ❂⊱~~~~~~~~

ပြည်နယ်အစိုးရနှင့် တပ်မတော်အား ဆန္ဒထုတ်ဖေါ်နေသူများအား ကယားပြည်နယ်ဝန်ကြီးချုပ် တွေ့ဆုံရှင်းလင်း
*************
ကယားပြည်နယ် လွိုင်ကော်မြို့တွင် ဇန်နဝါရီလ (၁၉)ရက်နေ့က ပြည်နယ်အစိုးရနှင့် တပ်မတော်အား ဆန္ဒထုတ်ဖေါ်သူများ တောင်းဆိုချက်များနှင့်ပတ်သက်၍ ပြည်နယ်အစိုးရအဖွဲ့ ဝန်ကြီးချုပ်က ဆန္ဒထုတ်ဖေါ်သူများအား ကိုယ်စားပြုသူ(၅)ဦးအား တွေ့ဆုံရှင်းလင်းဆွေးနွေးကြောင်း သိရသည်။

ကယားပြည်နယ် လွိုင်ကော်မြို့တွင် KNPP တပ်ဖွဲ့ဝင် သုံးဦးနှင့်အရပ်သားတစ်ဦးအသတ်ခံရမှုနှင့် ပတ်သက်၍ အမှုမှန်ဖေါ်ထုတ်ပေးရန် ခွင့်ပြုချက်မယူူဘဲ ဆန္ဒထုတ်ဖေါ်ကြသဖြင့် ဇန်နဝါရီလ (၁၂)ရက်နေ့က လူငယ် (၅)ဦးအား ငြိမ်း/စု/စီဥပဒေအရ အမိန့်ချမှတ်ခဲ့ပြီး အဆိုပါ လူငယ်များ၏ တရားရုံးချိန်းနေ့တွင် ခွင့်ပြုချက်မယူဘဲ ဝန်းရံလိုက်ပါပို့ဆောင်ရင်း ဆန္ဒထုတ်ဖေါ်သည့်အတွက် ဦးဆောင်သူ (၃)ဦးကို ငြိမ်း/စု/စီဖြင့် ဇန်နဝါရီလ (၁၉)ရက်နေ့၌ ပထမဆုံး ရုံးချိန်းစစ်ဆေးရာ ကရင်နီပြည်လူငယ်များသမဂ္ဂ (UKSY) လူငယ်များက ခွင့်ပြုချက်မယူဘဲ ဇန်နဝါရီလ (၁၉)ရက်နေ့တွင် ထပ်မံဆန္ဒထုတ်ဖေါ်နေကြခြင်းဖြစ်သည်။

လွိုင်ကော်မြို့ ကန္ဒရဝတီလမ်းမကြီးပေါ်ရှိ ကယား ပြည်နယ်အစိုးရအဖွဲ့ရုံးရှေ့တွင် လာရောက်၍ ငြိမ်းချမ်းစွာစုဝေးတန်းစီ ဆန္ဒပြရာတွင် လိုက်နာရမည့် ဥပဒေအရ ကြိုတင်တင်ပြခွင့်ပြုချက် ရယူခြင်းမရှိဘဲ ဆန္ဒထုတ်ဖော်နေကြသော လူစုလူဝေး၏ ကိုယ်စားပြုသူများအား ကယားပြည်နယ်အစိုးရအဖွဲ့ ဝန်ကြီးချုပ်က နံနက် (၁၀)နာရီခွဲတွင် တွေ့ဆုံဆွေးနွေးခဲ့ခြင်းဖြစ်ကြောင်း သိရသည်။

ထိုသို့ တွေ့ဆုံရာတွင် ဆန္ဒထုတ်ဖော်သူများ၏ ကိုယ်စားပြုသူ (၅)ဦးက အရပ်သားတစ်ဦး အသတ်ခံရသည်နှင့်ပတ်သက်၍ သတင်းထုတ်ပြန်ပေးရန်၊ ထောင်ဒဏ်ကျခံနေရသော ဆန္ဒပြလူငယ်များအား လွှတ်ပေးရန်၊ တရားစွဲဆိုခံရသော လူငယ်(၃)ဦးအား အမှုရုပ်သိမ်းပေးရန်၊ ဆန္ဒထုတ်ဖော်သည့်အဖွဲ့မှ ပူးပေါင်းဆောင်ရွက်ရန်၊ တစ်လလျှင်တစ်ကြိမ် တွေ့ဆုံရန်နှင့် ငြိမ်းချမ်းရေးကိစ္စများကို ဖြေရှင်းပေးရန်တို့ကို ပြည်နယ်အစိုးရအဖွဲ့ ဝန်ကြီးချုပ်ထံ တင်ပြခဲ့ကြောင်း သိရသည်။

ဆန္ဒထုတ်ဖော်သူများ၏ ကိုယ်စားပြုသူ (၅)ဦးက တင်ပြလာသည့် အရပ်သားတစ်ဦးအသတ်ခံရသည့်ကိစ္စအား ဖြေရှင်းရန်မှာ အဆိုပါအရပ်သားတစ်ဦး အသတ်ခံရမှုနှင့်ပတ်သက်၍ သက်ဆိုင်ရာရဲတပ်ဖွဲ့ထံ အမှုဖွင့်တိုင်ကြားထားခြင်းမရှိသေးကြောင်း သိရသဖြင့် အမှုဖွင့်တိုင်ကြားရန် လိုအပ်ကြောင်း ပြည်နယ်ဝန်ကြီးချုပ်က ပြန်လည်ရှင်းလင်းခဲ့သည်။

ခွင့်ပြုချက်မယူဘဲ ဆန္ဒထုတ်ဖေါ်မှုများနှင့်ပတ်သက်၍ ဥပဒေနှင့်အညီ လုပ်ဆောင်ကြရန် ဝန်ကြီးချုပ်က တိုက်တွန်းလိုက်ပြီး တစ်လတစ်ကြိမ် ပြည်နယ်ဝန်ကြီးချုပ်နှင့်တွေ့ဆုံရန် တောင်းဆိုမှုနှင့်ပတ်သက်၍ ဒေသတွင်းလုပ်ဆောင်ချက်များအတွက် ပြည်နယ်အစိုးရ ဝန်ကြီးချုပ်အနေဖြင့် တက်ရောက်ရန် လိုအပ်၍ ဖိတ်ကြားသည်များရှိပါက တက်ရောက်မည် ဖြစ်ကြောင်း ရှင်းလင်းဆွေးနွေးခဲ့ကြောင်း သိရသည်။

ငြိမ်းချမ်းရေးကိစ္စ ဖြေရှင်းပေးရန် တောင်းဆိုချက်နှင့်ပတ်သက်၍ ပြည်ထောင်စုမှ နိုင်ငံတော်အတိုင်ပင်ခံပုဂ္ဂိုလ် ဦးစီးခေါင်းဆောင်၍ ဆောင်ရွက်နေပြီး ကယားပြည်နယ်အနေဖြင့် ငြိမ်းချမ်းရေးအတွက် ပြည်နယ်အတွင်းရှိ လက်နက်ကိုင်အဖွဲ့အစည်းများအားလုံးပါဝင်ရေး၊ ပြည်နယ်အတွင်းရှိ ပြည်သူအားလုံးထံမှ အကြံဉာဏ်များ ရယူ ဆောင်ရွက်လိုပါကြောင်း ပြန်လည်ပြောကြားခဲ့သည်။

KNPP တပ်ဖွဲ့ဝင်များနှင့် အရပ်သားအသတ်ခံရမှုနှင့်ပတ်သက်၍ သတင်းထုတ်ပြန်ပေးရန်အတွက် ဒီဇင်ဘာလကတည်းက တပ်မတော်နှင့်KNPP အဖွဲ့ ပဋိပက္ခဖြစ်စဉ်အား NRPC သို့ တင်ပြခဲ့ရာ တပ်မတော်မှ စုံစမ်းစစ်ဆေးရေးခုံရုံး ဖွဲ့စည်းဆောင်ရွက်နေကာ စစ်ဆေးမှုရလဒ်ပေါ်မူတည်၍ အရေးယူဆောင်ရွက်မှုများလည်း လုပ်ဆောင်မည်ဟု သိရှိထားပြီး ပြည်နယ်အစိုးရအဖွဲ့အနေဖြင့်လည်း ၂၀၁၇ ခုနှစ် ဒီဇင်ဘာ(၁၉)ရက်နေ့တွင် အဆိုပါကိစ္စနှင့်ပတ်သက်၍ တပ်မတော်ခေါင်းဆောင်များ၊ KNPP ခေါင်းဆောင်များနှင့် တွေ့ဆုံဆွေးနွေးခြင်းတို့ကို ဆောင်ရွက်ထားကြောင်း ပြည်နယ်ဝန်ကြီးချုပ်က အသိပေး ရှင်းလင်းခဲ့သည်။

အဆိုပါ တွေ့ဆုံရှင်းလင်းပွဲသို့ ကယားပြည်နယ်အစိုးရအဖွဲ့ဝင်ဝန်ကြီးများ၊ ပြည်နယ်ဥပဒေချုပ်နှင့် အတွင်းရေးမှူး၊ တာဝန်ရှိသူများလည်း တက်ရောက်ခဲ့ကြောင်း သိရသည်။

သတင်း #ဆန်းဖြိုးထွန်း
ဓါတ်ပုံ #ပြည်နယ်အစိုးရအဖွဲ့