~~~~~~~~⊰❂ unicode ❂⊱~~~~~~~~

လွိုင်ကော်မြို့နယ် ပါလောင်းကျေးရွာ၊ လွိုင်ကော် - ရှားတောကားလမ်းမဘေး ချောက်ထဲတွင် တွေ့ရှိရသည့် မီးရှို့ထားသော လူသေအလောင်းနှင့် ပတ်သက်၍ အလောင်းဖျောက်ရာတွင် ပါဝင်သူမှာ ခင်ပွန်း၏ ညီဖြစ်နပြေီး၊ လူသတ်သူမှာ ခင်ပွန်းကိုယ်တိုင် ဖြစ်နေကြောင်း ရဲတပ်ဖွဲ့မှ သိရသည်။

၂၀၁၈ခုနှစ် ဖေဖော်ဝါရီလ(၁၇)ရက်နေ့က လွိုင်ကော် - ရှားတောကားလမ်းမရှိ မိုင်တိုင်အမှတ် (၁၁/၂)နှင့်(၁၁/၃)အကြား၊ ကားလမ်းမ၏ အနောက်ဘက် ပေ(၁၀၀)ခန့်အကွာ လျှိုမြောင်ထဲတွင် မီးရှို့ထားသော အလောင်း တစ်လောင်းတွေ့ရှိ ခဲ့ခြင်​းဖြစ်​ပြီး အ​လောင်​းအား မည်​သူ မည်​ဝါဖြစ်​သည်​ကို သက်ဆိုင်ရာ ရဲတပ်ဖွဲ့မှ စုံစမ်းမှုများ ပြုလုပ်ရာက အလောင်းဖျောက်ရာတွင် ပါဝင်သူ အောင်ကောင်းစံဝင်းအား ဖေဖော်ဝါရီလ (၂၀)ရက်နေ့ ညပိုင်းက မြန်အောင်မြို့နယ်၊ ဇလုပ်ကြီးကျေးရွာရှိ နေအိမ်တွင် ဖမ်းဆီးရမိလိုက်ခြင်း ဖြစ်ကြောင်း သိရသည်။

ဖမ်းဆီးရမိထားသူ အောင်ကောင်းစံဝင်း၏ ထွက်ဆိုချက်အရ၎င်းမှာ မိခင်ဖြစ်သူ ကျန်းမာရေး မကောင်းသဖြင့် ဆေးဝါး ကုသစရိတ် ငွေတောင်းရန် အစ်ကိုဖြစ် သူနေထိုင်သည့် ကယားပြည်နယ်၊ လွိုင်ကော်မြို့နေ အစ်ကိုဖြစ်သူထံ အရောက်တွင် အစ်ကိုဖြစ်သူ လပြည့်ဝင်း(ခ)သပြေအောင်မှာ ဇနီးဖြစ်သူ ဒေါ်ဇင်မာထွေးအား သတ်ပြီး အပြာရောင် ပလတ်စတစ်ပုံးဖြင့် ထည့်ထားသည်ကို တွေ့ရှိရကြောင်း၊ အလောင်းအား အစ်ကိုနှင့်အတူ ကားပေါ်တင်၍ လွိုင်ကော် - ရှားတော ကားလမ်း၊ မိုင်တိုင် အမှတ် (၁၁/၂)နှင့်(၁၁/၃)ကြား လမ်း၏ အနောက်ဘက် ပေ(၁၀၀)ခန့်အကွာ လျှိုမြောင်ချောက် အတွင်း၌ ဓာတ်ဆီ လောင်းကာ မီးရှို့ခဲ့ခြင်​းဖြစ်​ပြီး အစ်ကိုဖြစ်သူမှာ ဇနီးသည် ဝတ်ဆင်ထားသည့် ရွှေထည်ပစ္စည်းများအား၎င်းအားပေးရာ၎င်းမှ ရန်ကုန်သို့သွားပြီး လှိုင်သာယာမီးခွက်ဈေးတွင် ရွှေထည်ပစ္စည်းများအား ရောင်းချခဲ့ရာ ရွှေနားကပ်(၁)ရံအား ငွေကျပ်(၂၇၀,ဝဝဝ)ကျပ်ဖြင့်ရောင်းချရရှိခဲ့ကြောင်းနှင့် ကျန် ပစ္စည်းများမှာ ရွှေအတုများဖြစ်နေကြောင်းနှင့်၎င်းသည် နေအိမ်သို့ ပြန်လာစဉ် ယခုလို ဖမ်းဆီးခံရခြင်းဖြစ်ကြောင်း သိရသည်။

ရဲတပ်ဖွဲ့မှ အဆိုပါ အမှုအား စစ်ဆေးဖော်ထုတ်မှုနှင့် ပတ်သက်၍ လျှိုမြောင်ထဲတွင် မီးရှို့ထားသော အလောင်း၏ ပြာပုံအောက်တွင် အရှည် (၁၇)ပေခန့်ရှိသွပ်ကြိုး (၄)ချောင်း၊ မီးလောင်ကျွမ်းထားသည့် အဝါရောင် ပလတ်စတစ်ပြား(၁)ချပ်၊ အပြာရောင်ပလတ်စတစ်ပြား(၂)ချပ်၊ သံလက်ကိုင်ကွင်း(၁)ခု၊ အနီရောင် ပလတ်စတစ် အဖုံး (၁)ဖုံးနှင့် အခင်းဖြစ်နေရာ အနီးကားလမ်းနံဘေးမှ Dunhill တံဆိပ်ပါ အဖြူရောင် စီးကရက်အတို(၁၀)ခု၊ Red Bull အချိုရည်ဘူးခွံ(၂)ဘူးတို့အား တွေ့ရှိရ၍ သက်သေခံ ပစ္စည်းများအဖြစ် သိမ်းဆည်းခဲ့ကြပြီး အမှုနှင့်အနီးစပ်ဆုံးဖြစ်သည့် လတ်တလော ကာလအတွင်း လူပျောက် အဖြစ် တိုင်းကြားထားသည့် ဒေါ်ဇင်မာထွေး ပျောက်ဆုံးနေမှုနှင့် ဆက်စပ်၍ ဒေါ်ဇင်မာထွေး၏ အိမ်သို့ သွားရောက်၍ စစ်ဆေးမှုများ ပြုလုပ်ခဲ့ကြောင်း သိရသည်။

ဆက်လက်၍ ရဲတပ်ဖွဲ့က ဒေါ်ဇင်မာထွေး၏ နေအိမ်အား သွားရောက် စစ်ဆေးရာ နေအိမ်တွင် ထားရှိသည့် ဓာတ်ဆီများ ထည့်ထားသော ပလတ်စတစ်အဝါရောင် (၅)ဂါလန်ပုံး(၁)ပုံး၊ သံလက်ကိုင်ကွင်းပါ အပြာရောင် ပလတ်စတစ်ပုံးကြီး(၁)ပုံး နှင့် ကားတာယာ အဟောင်း (၄)လုံးရှိသည့် အနက်​်(၂)လုံးတို့မှာ ပျောက်ဆုံး နေကြောင်း တွေ့ရှိရာမှ ဆက်စပ်၍ အမှုအား ဖော်ထုတ်နိုင်ခဲ့ခြင်း ဖြစ်ကြောင်း သိရသညာ်။

သတ်ခံရပြီး အလောင်းဖျောက်ဖျက်ခံရသူမှာ အသက်(၄၄)နှစ်ရှိ ဒေါ်ဇင်မာထွေးဖြစ်ပြီး၎င်းအား သတ်ဖြတ်သူ ခင်ပွန်းဖြစ်သူ လပြည့်ဝင်း (ခ) သပြေအောင်မှ ထွက်ပြေးတိမ်းရှောင်နေသည့်အတွက် အမြန်ဆုံး ဖမ်းဆီးရမိရေး ရဲတပ်ဖွဲ့မှ ကြိုးပမ်းဆောင်ရွက်နေလျက်ရှိကြောင်း နှင့် လွိုင်ကော်မြို့မရဲစခန်းတွင် (ပ)၂၆/၂၀၁၈၊ ရာဇသတ်ကြီးပုဒ်မ ၃၀၂/၂၀၁ ဖြင့် အမှုဖွင့် ဆောင်ရွက်ထားရှိကြောင်း သိရှိရသည်။

သတင်း - ဆန်းဖြိုးထွန်း