~~~~~~~~⊰❂ unicode ❂⊱~~~~~~~~

ရှမ်းပြည်နယ်(အရှေ့ပိုင်း) တာချီလိတ်မြို့တွင် နှစ်(၇၀)ပြည့် လွတ်လပ်ရေးနေ့ အထိမ်းအမှတ် ဂုဏ်ပြုညစာ စားပွဲ အခမ်းအနားအား ၂၀၁၈ ခုနှစ် ဇန်နဝါရီလ (၄)ရက်နေ့က ရန်အောင်မြေရပ်ကွက်ရှိ ပါလျှံတရုတ် ဘုံကျောင်း၏ မင်္ဂလာခန်းမတွင် ကျင်းပပြီး ဒေသဖွံ့ဖြိုးရေးနှင့် ပြည်သူ့အကျိုးပြုလုပ်ငန်းတွင် ပါဝင် ဆောင်ရွက်သည့် လူပုဂ္ဂိုလ်နှင့်အသင်းအဖွဲ့များအား ဂုဏ်ပြုမှတ်တမ်းလွှာ (၁၁)ခုပေးအပ်ကြောင်း သိရသည်။

အခမ်းအနားတွင် တာချီလိတ်ခရိုင်စီမံခန့်ခွဲမှုကော်မတီ ဥက္ကဌ၊ ခရိုင်အုပ်ချုပ်ရေးမှူး ဦးတင်ဝင်းရွှေက နှစ် (၇၀)ပြည့် လွတ်လပ်ရေးနေ့ အထိမ်းအမှတ် နှုတ်ခွန်းဆက်အဖွင့် ဂုဏ်ပြုအမှာစကားပြောကြားပြီး တာချီလိတ်ခရိုင် အတွင်း ဒေသဖွံ့ဖြိုးတိုးတက်ရေး လုပ်ငန်းများ၊ ပြည်သူ့အကျိုးပြုလုပ်ငန်းများတွင် ပူးပေါင်းပါဝင် ဆောင်ရွက်ခဲ့ကြသော ပုဂ္ဂိုလ်များ၊ အသင်းအဖွဲ့များအား ဂုဏ်ပြုမှတ်တမ်းလွှာ ပေးအပ်ကြောင်း သိရသည်။

အဆိုပါ အခမ်းအနားတွင် သဘင်ပညာရှင်များအစည်းအရုံး၊ လားဟူတိုင်းရင်းသားယဉ်ကျေးမှုအဖွဲ့၊ ဗမာတိုင်းရင်းသား ယဉ်ကျေးမှုအဖွဲ့၊ အာခါစာပေနှင့်ယဉ်ကျေးမှုအဖွဲ့၊ ရှမ်းစာပေနှင့်ယဉ်ကျေးမှုအဖွဲ့၊ လီဆူစာပေနှင့်ယဉ်ကျေးမှုအဖွဲ့ နှင့် ဂီတအစည်းအရုံးတို့က ဖျော်ဖြေတင်ဆက်ကြောင်း သိရသည်။

နှစ် (၇၀)ပြည့် လွတ်လပ်ရေးနေ့ အထိမ်းအမှတ် အဖြစ် ဂုဏ်ပြုမှတ်တမ်းလွှာများအား တာဝန်ရှိသူများက ပေးအပ် ချီးမြှင့်ခံရသူများတွင် တာချီလိတ်တွင် နိုင်ငံတော်အား အခွန်ထမ်းဆောင်မှု အများဆုံးဖြစ်သည့် ကုမ္ပဏီများအနဖြေင့် ဝင်ငွေခွန် အများဆုံး ထမ်းဆောင်ခဲ့သည့် ကုမ္ပဏီများဖြစ်သည့် ရွှေနန်းစံ ကုမ္ပဏီ၊ ရွှေရေကန်ရောင်းဝယ်ရေး ကုမ္ပဏီ ( Golden Lake Import & Export ) နှင့် ဦးဆမ်ရီ ရောင်းဝယ်ရေး ကုမ္ပဏီတို့ ပါဝင်ကြောင်း သိရသည်။

လူမှုရေးအကျိုးပြု ကဏ္ဍအနဖြေင့် မတော်တဆဖြစ်ပွားမှုများနှင့် နာရေးလုပ်ငန်းများတွင် နေရာ နှင့် အချိန်မရွေး ချက်ချင်းပူးပေါင်း ပါဝင် ကူညီဆောင်ရွက်ပေးသည့် တာချီလိတ်နာရေးကူညီမှုအသင်း၊ မြန်မာဖက်မှ ကျန်းမာရေးအရ ထိုင်းနိုင်ငံ မယ်ဆိုင်၊ ချင်းရိုင်းမြို့များသို့ ဆေးကုသမှုခံရယူလိုသည့် မြန်မာနိုင်ငံသားေဝဒနာရှင်များအား ချိတ်ဆက်ကူညီပေးခြင်း ဘာသာပြန်ပေးခြင်းများတွင် ကူညီဆောင်ရွက်ပေးနေသည့် ထိုင်းနိုင်ငံ မယ်ဆိုင်လူမှုဂရူဏာအသင်း နှင့် ရခိုင်ပြည်နယ် မောင်တောဒေသ ပြန်လည်ထူထောင်ရေးအတွက် ကျပ်သိန်း (၅၆၀) လှူဒါန်းနိုင်သည်အထိ နှိုးဆော် ဆောင်ရွက်ခဲ့သည့် ရခိုင်ပြည်နယ် မောင်တောဒေသ ပြန်လည်ထူထောင်ရေး လုပ်ငန်းကော်မတီ အပါအဝင် ပြည်သူတို့၏ ကျန်းမာရေးကဏ္ဍအတွက် ခရိုင်ပြည်သူ့ဆေးရုံကြီး၌ ကျောက်ကပ်ဆေးစက် လှူဒါန်းပေးသည့် မြို့နယ်ဖွံ့ဖြိုးတိုးတက်ရေး အထောက်အကူပြုအဖွဲ့မှ ဦးမြင့်ဦး၊ ဦးကြည်မြင့်၊
ဦးတင်နွယ်နှင့် ဦးထွန်းနေဦးတို့လည်း ဂုဏ်ပြုမှတ်တမ်းလွှာများ ပေးချီးမြှင့်ခံရသည်။

ယင်းအပြင် တာချီလိတ်မြို့တွင်း လမ်းတံတား ဆောင်ရွက်မှုနှင့် ပတ်သက်၍ တာချီလိတ်မြို့ အနောက် မြို့ပတ်လမ်း ဖြစ်သည့် တော်ဝင်လမ်းအား ကတ္တရာလမ်းအဖြစ် ကျပ်သိန်း (၃၀၀၀) ခန့်ဖြင့် အဆင့်မြှင့်တင်သည့် သော်တာဝင်းကုမ္ပဏီ ဥက္ကဌ ဦးစိုင်းဇော်မြင့် နှင့် ပါလျှံလမ်းဆုံမီးပွိုင့်မှ ရန်အောင်မြေ ရပ်ကွက် အတွင်းသို့ ကျပ်သိန်း (၂၅၀)ဖြင့် ကတ္တရာလမ်းအား တစ်ဦးတည်းအလှူရှင်အဖြစ် ဆောင်ရွက် ခဲ့သည့် တာ့ဟွာတရုတ်ဘုံကျောင်း ဥက္ကဌ ဦးစိုင်းအောင်ခမ်းတို့အား ဂုဏ်ပြုမှတ်တမ်းလွှာများ ပေးအပ်းချီးမြှင့်သည်။

မူးယစ်၊လောင်းကစားနှင့်ခိုးမှုတို့အား လက်ဦးမှုရယူဖော်ထုတ်နိုင်ခဲ့သည့် တာချီလိတ်မြို့မရဲစခန်းမှ နယ်ထိန်း ဒုခေါင်းဆောင် ရဲအုပ်ကိုကိုဦး၊ တရားမဝင်လက်နက်၊ မူးယစ်ဆေးများဖမ်းဆီးရမိရေး စုံစမ်းထောက်လှမ်းနိုင်ခဲ့သည့် ခရိုင်ရဲတပ်ဖွဲ့မှူးရုံးမှ ခရိုင်အထူးမှုခင်းနှိမ်နှင်းရေးအဖွဲ့ ရဲအရာခံ ဇော်ဌေးတို့အား နှစ် (၇၀)ပြည့် လွတ်လပ်ရေးနေ့တွင် ဂုဏ်ပြုလွှာများ ချီးမြှင့်ခဲ့ကြောင်း သိရသည်။

အဆိုပါ အခမ်းအနားသို့ အမျိုးသားလွှတ်တော်ကိုယ်စားလှယ် ဦးစိုင်းလုံစံခတ်၊ ပြည်သူ့လွှတ်တော် ကိုယ်စားလှယ် ဦးဌေးဝင်း၊ ပြည်နယ်လွှတ်တော်ကိုယ်စားလှယ် ဦးခင်မောင်တင့်၊ တာချီလိတ်ခရိုင် အုပ်ချုပ်ရေးမှူး ဦးတင်ဝင်းရွှေ၊ တာချီလိတ်မြို့နယ် အုပ်ချုပ်ရေးမှူး ဦးထွန်းဝင်းအောင် နှင့် ဌာနဆိုင်ရာများ၊ လူမှုရေးအသင်းအဖွဲ့များ၊ တိုင်းရင်းသား ယဉ်ကျေးမှု အသင်းအဖွဲ့များ၊ နိုင်ငံရေးပါတီများ နှင့် စီးပွားရေး လုပ်ငန်းရှင်များ အပြင် ထိုင်းနိုင်ငံဘက်မှ ဧည့်သည်တော်များ တက်ရောက်ခဲ့ကြသည်။

ဓာတ်ပုံ - ဇောင်းညီ