ဇြဲသာယာကမ္းေျခတြင္ ဆိုင္ခန္းမ်ား ဖ်က္သိမ္းထားေသာ္လည္း ေစ်းသည္မ်ားက သႀကၤန္ကာလၿပီး ဧၿပီလ(၁၇)ရက္ေန႔ အထိ ေစ်းေရာင္းခ်ၿပီး သတ္မွတ္ရက္ၿပီးပါက ဖယ္ရွားေပးသြားမည္

ဇြဲသာယာကမ္းေျခတြင္ ဆိုင္ခန္းမ်ား ဖ်က္သိမ္းထားေသာ္လည္း ေစ်းသည္မ်ားက သႀကၤန္ကာလၿပီး ဧၿပီလ(၁၇)ရက္ေန႔ အထိ ေစ်းေရာင္းခ်ၿပီး သတ္မွတ္ရက္ၿပီးပါက ဖယ္ရွားေပးသြားမည္
ဧပြီ 5, 2018
By Tachileik News Agency
ရွမ္းျပည္နယ္(အေရွ႕ပိုင္း) တာခ်ီလိတ္ၿမိဳ႕နယ္၊ မိုင္းဖုန္း(က)ေက်းရြာအုပ္စုရိွ မဲေခါင္ျမစ္ကမ္းေျခတြင္ ဇြဲသာယာကမ္းေျခ အျဖစ္ ဆိုင္ခန္းမ်ား ေဆာက္လုပ္ထားျခင္းကို ဖ်က္သိမ္းထားၿပီ ျဖစ္ေသာ္လည္း အဆိုပါ ေနရာတြင္ ေစ်းေရာင္းခ်မည့္သူမ်ားက သႀကၤန္ကာလ ၿပီးဆံုးသည့္ ဧၿပီလ(၁၇)ရက္ေန႔အထိ ဆက္လက္ ေရာင္းခ် ၾကမည္ျဖစ္ေၾကာင္း သိရသည္။

"ေစ်းသည္ေတြက သႀကၤန္အတြက္ ရည္ရြယ္ၿပီး ေငြေၾကးရင္းႏီွးထားၾကတာ မနည္းဘူး။ သႀကၤန္အၿပီးထိ ေစ်းေရာင္းရင္ရရင္ ရႈံးရႈံးျမတ္ျမတ္ သူတို႔ကလည္း ေက်နပ္ပါတယ္။ သႀကၤန္ၿပီးတာနဲ႔ ေစ်းသည္ေတြလည္း ပိတ္သြားမွာ"ဟု ဇြဲသာယာတြင္ အစားအေသာက္ေရာင္းခ်သူ မခင္ေဌး၀င္းက ေျပာသည္။

မဲေခါင္ျမစ္ကမ္းပါးတြင္ ဇြဲသာယာကမ္းေျခအျဖစ္ ၂၀၁၇ ခုႏွစ္အတြင္း လူသိမ်ားလာၿပီးေနာက္ ၂၀၁၈ ခုႏွစ္ သႀကၤန္ကာလ အတြက္ အဆိုပါ ေနရာတြင္ ေနထိုင္သည့္ ဦးဇြဲက သက္ဆုိင္ရာသို႔ ခြင့္ျပဳခ်က္ ေတာင္းခံျခင္း မရိွဘဲ ဆုိင္ခန္းမ်ား ေဆာက္လုပ္ခဲ့သျဖင့္ အေဆာက္အဦးမ်ား အခိုင္အမာ ေဆာက္လုပ္ ေဖၚေဆာင္ျခင္းကို  ဥပေဒႏွင့္အညီေဆာင္ရြက္ရန္  သက္ဆုိင္ရာက အသိေပးခဲ့သျဖင့္ ဧၿပီလ (၄)ရက္ေန႔တြင္ ဦးဇြဲက ဆိုင္ခန္းမ်ားအား စတင္ ဖ်က္သိမ္းလုိက္ျခင္းျဖစ္သည္။

သို႔ေသာ္ အဆိုပါေနရာတြင္ သႀကၤန္ကာလအတြင္း ေစ်းေရာင္းခ် ရန္ျပင္ဆင္ထားသည့္ ေစ်းသည္မ်ားက  ေငြတိုးမ်ားယူ၍ မတည္ထားသူမ်ားလည္း ပါ၀င္သည့္ အတြက္ အခက္အခဲျဖစ္လာရာ ေစ်း ဆက္လက္ေရာင္းခ်ခြင့္ ရေရး အတြက္ တာခ်ီလိတ္မဲဆႏၵနယ္မွ အမ်ဳိးသားလႊတ္ေတာ္ ကိုယ္စားလွယ္ ဦးစိုင္းလံုစံခတ္ႏွင့္ ျပည္သူ႔လႊတ္ေတာ္ကိုယ္စားလွယ္ ဦးေဌး၀င္းတို႔မွ တစ္ဆင့္ သက္ဆုိင္ရာဌာနမ်ား၊ ေဒသခံမ်ားႏွင့္ ညိႇႏိႈင္းေပးရန္ ဧၿပီလ(၄)ရက္ႏွင့္(၅)ရက္ေန႔တို႔တြင္ အကူအညီေတာင္းခံခဲ့ၾကေၾကာင္း သိရသည္။

“သူတို႔ ေစ်းသည္ေတြက ေတာင္းဆိုလို႔ နားလည္မႈနဲ႔ ထားေပးလုိက္မယ္ေပါ့ေနာ္။ ကၽြန္ေတာ္ကေတာ့ ဆိုင္ခန္းေတြေတာ့ ဖ်က္ပါၿပီ။ သႀကၤန္ကာလေလးမွာ သူတို႔ ေစ်းေရာင္းၾကမယ္ဆိုရင္ေတာ့ ဒီနားမွာ ေမာ္ေတာ္ေလး တစ္စီးနဲ႔ ေစာင့္ေပးတာတို႔ေတာ့ လုပ္ေပးမွာေပါ့။ ကၽြန္ေတာ္ကလည္း ဥပေဒေတြလည္း နားမလည္ေတာ့ လုပ္ထားခဲ့တာဆိုေတာ့ သႀကၤန္ၿပီးတာနဲ႔ ဒါေတြအားလံုး ဖ်က္ပစ္ၿပီး ေျမညိႇပစ္လုိက္မွာပါ။ ကမ္းေျခမွာ သူတို႔ဘာသာ လာတာ၊ သစ္ပင္ေတြ ဘာေတြနား သြားနားတာေတာ့ ထားမွာေပါ့။ ေစ်းေရာင္းခြင့္ေတာ့ မေပးေတာ့ဘူးေပါ့။ သႀကၤန္ကာလကေတာ့ ေစ်းသည္ေတြ သူတို႔ေရာင္းမယ္ ဆိုရင္ေတာ့ ညေန (၆)နာရီဆို ပိတ္ခို္င္းမွာပါ”ဟု ဇြဲသာယာကမ္းေျခဆို္င္ခန္းမ်ား ေဆာက္လုပ္ထားသည့္ ဦးဇြဲက တာခ်ီလိတ္သတင္းေအဂ်င္စီသို႔ ဧၿပီလ(၅)ရက္ေန႔ ညေနပိုင္းက ေျပာသည္။

ဇြဲသာယာကမ္းေျခ အျဖစ္ ျပဳလုပ္ထားသည့္ ေျမေနရာမွာ လယ္ယာေျမအမ်ိဳးအစားျဖစ္ေနသည့္ အတြက္ အျခားနည္းျဖင့္ အသံုးျပဳခြင့္ မရိွသည့္အျပင္ ႏွစ္ႏုိင္ငံနယ္နမိတ္ျဖစ္သည့္ မဲေခါင္ျမစ္ေဘးတြင္ ျဖစ္သျဖင့္ ဥပေဒႏွင့္အညီ ခြင့္ျပဳခ်က္တင္ျပရန္ လုိအပ္ေနျခင္းျဖစ္ေၾကာင္း သိရသည္။

အဆိုပါေနရာမွာ ယခင္က သြားေရာက္လည္ပတ္ရန္ အဆင္ေျပျခင္း မရိွေသာ္လည္း ဦးဇြဲက ေျမျပဳျပင္မ်ား လုပ္ေဆာင္ခဲ့ၿပီးေနာက္ ၂၀၁၇ ခုႏွစ္မွစ၍ ေဒသတြင္း သြားေရာက္လည္ပတ္ရန္ ကမ္းေျခေနရာ တစ္ခုအျဖစ္ လူသိမ်ားလာျခင္းျဖစ္သည္။

လက္ရိွတြင္ ဆုိင္ခန္းေပါင္း (၃၀)နီးပါးျဖင့္ စည္ကားလာရာ လူငယ္မ်ား မၾကာခဏ ျပႆနာျဖစ္သည္ဟု အဆိုပါ ေဒသအနီးဝန္းက်င္မွ ေဒသခံမ်ားက သက္ဆိုင္ရာဌာနမ်ားထံ တင္ျပမႈမ်ားရိွေၾကာင္း သိရသည္။

သတင္း - ခ်ယ္ရီထုိက္
ဓါတ္ပံု - KHW


~~~~~~~~⊰❂ unicode ~~~~~~~~

ရှမ်းပြည်နယ်(အရှေ့ပိုင်း) တာချီလိတ်မြို့နယ်၊ မိုင်းဖုန်း(က)ကျေးရွာအုပ်စုရှိ မဲခေါင်မြစ်ကမ်းခြေတွင် ဇွဲသာယာကမ်းခြေ အဖြစ် ဆိုင်ခန်းများ ဆောက်လုပ်ထားခြင်းကို ဖျက်သိမ်းထားပြီ ဖြစ်သော်လည်း အဆိုပါ နေရာတွင် စျေးရောင်းချမည့်သူများက သင်္ကြန်ကာလ ပြီးဆုံးသည့် ဧပြီလ(၁၇)ရက်နေ့အထိ ဆက်လက် ရောင်းချ ကြမည်ဖြစ်ကြောင်း သိရသည်။

"စျေးသည်တွေက သင်္ကြန်အတွက် ရည်ရွယ်ပြီး ငွေကြေးရင်းနှီးထားကြတာ မနည်းဘူး။ သင်္ကြန်အပြီးထိ စျေးရောင်းရင်ရရင် ရှုံးရှုံးမြတ်မြတ် သူတို့ကလည်း ကျေနပ်ပါတယ်။ သင်္ကြန်ပြီးတာနဲ့ စျေးသည်တွေလည်း ပိတ်သွားမှာ"ဟု ဇွဲသာယာတွင် အစားအသောက်ရောင်းချသူ မခင်ဌေးဝင်းက ပြောသည်။

မဲခေါင်မြစ်ကမ်းပါးတွင် ဇွဲသာယာကမ်းခြေအဖြစ် ၂၀၁၇ ခုနှစ်အတွင်း လူသိများလာပြီးနောက် ၂၀၁၈ ခုနှစ် သင်္ကြန်ကာလ အတွက် အဆိုပါ နေရာတွင် နေထိုင်သည့် ဦးဇွဲက သက်ဆိုင်ရာသို့ ခွင့်ပြုချက် တောင်းခံခြင်း မရှိဘဲ ဆိုင်ခန်းများ ဆောက်လုပ်ခဲ့သဖြင့် အဆောက်အဦးများ အခိုင်အမာ ဆောက်လုပ် ဖေါ်ဆောင်ခြင်းကို  ဥပဒေနှင့်အညီဆောင်ရွက်ရန်  သက်ဆိုင်ရာက အသိပေးခဲ့သဖြင့် ဧပြီလ (၄)ရက်နေ့တွင် ဦးဇွဲက ဆိုင်ခန်းများအား စတင် ဖျက်သိမ်းလိုက်ခြင်းဖြစ်သည်။

သို့သော် အဆိုပါနေရာတွင် သင်္ကြန်ကာလအတွင်း စျေးရောင်းချ ရန်ပြင်ဆင်ထားသည့် စျေးသည်များက  ငွေတိုးများယူ၍ မတည်ထားသူများလည်း ပါ၀င်သည့် အတွက် အခက်အခဲဖြစ်လာရာ စျေး ဆက်လက်ရောင်းချခွင့် ရရေး အတွက် တာချီလိတ်မဲဆန္ဒနယ်မှ အမျိုးသားလွှတ်တော် ကိုယ်စားလှယ် ဦးစိုင်းလုံစံခတ်နှင့် ပြည်သူ့လွှတ်တော်ကိုယ်စားလှယ် ဦးဌေးဝင်းတို့မှ တစ်ဆင့် သက်ဆိုင်ရာဌာနများ၊ ဒေသခံများနှင့် ညှိနှိုင်းပေးရန် ဧပြီလ(၄)ရက်နှင့်(၅)ရက်နေ့တို့တွင် အကူအညီတောင်းခံခဲ့ကြကြောင်း သိရသည်။

“သူတို့ စျေးသည်တွေက တောင်းဆိုလို့ နားလည်မှုနဲ့ ထားပေးလိုက်မယ်ပေါ့နော်။ ကျွန်တော်ကတော့ ဆိုင်ခန်းတွေတော့ ဖျက်ပါပြီ။ သင်္ကြန်ကာလလေးမှာ သူတို့ စျေးရောင်းကြမယ်ဆိုရင်တော့ ဒီနားမှာ မော်တော်လေး တစ်စီးနဲ့ စောင့်ပေးတာတို့တော့ လုပ်ပေးမှာပေါ့။ ကျွန်တော်ကလည်း ဥပဒေတွေလည်း နားမလည်တော့ လုပ်ထားခဲ့တာဆိုတော့ သင်္ကြန်ပြီးတာနဲ့ ဒါတွေအားလုံး ဖျက်ပစ်ပြီး မြေညှိပစ်လိုက်မှာပါ။ ကမ်းခြေမှာ သူတို့ဘာသာ လာတာ၊ သစ်ပင်တွေ ဘာတွေနား သွားနားတာတော့ ထားမှာပေါ့။ စျေးရောင်းခွင့်တော့ မပေးတော့ဘူးပေါ့။ သင်္ကြန်ကာလကတော့ စျေးသည်တွေ သူတို့ရောင်းမယ် ဆိုရင်တော့ ညနေ (၆)နာရီဆို ပိတ်ခို်င်းမှာပါ”ဟု ဇွဲသာယာကမ်းခြေဆို်င်ခန်းများ ဆောက်လုပ်ထားသည့် ဦးဇွဲက တာချီလိတ်သတင်းအေဂျင်စီသို့ ဧပြီလ(၅)ရက်နေ့ ညနေပိုင်းက ပြောသည်။

ဇွဲသာယာကမ်းခြေ အဖြစ် ပြုလုပ်ထားသည့် မြေနေရာမှာ လယ်ယာမြေအမျိုးအစားဖြစ်နေသည့် အတွက် အခြားနည်းဖြင့် အသုံးပြုခွင့် မရှိသည့်အပြင် နှစ်နိုင်ငံနယ်နမိတ်ဖြစ်သည့် မဲခေါင်မြစ်ဘေးတွင် ဖြစ်သဖြင့် ဥပဒေနှင့်အညီ ခွင့်ပြုချက်တင်ပြရန် လိုအပ်နေခြင်းဖြစ်ကြောင်း သိရသည်။

အဆိုပါနေရာမှာ ယခင်က သွားရောက်လည်ပတ်ရန် အဆင်ပြေခြင်း မရှိသော်လည်း ဦးဇွဲက မြေပြုပြင်များ လုပ်ဆောင်ခဲ့ပြီးနောက် ၂၀၁၇ ခုနှစ်မှစ၍ ဒေသတွင်း သွားရောက်လည်ပတ်ရန် ကမ်းခြေနေရာ တစ်ခုအဖြစ် လူသိများလာခြင်းဖြစ်သည်။

လက်ရှိတွင် ဆိုင်ခန်းပေါင်း (၃၀)နီးပါးဖြင့် စည်ကားလာရာ လူငယ်များ မကြာခဏ ပြဿနာဖြစ်သည်ဟု အဆိုပါ ဒေသအနီးဝန်းကျင်မှ ဒေသခံများက သက်ဆိုင်ရာဌာနများထံ တင်ပြမှုများရှိကြောင်း သိရသည်။

သတင်း - ချယ်ရီထိုက်
ဓာတ်ပုံ - KHW

 #TachileikNewsAgency #TachileikOnlineNews  #တာခ်ီလိတ္သတင္းေအဂ်င္စီ www.tachileik.net  
~~~~~~ ေၾကာ္ျငာ ~~~~~~