~~~~~~~~⊰❂ unicode ❂⊱~~~~~~~~

ထမ့်လွမ်ဂူအတွင်းက ရေတပ်အထူးအဖွဲ့ ကလေးများ ပြန်ခေါ်ထုတ်နိုင်ရန် လမ်းကြောင်းစီစဉ်နေ
********
ထိုင်းနိုင်ငံ၊ ချင်းရိုင်းခရိုင်၊ မယ်ဆိုင်မြို့ ထမ့်လွမ်ဂူအတွင်းရှိ ရေတပ်အထူးအဖွဲ့က ဇူလိုင်လ (၂)ရက်နေ့ညတွင် ဂူအတွင်း ဖတ္တယားကမ်းခြေအနီး ကလေးများကိုပြန်လည်တွေ့ရှိပြီးနောက် ရေလွှမ်းနေသည့် ဂူအတွင်းလမ်းကြောင်းမှ အပြင်သို့ခေါ်ထုတ်နိုင်ရန် လမ်းကြောင်းစီစဉ်နေကြပြီဖြစ်ကြောင်း ထိုင်းရေတပ်အဖွဲ့ သတင်းထုတ်ပြန်ချက်အရ သိရသည်။

၎င်းတို့အား တွေ့ရှိသည့်နေရာနှင့် ဂူပေါက်ဝမှာ (၅)ကီလိုမီတာဝန်းကျင်ရှိပြီး ရေနစ်မြုပ်နေဆဲဖြစ်သည့် နေရာများလည်းရှိနေခြင်းဖြစ်သည်။

ရေတပ်အထူးအဖွဲ့သည် ထိုင်းစံတော်ချိန် ည(၁၀)နာရီဝန်းကျင်တွင် ကလေးများအား ရှာတွေ့ခဲ့ပြီးနောက် အရေးပေါ်ကုသမှုအတွက် လိုအပ်သည့်ပစ္စည်းများနှင့် ဆရာဝန်အဖွဲ့အား ပို့ဆောင်ထားခဲ့ပြီး အဆိုပါ ဆရာဝန်အဖွဲ့သည် ကလေးများအား ပြန်လည်ခေါ်ထုတ်ချိန်အထိ ကလေးများနှင့်အတူ ရှိနေမည်ဖြစ်ကြောင်း သိရသည်။

ထမ့်လွမ်ဂူအတွင်း ဇွန်လ (၂၃)ရက်နေ့ကတည်းက ပိတ်မိနေကြသည့် ဘောလုံးအသင်းမှ ကျောင်းသား (၁၂)ဦးနဲ့ နည်းပြ(၁)ဦးတို့အား ထိုင်းစစ်တပ်နှင့် သက်ဆိုင်ရာအဖွဲ့များ၊ နိုင်ငံတကာကူညီသည့်အဖွဲ့များ ပူးပေါင်းရှာဖွေမှု (၁၀)ရက်မြောက်နေ့တွင် ပြန်လည်တွေ့ရှိခဲ့ခြင်းဖြစ်သည်။

သတင်း #Tachileik News Agency
ဓါတ်ပုံ #ThainavySEAL