သတင္း #အင္မိုင္ခ

~~~~~~~~⊰❂ unicode ❂⊱~~~~~~~~

မိုင်းဖြတ်မြို့ကွက်သစ်စီမံကိန်းမှ မြေသိမ်းခံတောင်သူများ၏ သဘောထား ပြည်နယ်အစိုးရထံတင်ပြရန်စီစဉ်နေ
*********
ရှမ်းပြည်နယ်(အရှေ့ပိုင်း) တာချီလိတ်ခရိုင်၊ မိုင်းဖြတ်မြို့ရှိ မြို့ကွက်သစ်ဖေါ်ထုတ်ရေးစီမံကိန်းအတွက် သိမ်းဆည်း ခံလယ်ယာမြေများ၏ပိုင်ရှင် တောင်သူများ၏ လိုလားချက်များကို ဒီဇင်ဘာလ (၁)ရက်နေ့က တွေ့ဆုံဆွေးနွေး ရယူထားပြီးဖြစ်၍ ပြည်နယ်အစိုးရထံ ဆက်လက်တင်ပြသွားတော့မည်ဖြစ်ကြောင်း သိရသည်။

“ကော်မတီအစည်းအဝေးမှာ ချခဲ့တဲ့အတည်ပြုချက် (၅)ချက်ကို ဒေသခံ ကာယကံရှင်တွေကို သွားပြောပြီးတော့ ကာယကံရှင်တွေအနေနဲ့ ဘယ်လိုလုပ်ချင်တာလဲ၊ သူတို့ပေးထားတဲ့မြေတွေအတွက် စိုက်ပျိုးဖို့ အစားလိုချင်တာလား ဆိုတာ မေးတော့ သူတို့ကတော့ စိုက်ပျိုးမြေအစားယူဖို့တော့ အဆင်မပြေတော့ဘူး။ မြေကွက် အစားပြန်ရချင်တယ်လို့  ပြောလာတာ။ ဒါတွေကို သူတို့သဘောထားတွေကို ရှမ်းပြည်နယ်အစိုးရကို ပြန်တင်ပြဖို့ လုပ်နေတယ်”ဟု တာချီလိတ်ခရို်င်အုပ်ချုပ်ရေးမှူး ဦးတင်ဝင်းရွှေက တာချီလိတ်သတင်းအေဂျင်စီသို့ ပြောသည်။

မိုင်းဖြတ်မြို့၌ ၁၉၉၃ ခုနှစ်က မြို့ကွက်သစ်ဖော်ထုတ်ရာတွင် ပါဝင်သွားခဲ့သည့် လယ်ယာမြေများ ပြန်လည်ရရှိရေး အတွက် တောင်သူများမှ တင်ပြချက်အပေါ် ပြည်နယ်ကွင်းဆင်းစိစစ်ရေးအဖွဲ့၏ ညှိနှိုင်းအစည်းအဝေးပွဲကို နိုဝင်ဘာလ (၂၉) ရက်နေ့က  ကျင်းပခဲ့ပြီးနောက် အစည်းအဝေးဆုံးဖြတ်ချက်များနှင့်ပတ်သက်၍ ဒေသခံများ သဘောထားကို ဒီဇင်ဘာလ (၁)ရက်နေ့က ရယူခြင်းဖြစ်ကြောင်း သိရသည်။

“ဒါကို လုပ်ပေးမယ် မလုပ်ပေးဘူးဆိုတာတော့ မသိသေးဘူးပေါ့။ သူတို့သဘောထားကို တင်ပြမယ်။ ဟိုတစ်နေ့က အစည်းအဝေးမှာ အချက်(၅)ချက်ကို ဆွေးနွေးတယ်။  အဲဒီအချက်တွေကို ရှမ်းပြည်နယ်အစိုးရအဖွဲ့ကို တင်ပြမယ်လို့ ဆုံးဖြတ်တယ်။ အဲဒီအချက် (၅)ချက်ကို ဒေသခံလူထုကို ရှင်းပြတယ်။ သူတို့က မြေအစားပြန်လိုချင်တာလား။ စိုက်ပျိုးမြေလား။ မြေကွက်လားဆိုတာ သိဖို့သွားမေးတဲ့အခါ ဒီတောင်သူတွေကတော့ စိုက်ပျိုးမြေတော့ မလိုချင်ပါဘူး။ မြေကွက်ရရင်တော့ လိုချင်ပါတယ်ဆိုပြီးတော့ တစ်ဧကကို နှစ်ကွက်နှုန်းပေးပါဆိုပြီး တောင်းဆိုထားတယ်”ဟု တာချီလိတ်ခရို်င်အုပ်ချုပ်ရေးမှူး ဦးတင်ဝင်းရွှေက ပြောသည်။

အဆိုပါ မြေသိမ်းခံတောင်သူများတွင် အချို့က မြေယာလျော်ကြေးယူထားသော်လည်း လျော်ကြေးလုံးဝရယူထားခြင်း မရှိသူများလည်း ပါဝင်ကြောင်း သိရသည်။
အဆိုပါ မြေသိမ်းခံတောင်သူ (၁၂)ဦး၏ လယ်ယာမြေများအား မြေပြင်ကွင်းဆင်းစိစစ်ရေးအဖွဲ့က နိုဝင်ဘာလ (၂၈)ရက်နေ့တွင် ကွင်းဆင်းစစ်ဆေးပြီးနောက် နိုဝင်ဘာလ (၂၉)ရက်နေ့က တာချီလိတ်မြို့တွင် ညှိနှိုင်းအစည်းအဝေးကျင်းပရာ မိုင်းဖြတ်မြို့ မြို့ကွက်သစ်ဖော်ထုတ်ထားရှိသည့် မြေပြင်အခြေအနေများအား ယခင်မြို့ကွက်ဖော်ထုတ်ထားရှိမှုနှင့် လက်ရှိမြေပြင်အခြေအနေအား တိုင်းတာဆောင်ရွက်ရန်၊ တင်ပြထားရှိသည့်အတိုင်း ဂရန်ကျပြီး မြေကွက်၊ အဆောက်အဦဆောက်လုပ်ထားရှိသည့် မြေကွက်၊ ခြံစည်းရိုးကာရံထားသည့် မြေကွက်များနှင့် ခြံစည်းရိုး ကာရံထားခြင်းမရှိသေးသည့် မြေကွက်စာရင်းများအား တင်ပြထားရှိသည့်အတိုင်း အတည်ပြုရန်၊ ကော်လိတ္တော်အရာရှိ - ခရိုင်အုပ်ချုပ်ရေးမှူးက မြို့ကွက်သစ် ဖော်ထုတ်ထားရှိသည့်မြေနေရာများအား စည်းကမ်းချက်နှင့်အညီ ဆောင်ရွက်သွားရန်၊ စည်းကမ်းနှင့် ကိုက်ညီမှု မရှိသည့်မြေကွက်များအား မြေယာဥပဒေနှင့်အညီ အရေးယူဆောင်ရွက်ရေး နို့တစ်စာကြော်ငြာထုတ်ပြန်ရန်၊ မြို့မြေအဖြစ် သတ်မှတ်ထားရှိပြီး မြေပေးမိန့်များ ထုတ်ပေးထားသည့် မြေနေရာများနှင့် ပတ်သက်၍ စည်းကမ်းချက်များနှင့်မညီညွတ်သည့် မြေများအား နိုင်ငံတော်မှ စီမံခန့်ခွဲပိုင်ခွင့်ရှိသည့် မြေအဖြစ် သတ်မှတ်နိုင်ရေး ဆောင်ရွက်ရန်၊ တောင်သူများ၏ လိုလားချက်များအား ဒေသလွှတ်တော်ကိုယ်စားလှယ်များ၊ ခရိုင်နှင့်မြို့နယ်စီမံခန့်ခွဲမှုကော်မတီများနှင့် ညှိနှိုင်းတိုင်ပင် ဆွေးနွေး၍ သဘောထားရယူဆောင်ရွက်ရန် တို့ကို ဆွေးနွေးအတည်ပြုခဲ့ခြင်းဖြစ်ကြောင်း သိရသည်။

မြေပြင်ကွင်းဆင်းစိစစ်ရေးအဖွဲ့တွင် ရှမ်းပြည်နယ် အစိုးအရအဖွဲ့ဝင် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ပြည်နယ်ဝန်ကြီး ဦးစ်ုိင်းလုံကျော်က အဖွဲ့ခေါင်းဆောင်အဖြစ် တာဝန်ယူထားခြင်းဖြစ်ကြောင်း သိရသည်။