ရှမ်းပြည်နယ်တွင်း တရုတ်အာလူး တရားမဝင်တင်သွင်းမှု ပြည်နယ်အစိုးရ တားဆီးမည်
****************
ရှမ်းပြည်နယ်နှင့် တရုတ်နိုင်ငံနယ်စပ်မှ တရုတ်အာလူးများ တရားမဝင်တင်သွင်းနေမှုကို တားဆီးပေးသွားမည်ဖြစ်ပြီး ဒေသတွင်းတောင်သူများအတွက် စိုက်ပျိုးရေးသွင်းအားစုများ ပံ့ပိုးပေးရေး ကူညီပေးသွားမည်ဖြစ်ကြောင်း ပြည်နယ်အစိုးရအဖွဲ့ဝင်  စီမံကိန်းနှင့် စီးပွားရေးဝန်ကြီး ဦးစိုးညွန့်လွင်က တောင်သူများအား ပြောကြားလိုက်သည်။

တရုတ်နိုင်ငံမှ အာလူးများ တရားမဝင်တင်သွင်းမှုကြောင့် ဒေသတွင်း အာလူးစိုက်တောင်သူများ အရှုံးပေါ်နေသဖြင့် ပြည်နယ်အစိုးရထံ တင်ပြလာရာ ရှမ်းပြည်နယ်(တောင်ပိုင်း) တောင်ကြီးမြို့ရှိ ရှမ်းပြည်နယ်အစိုးရအဖွဲ့ စီမံကိန်းနှင့် စီးပွားရေးဝန်ကြီးရုံးခန်း အစည်းအဝေးခန်းမတွင် ရှမ်းပြည်နယ်အစိုးရအဖွဲ့နှင့် ဟဲဟိုးအာလူးအစုအဖွဲ့မှ အာလူးစိုက်တောင်သူများ ၂၀၁၈ ခုနှစ် မေလ (၂၅)ရက်နေ့၌ တွေ့ဆုံဆွေးနွေးခဲ့ကြခြင်းဖြစ်ကြောင်း သိရသည်။

တောင်သူများ၏ တင်ပြချက်အရ ပြည်နယ်အစိုးရအနေဖြင့် နယ်စပ်မှ တရားမဝင် အာလူးတင်သွင်းနေမှုများအား တားဆီးသွားမည့်အပြင် ဒေသတွင်း အာလူးစိုက်တောင်သူများအနေဖြင့် မျိုးကောင်းမျိုးသန့်ရရှိရေး၊ SME ချေးငွေများ ပိုမိုရရှိရေး၊ လယ်ယာသုံးစက်ကိရိယာများ အရစ်ကျစနစ်ဖြင့် ဝယ်ယူခွင့်ရရှိရေးတို့ကို ပြည်နယ်အစိုးရအနေဖြင့် ကူညီပေးသွားမည်ဖြစ်ပြီး တရုတ်အစိုးရနှင့် အစိုးရအဆင့်ဆွေးနွေးမှုများ လုပ်ဆောင်ပေးသွားမည်ဖြစ်ကြောင်း ပြည်နယ်အစိုးရအဖွဲ့ဝင်  စီမံကိန်းနှင့် စီးပွားရေးဝန်ကြီး ဦးစိုးညွန့်လွင်က အဆိုပါဆွေးနွေးပွဲတွင် ပြောကြားခဲ့သည်။

ဒေသတွင်း စိုက်ပျိုးမြေများအခြေအနေကို စိုက်ပျိုးရေးဦးစီးဌာနမှ စစ်ဆေးပေးရန် အာလူးစိုက်တောင်သူများက ပြည်နယ်အစိုးရထံ တင်ပြတောင်းဆိုထားပြီး ဒေသတွင်း စိုက်ပျိုးရေးကဏ္ဍကို ထိခိုက်စေသည့် ရှမ်းပြည်နယ်တွင်း စိုက်ပျိုးရေးသုံး ဓါတ်မြေသြဇာနှင့် ပိုးသတ်ဆေးအတုများရောင်းချမှု၊ အရည်အရွေးမမီမှုများကိုလည်း စိုက်ပျိုးရေးဦးစီးဌာန၊ စားသုံးသူရေးရာဦးစီးဌာနနှင့် FDA တို့ ပူးပေါင်းစစ်ဆေးမှုများ ပြုလုပ်ခြင်း၊ အရေးယူခြင်းများ လုပ်ဆောင်ပေးသွားမည်ဖြစ်ကြောင်း သိရသည်။

သတင်း #ဇာနှင်း