~~~~~~~~⊰❂ unicode ❂⊱~~~~~~~~

မိုင်းရယ်မြို့နယ်မှ အခြေခံပညာကျောင်း (၁၉) ကျောင်းအတွက် ကျောင်းအုပ်များကို လာမည့် ပညာသင်နှစ်အတွင်း ခန့်ထားပေးမည်
***************
ရှမ်းပြည်နယ်(မြောက်ပိုင်း) မိုင်းရယ်မြို့နယ်ရှိ အခြေခံပညာကျောင်း (၁၉)ကျောင်းတွင် လစ်လပ်နေသည့် ကျောင်းအုပ်ရာထူးများကို လာမည့်ပညာသင်နှစ် ၂၀၁၈ - ၁၉ ပညာသင်နှစ်တွင် ခန့်ထားပေးသွားမည် ဖြစ်ကြောင်း သိရသည်။

မိုင်းရယ်မြို့နယ်ရှိ အခြေခံပညာကျောင်း (၁၉) ကျောင်းတွင် ပညာသင်နှစ် နှစ်ဝက်ခန့် ကျောင်းအုပ်များ လစ်လပ်နေခြင်းကို ပညာရေးဝန်ကြီးဌာနအနေဖြင့် စီစဉ်ဆောင်ရွက်ထားမှုအခြေအနေကို မိုင်းရယ် မဲဆန္ဒနယ်မှ ဦးစိုင်းသီဟကျော်က ဖေဖော်ဝါရီလ ရ ရက်နေ့တွင် ကျင်းပသော ပြည်သူ့လွှတ်တော်အစည်းအဝေးတွင် မေးမြန်းထားခြင်းကို ပညာရေးဝန်ကြီးဌာန ပြည်ထောင်စု ဒု-ဝန်ကြီး ဦးဝင်းမော်ထွန်းက ယင်းကဲ့သို့ ပြန်လည်ဖြေကြားထားခြင်းဖြစ်သည်။

ပညာရေးဝန်ကြီးဌာန၊ အခြေခံပညာဦးစီးဌာနမှ ၂၀၁၇ ခုနှစ် သြဂုတ်လ (၃)ရက်နေ့တွင် ရာထူးတိုးမြှင့်ခြင်း၊ ပြောင်းရွှေ့ ခန့်ထားခြင်းတို့ကို ဆောင်ရွက်ခဲ့ရာ မိုင်းရယ်မြို့နယ်တွင် မူလတန်းပြ (၁၁) ဦး၊ အလယ်တန်းပြ (၄) ဦး၊ အထက်တန်းပြ (၂၃) ဦး၊ မူလတန်းပြ (၇၄) ဦး စုစုပေါင်း (၁၁၂) ဦး ဖြည့်ဆည်းဆောင်ရွက်ပြီး အခြေခံပညာ အထက်တန်းကျောင်းများရှိ ကျောင်းအုပ်နေရာများကိုလည်း တစ်ပြည်လုံး အတိုင်းအတာဖြင့် ဖြည့်ဆည်းဆောင်ရွက်ပေးရန် စီစဉ်နေကြောင်း ပညာရေးဝန်ကြီးဌာန ပြည်ထောင်စု ဒု-ဝန်ကြီး ဦးဝင်းမော်ထွန်းက ဖြေကြားသည်။

အလယ်တန်းကျောင်းအုပ်နေရာများတွင် ဖြည့်ဆည်းခန့်ထားရန်အတွက်ကိုလည်း ၂၀၁၈ ခုနှစ် ဇန်နဝါရီလ (၂၇) ရက်နေ့ တွင် သက်ဆိုင်ရာတိုင်းဒေသကြီး/ပြည်နယ်အလိုက် ရေးဖြေစာမေး ပွဲများကျင်းပခြင်း၊ လူတွေ့စစ်ဆေးခြင်းများဆောင်ရွက်ခြင်း၊ ရွေးချယ်နေရာ ချထားခြင်းများကို လုပ်ထုံး လုပ်နည်းများနှင့်အညီ ဆက်လက်ဆောင်ရွက်ထားပြီး အထက်တန်းပြနှင့် အောက်ရာထူးများကို ၂၀၁၈-၁၉ ပညာသင်နှစ်အတွက် ရာထူးတိုးအပြောင်းအရွှေ့များ ဆောင်ရွက်ချိန်တွင် ပြည်နယ် အစိုးရအဖွဲ့နှင့် ပြည်နယ်ပညာရေးမှူးတို့၏ ကြီးကြပ်မှုဖြင့် လျှောက်ထားလာသူများထဲမှ စိစစ်ဖြည့်ဆည်း ဆောင်ရွက်ပေးသွားမည် ဖြစ်ကြောင်း  ဒုဝန်ကြီးက ဖြေကြားထားသည်။