~~~~~~~~⊰❂ unicode ❂⊱~~~~~~~~

ထိုင်းနိုင်ငံမှ ဆုကြေးထုတ်ထားသည့် မူးယစ်တရားခံပြေးအား တာချီလိတ်တွင် ဖမ်းဆီးရမိ
***********
ရှမ်းပြည်နယ်(အရှေ့ပိုင်း) တာချီလိတ်မြို့တွင် နိုဝင်ဘာလ (၂၄)ရက်နေ့က မူးယစ်ဆေးဝါး၊ မူးယစ်ဆေးဝါးထုတ်လုပ်သည့်စက်၊ လက်နက်တို့နှင့်အတူ  ဖမ်းဆီးရမိသည့် အမျိုးသားနှစ်ဦးအနက် မြန်မာနိုင်ငံသားမှတ်ပုံတင်ကိုင်ဆောင်ထားသူသည် ထိုင်းနိုင်ငံမှ ဆုကြေးထုတ်ထားသည့် မူးယစ်တရားခံပြေးဖြစ်ကြောင်း သိရသည်။

ဖမ်းဆီးရမိသူနှစ်ဦးအနက် မြန်မာနိုင်ငံသားမှတ်ပုံတင်ကိုင်ဆောင်ထားသည့် အားချူဆိုသူသည် ၂၀၀၈ ခုနှစ် ဇူလိုင်လ(၂၅) ရက်နေ့က ထိုင်းနိုင်ငံ၊ လင်းဖွန်းခရိုင်၊ ထူဟိုချန်းမြို့နယ်၊ တခေးပုန်း အမှတ်(၁)ရပ်ကွက်တွင် စိတ်ကြွ ရူးသွပ်ဆေးပြား (၆၀၀၀၀)ဖမ်းဆီးရမိမှုနှင့်  ပတ်သက်၍ ခရိုင်တရားရုံးအမှတ် ၁၁၀/၂၀၀၈ ဖြင့် ထိုင်းနိုင်ငံမှ ဆုငွေ ဘတ်တစ်သိန်း ကြေညာထားသည့် တရားခံပြေး စရာရွတ်ကေစရီနီရတ် (Sarayuth Ketsarinnirat) ဖြစ်ကြောင်း သိရှိရပြီး ဖမ်းဆီးရမိတရားခံများကို မြန်မာနိုင်ငံ၏ တည်ဆဲဥပဒေ နှင့်အညီ အရေးယူဆောင်ရွက်သွားမည်ဖြစ်ကြောင်း သိရသည်။

တာချီလိတ်မြို့ မယ်ခေါင်ရပ်ကွက်တွင် နေထိုင်သည့်လိပ်စာဖြင့် မြန်မာနိုင်ငံသားမှတ်ပုံတင်ကိုင်ဆောင်ထားသည့် အားချူနှင့် မယ်ဆိုင်မြို့၊ ဆီမုန်းချွန်းရပ်ကွက်တွင် နေထိုင်သည့် ကိုင်(ခ) Prasan တို့အား တာချီလိတ်မြို့မရဲစခန်းတွင် နိုဝင်ဘာလ (၂၄)ရက်နေ့က မယ(ပ)၇၄/၂၀၁၇၊ မူး/စိတ်ပုဒ်မ ၁၅/၁၆(ခ)/၁၉(က)/၂၀(က)/၂၂(ခ)/၂၁ အရ အမှုဖွင့်ထားခြင်းဖြစ်ပြီး ဆက်စပ်ဥပဒေများဖြင့်ပါ အမှုဖွင့် အရေးယူနိုင်ရန် ဆောင်ရွက်နေခြင်းဖြစ်ကြောင်း သိရသည်။

သတင်း #စိုင်းဇေယျာ