~~~~~~~~⊰❂ unicode ❂⊱~~~~~~~~

ကရင်ပြည်နယ်တွင်း စစ်ဘေးရှောင်များ အကူအညီပေးနေသူတစ်ဦး ပစ်ခတ်မှုကြောင့် သေဆုံးရသည့်အတွက်  အရိုအသေပေး ဂုဏ်ပြုလွှာထုတ်ပြန်
***********
ကရင်ပြည်နယ် ဖာပွန်ခရိုင် လူသောမြို့နယ် လယ်မူပလောဒေသတွင် စစ်ဘေးရှောင်များအတွက် ကူညီနိုင်ရန် ဆောင်ရွက်နေသည့် စောအိုမှူး ဧပြီလ (၅)ရက်နေ့က ပစ်ခတ်ခံရမှုကြောင့် သေဆုံးသွားသည့်အတွက် အရိုအသေပေး ဂုဏ်ပြုလွှာကို ကရင်သဘာဝပတ်ဝန်းကျင်နှင့် လူမှုလုပ်ရှားမှုကွန်ရက် (KESAN)က ဧပြီလ (၉)ရက်နေ့ ရက်စွဲဖြင့် ထုတ်ပြန်လိုက်သည်။

စောအိုမူးတွင် ဇနီးနော်ဖေါသာနှင့် ကလေး (၇) ယောက်ကျန်ခဲ့ပြီး ၎င်းတို့မိသားစုသည် ၂၀၁၈ ခုနှစ် မတ်လ (၄) ရက်နေ့တွင် စတင်ဖြစ်ပွားသည့် ကရင်ပြည်နယ်တွင်းတိုက်ပွဲတွင် ပထမဆုံး တိမ်းရှောင်ထွက်ပြေး လာရသူများတွင် ပါဝင်သူများဖြစ်ကြောင်း သိရသည်။

အဆိုပါ သေဆုံးမှုမှာ ဒေသတွင်းတိုက်ပွဲကြောင့် မြေစာပင်ဖြစ်ရသည့် အပြစ်မဲ့ပြည်သူများ၏ သာဓကတစ်ခုဖြစ်သည်ဟု KESAN က ဖေါ်ပြထားသည်။

ကရင်တိုင်းရင်းသား အခွင့်အရေး၊ သဘာဝပတ်ဝန်းကျင်နှင့် လူမှုလုပ်ရှားမှုများတွင် တက်ကြွစွာ ဦးဆောင်ပါဝင်သူ စောအိုမူးသည် ၂၀၁၈ ခုနှစ်၊ ဧပြီလ (၅) ရက်နေ့၌ စစ်ပြေးဒုက္ခသည်များ ကူညီနိုင်ရေး ရပ်ရွာလူထုအသိုင်းအဝန်း အစည်းအဝေးတခုကို တက်ရောက်ရန် ဌာနေကရင် တိုင်းရင်းသား အသိုင်းအဝန်းအဖွဲ့တခုဖြစ်သည့် လူသောဖေါဒေးစင်တာသို့ ဆိုင်ကယ်ဖြင့် တစ်နာရီခရီးကို သွားရောက်ခဲ့ခြင်းဖြစ်ကြောင်း သိရသည်။

အစည်းအဝေးမှအပြန်တွင် ကရင်အမျိုးသားလွတ်မြောက်ရေးတပ်မတော် (KNLA) မှ တပ်သားစောဆဲဘလုဒိုကို ဆိုင်ကယ်ဖြင့် ကူညီတင်ဆောင်လာပြီး ၎င်း၏နေအိမ်အနီးအရောက် လယ်ကွင်းပြင်တွင် ဖြတ်သန်းစဉ် ညနေ (၅) နာရီ (၂၀) မိနစ်အချိန်၌ တိုက်ခိုက်မှုနှင့် ကြုံခဲ့သည်ဟု အတူလိုက်ပါသွားသည့် KNLA တပ်သား စောဆဲဘလုဒိုက ပြန်လည်ပြောပြခြင်းဖြစ်ပြီး KNLA တပ်သားမှာ ဆိုင်ကယ်မှ ခုန်ဆင်းကာ တောထဲပြေးဝင်သွားသဖြင့် ထိခိုက်ဒဏ်ရာရခြင်းမရှိဟု သိရသည်။

စောအိုမူးသေဆုံးကြောင်းကို KNLA က အတည်ပြုခဲ့သော်လည်း အဆိုပါနေရာတွင် တိုက်ခိုက်မှုရှိနေသဖြင့် ၎င်း၏ရုပ်အလောင်းကို ပြန်လည်ရယူနိုင်ခြင်းမရှိသေးကြောင်း အဆိုပါထုတ်ပြန်ချက်တွင် ဖေါ်ပြထားသည်။
စောအိုမူးသည် ၂၀၀၆ ခုနှစ်မှစပြီး  KESAN နှင့် ဒေသတွင်းလုပ်ဖေါ်ကိုင်ဖက်အဖြစ် လက်တွဲဆောင်ရွက်ပြီး ဌာနေကရင်တိုင်းရင်းသားလူထု၏ ရိုးရာဓလေ့ယဉ်ကျေးမှု ထိန်းသိမ်းရေး၊ ဓလေ့ထုံးတမ်းမြေယာစီမံအုပ်ချုပ်ရေးစနစ်အားကောင်းစေရေး၊ ဌာနေကရင်တိုင်းရင်းသားအသိပညာအခြေပြု တောရိုင်းတိရစ္ဆာန်လေ့လာဆန်းစစ်သူ၊ ကဆောထယ်ကျေးရွာပိုင်ဘုံ သစ်တောကော်မတီအကြံပေးပုဂ္ဂိုလ်အဖြစ် လုပ်ဆောင်ခဲ့သည့်အပြင် လူသောဖေါဒေးကျေးရွာ ပိုင်ဘုံသစ်တော တာဝန်ခံအဖြစ်လည်း ဆောင်ရွက်နေသူဖြစ်ကြောင်း သိရသည်။

ယင်းအပြင် မူတြော် (ဖာပွန်) ခရိုင်အတွင်း ၅၄၀၀ စတုရန်းကီလိုမီတာ အကျယ်အဝန်းရှိသည့် လူထုအခြေပြုသံလွင်ငြိမ်းချမ်းရေးဥယျာဉ်ဖေါ်ဆောင်ရေး ကော်မတီဝင်တဦးလည်းဖြစ်ကြောင်း သိရသည်။

ကရင်ပြည်နယ်တွင်း မတ်လ(၄)ရက်နေ့မှစ၍ ဖြစ်ပွားသော တိုက်ပွဲများကြောင့် ဒေသခံ (၂၃၀၀)ခန့်မှာ နေရပ်စွန့်ခွာ ထွက်ပြေးနေရကြောင်း သိရသည်။

Photo:KESAN