~~~~~~~~⊰❂ unicode ❂⊱~~~~~~~~

လွိုင်ကော် ဝမ်ငေါ့ ရေတံခွန်လမ်းပေါ်တွင် ရွာသားအချို့ သစ်တုံးများချ၍ ငွေကြေးကောက်ခံမှုများရှိနေ
**********
ကယားပြည်နယ် လွိုင်ကော်မြို့နယ်တွင်းရှိ အထင်ကရရေတံခွန်တစ်ခုဖြစ်သော ဝမ်ငေါ့ရေတံခွန် သွားရာလမ်းပေါ်တွင် ရွာသားအချို့က သစ်တုံးများဖြင့် ပိတ်ဆို့ကာ သင်္ကြန်ကာလအတွင်း လာရောက်လည်ပတ်သော ကားများအား ပိုက်ဆံကောက်ခံမှုများ ပြုလုပ်နေကြောင်း သိရသည်။

" ကျွန်တော်တို့ကားတွေ သွားတဲ့ လမ်းပေါ်မှာ သစ်လုံးချပြီး လမ်းပိတ်တယ်။ ပြီးတော့ ပိုက်ဆံ တောင်းတယ်။ ဖြတ်သွားရင် ပိုက်ဆံ ပေးရမယ်လို့ပြောတယ်။ ရေတံခွန် ရောက်ခါနီး ကားတွေရပ်နားရတဲ့နေရာ မရောက်ခင်လမ်းပေါ်မှာ။ အသွားကားတွေကော အပြန်ကားတွေကော အကုန် လိုက်တောင်းနေတာ။ ဒါကမဖြစ်သင့်ဘူးလေ။ ဘာမှမဆိုင်ဘူးလေ။ သူ့အိမ်ရှေ့ဖြတ်တာလည်းမဟုတ်ဘူး။ ဒီလို လုပ်တော့ အဲဒီမှာရှိတဲ့ရွာလည်း သိက္ခာကျတယ်။ ပြည်နယ်ပုံရိပ်လည်းထိခိုက်တယ်။ သွားလာရတဲ့ လူတွေလည်း အရမ်းစိတ်အနှောက်ယှက်ဖြစ်တယ်။ လမ်းက ရွာထဲကနေဖြတ်ပြီးရင် လယ်ကွက်တွေကြားထဲက ဖြတ်ရတော့ ကျဉ်းတယ်။ မြေလမ်းပဲ ကားတစ်စီးပဲသွားလို့ရတယ်။ လာတဲ့သူတွေက အရမ်းများတော့ လမ်းတွေပိတ်ကုန်တယ်။ သူတို့ကလည်း အဲဒီလို လုပ်တော့ပိုဆိုးတာပေါ့။ တချို့ကားသမားတွေနဲ့ဆို ပိုက်ဆံ လိုက်တောင်းတဲ့သူနဲ့ ရန်တောင်ဖြစ်တယ် " ဟု ရေတံခွန်သို့ လာရောက်လည်ပတ်သည့် လွိုင်ကော်မြို့မှ ကိုကျော်က ပြောသည်။

သင်္ကြန်ကာလအတွင်း ဝမ်ငေါ့ရေတံခွန်သို့ လာရောက်လည်ပတ်သူများပြားလာချိန် ဧပြီလ (၁၅)ရက်နေ့မှစ၍ ရေတံခွန်အသွားလမ်းပေါ်တွင် သစ်တုံးချကာ ကားများ၊ဆိုင်ကယ်များအား ဖြတ်သန်းခ တစ်ထောင်ကျပ်မှ နှစ်ထောင်ကျပ်အထိ တောင်းယူနေခြင်းဖြစ်ကြောင်း သိရသည်။

" ဒီတိုင်းတောင်းတာဆိုလည်း တော်သေးတယ်။ ခုက လမ်းအလယ်တည့်တည့်ကြီးပေါ်မှာ သစ်တုံးကြီး လာချထားပြီး လိုက်တောင်းနေတော့ ဒါတရားဝင်လည်းမဟုတ်ဘူး။ ဒီလိုတွေဖြစ်နေတာကို အစိုးရတာဝန်ရှိသူတွေ ရွာတာဝန်ရှိသူတွေ ကအရေးယူပေးရမယ် ဖြေရှင်းပေးပါ ။ ဒါကတကယ်မဖြစ်သင့်လို့ပါ ကျွန်တော်နဲ့ဆို ရန်တောင်ဖြစ်တယ်။ ကျွန်တော်တို့ အသွားတုန်းက နေ့လယ်လောက်က မရှိသေးဘူး။ အပြန် ညနေပိုင်းမှ အဲဒီလို လုပ်တာပဲ" ဟု လွိုင်ကော်မြို့မှ လာရောက်လည်ပတ်သူ ကိုဖြိုးကပြောသည်။

ယင်းကဲ့သို့ ငွေကြေးကောက်ခံနေမှုအား  လွိုင်ကော်မြို့နယ်ပြည်သူ့လွှတ်တော် ကိုယ်စားလှယ် ဒေါက်တာဒေါ်ခင်စည်သူက သက်ဆိုင်ရာသို့ တင်ပြသွားမည်ဖြစ်ကြောင်း သိရသည်။

" ကျွန်မ လည်းအခုမှသိရတယ်။ ဒါလုံးဝမဖြစ်သင့်ဘူး မလုပ်ရဘူးလေ။ အဲဒီဖက်ဆို လယ်ကွက်တွေရှိလို့ ခုချိနိထိ လမ်းတောင်သေချာ ဖောက်ဖို့ မလုပ်ရသေးဘူး ။ ကျွန်မဒီကိစ္စကို အစိုးရတာဝန်ရှိသူတွေဆီ ပြောပေးပါမယ်  " ဟု တာချီလိတ်သတင်းအေဂျေစီသို့ပြောသည်။ လွိုင်ကော်မြို့နယ်ပြည်သူ့လွှတ်တော် ကိုယ်စားလှယ် ဒေါက်တာဒေါ်ခင်စည်သူက ပြောသည်။

အဆိုပါလမ်းပိုင်းမှာ အပြီးသတ်ဖေါက်လုပ်နိုင်ခြင်းမရှိသေးသဖြင့် သင်္ကြန်ကာလ အသွားအလာများချိန်တွင် ယာဉ်ကြောကြပ်မှုများဖြစ်နေစဉ် လမ်းအား သစ်တုံးဖြင့်ပိတ်ဆို့ ငွေကြေးတောင်းခံနေမှုကြောင့် သွားလာသူများ အနှောင့်အယှက်ဖြစ်နေရကြောင်း သိရသည်။

သတင်း၊ဓါတ်ပုံ #ဆန်းဖြိုးထွန်း