~~~~~~~~⊰❂ unicode ❂⊱~~~~~~~~

လွိုင်ကော်မြို့နယ်တရားရုံးတွင် ငြိမ်း/စု/စီဖြင့် တရားစွဲခံထားရသူသုံးဦး၏ အမှုအား ပလပ်
************
ခွင့်ပြုချက်မယူဘဲ ဆန္ဒထုတ်ဖေါ်မှုဖြင့် တရားရင်ဆိုင်ရသည့်လူငယ်ငါးဦး၏ တရားရုံးချိန်းသို့ ဝန်းရံလိုက်ပါပြီး ဟောပြောမှုများကြောင့် ငြိမ်း/စု/စီဖြင့် တရားစွဲထားသူ သုံးဦးအား ဇန်နဝါရီလ (၂၃)ရက်နေ့တွင် အမှုအား ပလပ်လိုက်ကြောင်း သိရသည်။

ငြိမ်း/စု/စီဖြင့် ဇန်နဝါရီလ (၁၉)ရက်နေ့တွင် လွိုင်ကော်မြို့နယ်တရားရုံး၌ ပထမဆုံးရုံးချိန်း ရင်ဆိုင်ခဲ့ရသည့် ကယန်းအမျိုးသားပါတီ ဥက္ကဌ ခွန်းဘီးဒူ (ခ) လွှီးစီငြိမ်း၊ ကရင်နီပြည်တောင်သူလယ်သမားသမဂ္ဂ ဥက္ကဋ္ဌ ခူးတူရယ် (ခ) အန်ထော်ဏီနှင့် ကယန်းမျိုးဆက်သစ်လူငယ် (KNGY)/ဗဟိုကော်မတီမှ ခွန်းအသန်းတို့၏ အမှုကို ယနေ့ ရုံးချိန်းတွင် KNPP ကလည်း ကြားဝင် စေ့စပ်ညှိနှိုင်းပေးခဲ့ပြီး သက်ဆိုင်ရာမှ အမှုအားပလပ်ပေး လိုက်ခြင်းဖြစ်ကြောင်း သိရသည်။

ငြိမ်း/စု/စီဖြင့် တရားရင်ဆိုင်ခဲ့သည့် လူငယ်(၅)ဦးအား ဇန်နဝါရီလ (၅)ရက်နေ့က လွိုင်ကော်မြို့နယ် တရားရုံးသို့ ရုံးချိန်းလာရောက်စဉ် ဝန်းရံလိုက်ပါပို့ဆောင်သူ တစ်ထောင်ခန့်က မြို့နယ်တရားရုံးသို့ လိုက်ပါပို့ဆောင်ရာတွင် ဗီနိုင်းပိုစတာများကိုင်ဆောင်၍ ကြွေးကြော်သံများဖြင့် အစိုးရရုံးရှေ့၊ လွှတ်တော်ရုံးရှေ့နှင့် လူအများသွားလာနေသော လမ်းမပေါ်တွင် စီတန်းလှည့်လည်ခဲ့ကြသဖြင့် ဦးဆောင်သူ (၃)ဦးအား ငြိမ်း/စု/စီဥပဒေအရ တရားစွဲခဲ့ခြင်းဖြစ်ပြီး အဆိုပါ သုံးဦး၏ ပထမရုံးချိန်းတွင်လည်း လူငယ်များက ဝန်းရံလိုက်ပါခဲ့ကြခြင်းဖြစ်သည်။

သတင်း #ဆန်းဖြိုးထွန်း