~~~~~~~~⊰❂ unicode ❂⊱~~~~~~~~

ရှမ်းပြည်နယ်(အရှေ့ပိုင်း)၊ တာချီလိတ်ခရိုင်၊ မိုင်းဖြတ်မြို့နယ်တွင် လူနေမှု ဒေသအခြေအနေများနှင့် ဒေသအချက်အလက်များအား သိရှိစေရန်အတွက် (၂)ရက်တာ ကျင်းပပြုလုပ်မည့် မြို့နယ်အဆင့် သန်းခေါင်စာရင်းဆိုင်ရာ အချက်အလက်များ အသိပညာပေးပွဲကို အောက်တိုဘာလ(၁၆)ရက်နေ့ နံနက်ပိုင်းကစတင်၍ မိုင်းဖြတ်မြို့နယ်အထွေထွေအုပ်ချုပ်ရေးဦးစီးဌာနရှိ အစည်းအေဝးခန်းမတွင် ကျင်းပပြုလုပ်ကြောင်း သိရသည်။

“အဓိက ရည်ရွယ်ချက်ကတော့ ကိုယ့်မြို့ ကိုယ့်ဒေသမှာ လူဦးရေ ဘယ်လောက်ရှိခဲ့တယ်၊ ဘယ်လို နေထိုင် လုပ်ကိုင် စားသောက်နေတယ်၊ လူမှုရေး၊ စီးပွားရေး၊ အချက်အလက်တွေကို မှန်မှန်ကန်ကန် မသိခဲ့တဲ့အတွက် ကျယ်ကျယ်ပြန့်ပြန့် သိရှိစေလိုတဲ့ ရည်ရွယ်ချက် ဖြစ်ပါတယ် ” ဟု ကျိုင်းတုံခရိုင်မှ ဒုတိယခရိုင်ဦးစီးမှူး လ/ထညွှန်ကြား ရေးမှူး ဦးလှဝင်းမောင် (သင်တန်းအထူးနည်းပြ)က တာချီလိတ်သတင်းအေဂျင်စီသို့ ပြောသည်။

ဖွင့်ပွဲ အခမ်းအနားသို့ ပြည်သူ့လွှတ်တော်ကိုယ်စားလှယ် ဦးလင်းဇော်ထွန်း၊ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်သူ့အင်အားဦးစီးဌာန မှ ဒုတိယညွှန်ကြားရေးမှူး ဒေါ်ယဉ်ယဉ်ကြိုင်၊ ရှမ်းပြည်နယ်(အရှေ့ပိုင်း) ခေတ္တဒုတိယပြည် နယ်ဦးစီးမှူး ဒုတိယညွှန်ကြားရေးမှူး ဦးရဲရင့်ထွန်း၊ တာချီလိတ်ခရိုင်ဦးစီးမှူး ဒုတိယညွှန်ကြားရေးမှူး ဦးကျော်မော်ထွန်း၊ ကျိုင်းတုံခရိုင်၊ ဒုခရိုင်မှူး လက်ထောက်ညွှန်ကြားရေးမှူး ဦးလှဝင်းမောင်၊ မိုင်းဖြတ်မြို့နယ်အုပ်ချုပ်ရေးမှူး ဦးစိုးလှိုင် နှင့် ဌာနဆိုင်ရာအကြီးအကဲများ မိုင်းဖြတ်မြို့နယ်ဦးစီးမှူး ဦးစီးအရာရှိ ဦးမြင့်ဌေး နှင့် ဝန်ထမ်းများ၊ ဒါန-ရှေ့ဆောင်မြန်မာပြည်တွင်း အရပ်ဖက် အဖွဲ့အစည်း မှ ဦးစိုင်းဝင်းအောင် (Trainner and Editor ) နှင့် ဆွေးနွေးပွဲတွင် တက်ရောက်ဆွေးနွေးမည့် သူများ တက်ရောက်ခဲ့ကြကြောင်း သိရှိရပါသည်။

မြို့နယ်အဆင့် သန်းခေါင်စာရင်းဆိုင်ရာ အချက်အလက်များ အသိပညာပေးပွဲအား ၂၀၁၇ခုနှစ် အောက်တိုဘာလ(၁၇)ရက်နေ့အထိ ကျင်းပပြုလုပ်သွားမည်ဖြစ်ကြောင်း သိရှိရသည်။

သတင်း/ဓာတ်ပုံ - #ကိုသာ