~~~~~~~~⊰❂ unicode ❂⊱~~~~~~~~

တာချီလိတ်တွင် ကျင်းပသည့် (၇၁)နှစ်မြောက် ရှမ်းပြည်နယ်နေ့ အထိမ်းအမှတ်အခမ်းအနားသို့ တိုင်းရင်းသား ယဉ်ကျေးမှုအဖွဲ့များတက်ရောက် ဖျော်ဖြေ
*****************
(၇၁)နှစ်မြောက် ရှမ်းပြည်နယ်နေ့ အထိမ်းအမှတ်အခမ်းအနားကို ရှမ်းပြည်နယ်(အရှေ့ပိုင်း) တာချီလိတ်မြို့ အောင်မြတ်ခန်းမ၌ ဖေဖေဝါရီလ (၇)ရက်နေ့က ကျင်းပရာ တာချီလိတ်ရှိ တိုင်းရင်းသား ယဉ်ကျေးမှုအဖွဲ့ (၄)ဖွဲ့က ပါဝင်ဖျော်ဖြေကြကြောင်း သိရသည်။

အဆိုပါ အခမ်းအနားတွင် ရှမ်းတိုင်းရင်းသား ယဉ်ကျေးမှုအဖွဲ့၊ လားဟူတိုင်းရင်းသား ယဉ်ကျေးမှုအဖွဲ့၊ အာခါတိုင်းရင်းသား ယဉ်ကျေးမှုအဖွဲ့၊ ဗမာယဉ်ကျေးမှုအဖွဲ့နှင့် သဘင်အစည်းအရုံးတို့က တိုင်းရင်းသားရိုးရာယဉ်ကျေးမှု အဆိုအကများဖြင့် ဖျော်ဖြေခဲ့ကြခြင်းဖြစ်ကြောင်း သိရသည်။

(၇၁)နှစ်မြောက် ရှမ်းပြည်နယ်နေ့အထိမ်းအမှတ်အခမ်းအနားသို့ ပြည်ထောင်စုသမ္မတမြန်မာနိုင်ငံတော်၊ နိုင်ငံတော်သမ္မတ ဦးထင်ကျော်က ပေးပို့လာသည့် သဝဏ်လွှာအား တာချီလိတ်ခရိုင် စီမံခန့်ခွဲမှု ကော်မတီဥက္ကဋ္ဌ ခရိုင်အုပ်ချုပ်ရေးမှူး ဦးတင်ဝင်းရွှေ က ဖတ်ကြားကာ ရှမ်းပြည်နယ်အစိုးရအဖွဲ့၊ ပြည်နယ်ဝန်ကြီးချုပ် ဒေါက်တာလင်းထွဋ်က ပေးပို့သည့် သဝဏ်လွှာအား ဒုတိယမြို့နယ်အုပ်ချုပ်ရေးမှူး ဦးမင်းအောင်က ဖတ်ကြားခဲ့ကြကာ ရှမ်းပြည်နယ်နေ့ဖြစ်ပေါ်လာပုံသမိုင်းကြောင်းအား ဒေါ်နန်းငွေမြက ရှင်းလင်းခဲ့ကြောင်း သိရသည်။

အခမ်းအနားသို့ စစ်ဗျူဟာအဖွဲ့(အခြေချ)တာချီလိတ်မှ စစ်ဗျူဟာမှူး ဗိုလ်မှူးကြီး အေးမင်းဦး ၊ ခရိုင်အုပ်ချုပ်ရေးမှူး ဦးတင်ဝင်းရွှေ နှင့် ဌာနဆိုင်ရာများ၊ နိုင်ငံရေးပါတီများ၊ လူမှုရေးအသင်းအဖွဲ့များ၊ ဆရာ၊ ဆရာမများ၊ ကျောင်းသားကျောင်းသူများနှင့် ဒေသခံအချို့ တက်ရောက်ကြောင်း သိရသည်။

သတင်း #ဝေယံလင်း
ဓါတ်ပုံ #ယာဆေး