ရှမ်းပြည်နယ်တောင်ပိုင်း တောင်ကြီးမြို့သင်္ကြန်ကာလအတွင်း ယာဉ်စည်းကမ်းထိန်းသိမ်းရေးအတွက် တပ်ဖွဲ့ဝင်အင်အားကို ယခင်နှစ်ထက် တပ်ဖွဲ့ဝင်ဦးရေ (၂၀) ဦးထပ်တိုးထားပြီး ယာဉ်စည်းကမ်းထိန်းသိမ်းရေး ပညာပေးလုပ်ငန်းများကို လုပ်ဆောင်နေကြောင်း သိရသည်။

“ သင်္ကြန်မတိုင်ခင်အထိ သတိပေးနှိုးဆော်ချက်စာစောင်တွေ ဝေသွားမယ်။ လူစည်ကားတဲ့နေရာတွေမှာ ဗီနိုင်းနဲ့ ကြေငြာသွားမယ်။ လမ်းကြောပိတ်ဆို့ပြီး လမ်းလွဲတွေလုပ်တာတော့ မရှိပါဘူး။ သင်္ကြန်ရောက်ခါနီး ဆိုရင် ညဘက်အသံပေးနှိုးဆော်ချက်တွေနဲ့ ဆိုင်ကယ်တွေမှာ ရောက်ပြန်စတေကာတွေ တပ်ဆင် ပေးသွားမှာပါ” ဟု အမှတ် (၁၈)ယာဉ်ထိန်းရဲ ဒုတပ်ဖွဲ့ခွဲ( ရှမ်းတောင် ) မှ ရဲမှူးမျိုးဇော်အောင်က ပြောသည်။

တောင်ကြီးသင်္ကြန်တွင် မတ်လ(၃၀)ရက်နေ့အထိ ဗဟိုမဏ္ဍပ်တစ်ခုမှလွဲ၍ ခွင့်ပြုချက်တင်လာသည့် မဏ္ဍပ်မရှိသေးကြောင်း တောင်ကြီးမြို့နယ်စည်ပင်သာယာရေးဌာနမှ သိရသည်။

“မြကန်သာပန်းခြံကနေပြီးတော့ တောင်ကြီးအဆိုတော်တွေခေါ်ပြီး မဏ္ဍပ်လုပ်မယ်လို့တော့ ပြောထားတယ်။ စာရင်းတော့ အသေအချာလာမတင်ထားသေးဘူး။ ပြောတော့ပြောထားပါတယ်။ မဏ္ဍပ်အကြီးကတော့ အစိုး ရကလုပ်တဲ့ ဗဟိုမဏ္ဍပ်က မြို့မစျေးဘေးမှာ အရင်နှစ်တွေအတိုင်းပါပဲ။ တောင်ကြီးမှာက ရန်ကုန်ကလို စီးပွားဖြစ်မဏ္ဍပ်တွေ ထားတာမရှိဘူး။ သင်္ကြန်မှာတော့ အစိုးရအဖွဲ့တွေနဲ့ မနှစ်ကအတိုင်းပဲ ညောင်ရွှေ နဒီကန်မှာ ငါးလွှတ်ပွဲလုပ်မှာပါ။ မနှစ်ကလိုပါပဲ။ ဗဟိုမဏ္ဍပ် တစ်ခုပဲရှိတယ်” ဟု တောင်ကြီး မြို့နယ်စည်ပင်သာယာရေးဌာန အမှုဆောင်အရာရှိ ဦးအေးကိုက ပြောသည်။

တောင်ကြီးမြို့သင်္ကြန်ကာလတွင် ယာဉ်ထိန်းတပ်ဖွဲ့က ယခင်နှစ်ထက် အင်အား (၂၀) ဦးထပ်တိုးပြီး စုစုပေါင်း အင်အား(၉၂)ဦးဖြင့် ယာဉ်စည်းကမ်းထိန်းသိမ်းရေး ကြပ်မတ်သွားမည်ဖြစ်ကြောင်း သိရသည်။

သတင်း၊ဓါတ်ပုံ #နိုနို