~~~~~~~~⊰❂ unicode ❂⊱~~~~~~~~

နမ့်ဆန်မြို့နယ် မန်လွယ်ကျေးရွာမှ အမျိုးသမီးတစ်ဦး လက်ဖက်ခြံမှအပြန် မိုင်းနင်းမိ၍ သေဆုံး
**************
ရှမ်းပြည်နယ်(မြောက်ပိုင်း) နမ့်ဆန်မြို့နယ် အထက်မန်လွယ်ကျေးရွာအနီးတွင် အောက်တိုဘာလ (၂၀) ရက်နေ့ နံနက်က လက်ဖက်စိုက်ခင်းမှအပြန် မိုင်းနင်းမိသည့် ဒေသခံအမျိုးသမီးတစ်ဦးအား လားရှိုးဆေးရုံသို့ ပို့ဆောင်စဉ် သေဆုံးသွားကြောင်း သိရသည်။

လက်ဖက်စိုက်ခင်းမှ ပြန်လာသည့် အသက် (၂၀)အရွယ် မအီနာင်သည် နံနက် (၈)နာရီခွဲခန့်တွင် မိုင်းနင်းမိသဖြင့် ရွာသို့သယ်ဆောင်လာပြီး နေ့လယ် (၁၂)နာရီကျော်ကျော်တွင် လားရှိုးပြည်သူ့ဆေးရုံသို့ ပို့ဆောင်နေစဉ် သေဆုံးသွားခြင်းဖြစ်ကြောင်း သိရသည်။

“အဲဒီ ဒီကောင်မလေးက လက်ဖက်ခြံကနေပြန်လာတာ။ ရန်ကင်းတောင်ဘုရားနားရောက်တော့ မိုင်းနင်းမိတယ်။ ခြေထောက်တွေ ဆိုးဆိုးဝါးဝါး ဒဏ်ရာရတယ်။ ကျေးရွာကိုသယ်လာပြီး နေ့လယ် (၁၂) နာရီလောက်မှာ လားရှိုးကိုပို့နေတုန်း လမ်းခုလတ်မှာ သေဆုံးသွားတဲ့အတွက် ကျေးရွာကို ပြန်သယ်လာခဲ့ရပါတယ်”ဟု မန်လွယ်(အထက်)ကျေးရွာ အုပ်ချုပ်ရေးမှူး ဦးသိန်းထိုက်ဇော်က တာချီလိတ် သတင်းအေဂျင်စီသို့ ပြောသည်။

မိုင်းနင်းမိသူအား ကျေးရွာမှသူနာပြုအကူအညီဖြင့် အရေးပေါ်ကူညီမှုများ လုပ်ဆောင်ပေးခဲ့ပြီး လားရှိုးပြည်သူ့ဆေးရုံသို့ ပို့ဆောင်ခဲ့ခြင်းဖြစ်ကြောင်း သိရသည်။
“ရွာမှာရှိတဲ့နာ့စ်မတစ်ယောက် အကူအညီနဲ့ ပတ်တီးစည်း၊ အကိုက်အခဲပျောက်ဆေးထိုးပေး၊ မေးခိုင်ကာကွယ် ဆေးထိုးပေးနဲ့တော့ လုပ်ပေးပါတယ်။ ကလေးမက ငယ်လည်းငယ်တော့ ကြောက်လန့်နေတာပေါ့”ဟု မာန်လွယ်ကျေးရွာမှ ဆရာတော် ဦးသောဘိတက မိန့်သည်။

မန်လွယ်ကျေးရွာအနီးတွင် မြေမြုပ်မိုင်းနင်းမိမှုများ မကြာခဏဖြစ်ပွားနေပြီး အောက်တိုဘာလ (၁၉) ရက်နေ့ ညနေ(၃)နာရီခန့်ကလည်း မန်လွယ်(အထက်)ကျေးရွာအနီး လုံးတောက်လမ်းခွဲအနီးတွင် နွားတစ်ကောင်မိုင်းထိကာ သေဆုံးခဲ့ကြောင်း သိရသည်။

သတင်း #နေဖြိုးမြင့်
ဓါတ်ပုံ #MSK