~~~~~~~~⊰❂ unicode ❂⊱~~~~~~~~

မြန်မာ - ထိုင်းနယ်စပ် တာချီလိတ် - မယ်ဆိုင် အကြားရှိ မယ်ဆိုင်ချောင်း၏ ထိုင်းဘက်အခြမ်း ရေထဲတွင် စိတ်မနှံ့သူ မြန်မာနိုင်ငံသား အမျိုးသားတစ်ဦး သေဆုံးနေသည့်အတွက် မြန်မာ - ထိုင်း
လူမှုရေးအသင်း အဖွဲ့တို့မှ မေလ(၉)ရက်နေ့ နံနက်(၁၁)နာရီဝန်းကျင်က ဆယ်ယူကာ မယ်ဆိုင်တွင် အလောင်းအား ထားရှိ ထားကြောင်း သိရသည်။

သေဆုံးနေသူမှာ တာချီလိတ်မြို့ ပုန်းထွန်ရပ်ကွက်တွင် နေထိုင်သူ ဖြစ်ပြီး အသက်(၃၅)နှစ်ဝန်းကျင်ရှိ စိတ်မနှံ့သူဖြစ်ကြောင်း နှင့်၎င်း၏ အမည်မှာ အားစူဖြစ်ကြောင်း
တာချီလိတ်နာရေး ကူညီမှုအသင်းမှ သိရသည်။

"အလောင်းက ရေထဲမှာ မှောက်နေတော့ မသိသေးဘူး။ ဆယ်ပြီးတဲ့အချိန်မှာ မျက်နှာကြည့်လိုက်တော့ ကျွန်တော်တို့ ရပ်ကွက်ထဲက ဖြစ်နေတယ်။ နာမည်က အားစူလို့ ခေါ်တယ်၊ သူက စိတ်မနှံ့ဘူး၊ ရပ်ကွက်ထဲမှာ ပတ်သွားနေတာ။"ဟု တာချီလိတ်နာရေးကူညီမှုအသင်း ဥက္ကဌ ဦးလှမိုးက တာချီလိတ်သတင်းအေဂျင်စီသို့ ပြောသည်။

သေဆုံးနေသည့် အလောင်းမှာ နယ်စပ်ချောင်း၏ ထိုင်းဘက်အခြမ်းတွင် ဖြစ်နေ၍ ထိုင်းဘက်မှ တာဝန်ရှိသူများက လာရောက် စစ်ဆေးခဲ့ကြပြီး မယ်ဆိုင်ရှိ ထိုင်းလူမှု ကယ်ဆယ်ရေးအဖွဲ့နှင့် တာချီလိတ်နာရေးကူညီမှုအသင်းတို့မှ ပူးပေါင်းကာ ဆယ်ယူခဲ့ကာ အလောင်းအား မယ်ဆိုင်တွင် (၅)ရက်ထားရှိပေးထားမှာ ဖြစ်ကြောင်း နှင့် သေဆုံးသူ မိသားစုမှ မရောက်ရှိလာပါက၎င်းတို့၏ အစီအစဉ်ဖြင့် သင်္ဂြိုဟ် ပေးသွားမှာ ဖြစ်ကြောင်း သိရသည်။

"ထိုင်းဘက်ကတော့ ပြောလာတာက သေဆုံးသူရဲ့ မိသားစုတွေ လာရောက်ဆက်သွယ်နိုင်ရန်အတွက် မယ်ဆိုင်မှာ (၅)ရက် ထားပေးထားမယ်ပြောတယ်။ မိသားစုတွေက မဆက်သွယ်လာဘူးဆိုရင်တော့ သင်္ဂြိုဟ်ပေးသွားမယ်လို့ ပြောလာပါတယ်"ဟု တာချီလိတ်နာရေးကူညီမှုအသင်း ဥက္ကဌ ဦးလှမိုးက ပြောသည်။

သေဆုံးသူနှင့် ပတ်သက်၍ သေဆုံးရခြင်းမှာ မည်သည့်အကြောင်းအရာကြောင့် သေဆုံးခြင်းကို မသိရှိရသေးကြောင်း သိရသည်။

သတင်း - ကိုဇောင်း
ဓာတ်ပုံ - ဇောင်းညီ၊ တာချီလိတ်နာရေးကူညီမှုအသင်း