မူဆယ်တွင် မိုးသည်းထန်မှုကြောင့်မြေပြို၍ တစ်ဦးသေ၊ သုံးဦးဒဏ်ရာရ
*************
မိုးသည်းထန်စွာရွာသွန်းမှုကြောင့် ရှမ်းပြည်နယ်မြောက်ပိုင်း မူဆယ်ခရိုင် မူဆယ်မြို့ ဟိုမွန်ရပ်ကွက် (၄၅-ကုန်း) နယ်မြေ (၁၇) ရှိ နေအိမ်တစ်လုံး ဇွန်လ(၂) ရက်နေ့ နံနက်အစောပိုင်းတွင် ပြိုကျကာ လူတစ်ဦး သေဆုံးပြီး သုံးဦးဒဏ်ရာရသွားကြောင်း သိရသည်။
“ ဒီမနက်အစောပိုင်းက မိုးအရမ်းရွာလို့ လူနေရပ်ကွက်တစ်ခုထဲမှာ မြေပြိုတယ်။ နေအိမ်တစ်လုံးပြိုကျခဲ့တယ်။ အသက်(၁၇)နှစ်အရွယ် အမျိုးသမီးတစ်ဦး သေဆုံးသွားတယ်။ သုံးဦးဒဏ်ရာရ ထားတယ်။ နေအိမ်ကတော့ အိမ်ခန်းနှစ်ခန်းပါတဲ့ နေအိမ်တစ်လုံးပဲ မိုးရွာလို့မြေစိုစွတ်ပြီး ပြိုကျသွားတာ ဖြစ်ပါတယ်” ဟု မူဆယ်မြို့ ဂရုဏာလူမှုကူညီရေးအသင်းမှ ဥက္ကဌ ဦးသောင်းထွန်းက တာချီလိတ်သတင်းအေဂျင်စီသို့ ပြောသည်။
နံနက်(၇)နာရီခန့်တွင် နေအိမ်ပြိုကျသွား၍ သေဆုံးသွားသည့် အမျိုးသမီး တစ်ဦးနှင့် ဒဏ်ရာရရှိထားသူသုံးဦးအား မူဆယ်မြို့ ပြည်သူ့ ဆေးရုံသို့ ပို့ဆောင်ထားပြီး ဒဏ်ရာရရှိထားသူများအတွက် လိုအပ်သည့်ပစ္စည်းများ၊ အဝတ်အစားများ အား မူဆယ်မြို့ ဂရုဏာလူမှုကူညီရေးအသင်းမှ အကူအညီပေးနေကြောင်း သိရသည်။
“ဒဏ်ရာရထားတဲ့သူတွေကို ဆေးရုံကိုပို့ပေးနေတယ်။ အခင်းဖြစ်တဲ့နေရာကိုလည်း သွားပြီးစစ်ဆေးနေပါတယ်။ အခုလည်းမိုးတွေအရမ်းရွာနေတယ်။ အပြည့်အစုံတောင်မသိရသေးဘူး။ တစ်ဦးသေ၊ သုံးဦး ဒါဏ်ရာရထားတယ်။ နေအိမ်တစ်လုံး ပြိုကျသွားတယ်။ အဲဒီလောက်ပဲသိရသေးတယ်” ဟု မူဆယ်မြို့မရဲစခန်းမှ တာဝန်မှူးရဲအရာရှိတစ်ဦးက ပြောသည်။
ဇွန်လ(၁) ရက်နေ့ ညပိုင်းမှစ၍ ရှမ်းပြည်နယ်မြောက်ပိုင်း မူဆယ်မြို့နယ်အတွင်း မိုးသည်းထန်စွာရွာသွန်းခဲ့ပြီး ဇွန်လ(၂) ရက် နံနက်ပိုင်းတွင် လူနေရပ်ကွက်တစ်ခုအတွင်း မြေပြိုမှုတစ်ခုဖြစ်ပွားခဲ့ရာမှ နေအိမ်တစ်လုံး ပြိုကျခဲ့ခြင်းဖြစ်ပြီး ယခုကဲ့သို့ဖြစ်ရပ်မျိုး ယခင်က ဖြစ်ပွားခဲ့ဖူးခြင်းမရှိကြောင်း ရဲအရာရှိထံမှ သိရသည်။

သတင်း #နေဖြိုးမြင့်
ဓါတ်ပုံ #ဦးသောင်းထွန်း