ကျေးလက်ဒေသဖွံ့ဖြိုးရေးနှင့် ဆင်းရဲနွမ်းပါးမှု လျှော့ချရေးလုပ်ငန်း မြစိမ်းရောင်စီမံကိန်း အစီအစဉ်ဖြင့် တာချီလိတ်မြို့နယ် အတွင်း ကျေးရွာပေါင်း(၁၂)ရွာအား ကျေးလက်ဦးစီးဌာနမှ ကျပ်သိန်း(၃,၃၀၀) ချပေးလိုက်ကြောင်း သိရသည်။

 ဇူလိုင်လ (၂၆)ရက်နေ့က ပြုလုပ်ခဲ့သည့် ရှမ်းပြည်နယ်ဝန်ကြီးချုပ် နှင့် ဝန်ကြီးများ၏ တာချီလိတ် လူထုတွေ့ဆုံပွဲတွင် ကျေးလက်ဦးစီးဌာနမှ ကျေးရွာ(၁၁)ရွာအတွက် မြစိမ်းရောင်စီမံကိန်းဖြင့် ပေးအပ်လိုက်ခြင်း ဖြစ်သည်။

"ကျေးလက်ဦးစီးဌာနမှာပါတဲ့ မြစိမ်းရောင် ကျေးရွာများ ဝင်ငွေတိုးပွားရေး၊ ဆင်းရဲမှုလျှော့ချရေး စတဲ့ မိမိရွာအလိုက် ဆောင်ရွက်နိုင်မယ့် လုပ်ငန်းစဉ်တွေလည်း ပါ ပါတယ်။ ဒီဟာလည်း ဒီနေ့ အခမ်းအနားမှာ ပေးအပ်သွားမှာဖြစ်ပါတယ်။ တာချီလိတ်မှာ (၁၁)ယူနစ်နဲ့ ကျေးရွာပေါင်း(၁၂)ရွာ ရပါတယ်။
ဒီရွာတွေကိုလည်း နှစ်စဉ် အရင်းမပျောက် မတည်ငွေတွေနဲ့ တည်ထောင်ပေးပြီးတော့ ဒီကျေးရွာကနေ စုပေါင်းလုပ်တတ်တဲ့ အလေ့အထတွေ ဒီငွေတွေကို တိုးပွားအောင်ဆောင်ရွက်ပြီး မိမိရပ်ရွာတွေကို ဖွံ့ဖြိုးတိုးတက်အောင် ဆောင်ရွက်တဲ့လုပ်ငန်းစဉ်လည်း ဖြစ်ပါတယ်။"ဟု ပြည်နယ် စိုက်ပျိုးရေးနှင့် မွေးမြူရေးဝန်ကြီး ဦးစိုင်းလုံကျောက် က ပြောသည်။

ကျေးလက်ဦးစီးဌာနမှ မြစိမ်းရောင်စီမံကိန်းဖြင့် တာချီလိတ်မြို့နယ်အတွင်းရှိ မိုင်းကိုးကျေးရွာအုပ်စုမှ၊ ဖန်မင်ကျေးရွာအုပ်စု၊ လွယ်တော်ခမ်းကျေးရွာအုပ်စု၊ တာလမြေို့ရှိ ကျေးရွာများ၊ မိုင်းဖုန်း(က)-(ခ)ကျေးရွာအုပ်စု နှင့် မိုင်းဟဲကျေးရွာအုပ်စုတို့မှ ကျေးရွာ (၁၂)ရွာတို့ကို ပေးအပ်ခဲ့ခြင်းဖြစ်ကြောင်း သိရသည်။

မွေးမြူရေး၊ ရေလုပ်ငန်းနှင့် ကျေးလက်ဒေသဖွံ့ဖြိုးရေးဦးစီးဌာနမှ တာချီလိတ်ခရိုင်အတွင်း ကျေးရွာပေါင်း (၇၂)ရွာအား ကျပ်သန်းပေါင်း (၁,၇၄၀) ချပေးခဲ့ရာ ၂၀၁၆ ခုနှစ်အကုန်တွင် အရင်းမပျောက် အတိုးနှုန်း(၁၅၅.၇၈၀)သန်း ရရှိခဲ့ပြီဖြစ်ပြီး၊ လာမည့် ဘဏ္ဍာနှစ်တွင် ကျေးရွာပေါင်း(၂၂) ရွာအား မြစိမ်းရောင် စီမံကိန်းချေးငွေများ ဆက်လက်ရရှိရန် တောင်းခံထားကြောင်း သိရသည်။

သတင်း - ဇောင်းညီ