~~~~~~~~⊰❂ unicode ❂⊱~~~~~~~~

သီပေါမြို့နယ်အတွင်း ဂျပန်ဦးနှောက်ရောင်ရောဂါကာကွယ်ဆေး မထိုးရသည့်ကလေးငယ် တစ်သောင်းကျော် ကျန်ရှိ
************
ဂျပန်ဦးနှောက်ရောင်ရောဂါကြောင့် ထိခိုက်မှုမြင့်ခဲ့သည့် ရှမ်းပြည်နယ်(မြောက်ပိုင်း) သီပေါမြို့နယ်အတွင်း ဂျပန်ဦးနှောက်ရောင်ရောဂါကာကွယ်ဆေး မထိုးနှံသည့် ကလေးငယ် (၁၂၄၂၇) ယောက်ကျန်နေကြောင်း သီပေါမြို့ ပြည်သူ့ဆေးရုံမှ ဆေးရုံအုပ်ကြီး ဒေါက်တာနန္ဒဝင်းထံမှ သိရသည်။

“ရှမ်းပြည်နယ် သီပေါအတွက်က ဂျပန်ဦးနှောက်ရောင်ရောဂါက တကယ့်ကို ရန်သူစင်စစ်ပါ။ ၂၀၁၆ ခုနှစ်မှာ သီပေါမြို့နယ်က ကလေး(၅)ဦးဂျပန်ဦးနှောက်ရောင်ခဲ့ပါတယ်။ (၄)ဦးသေပါတယ်။ (၁)ဦးက မစွမ်းမသန် ဖြစ်သွားပါတယ်။ ဒီနှစ်ကျွန်တော်ရောက်စမှာ (၁) ဦးဖြစ်ပါတယ်။ (၁) ဦးသေပါတယ်။ ဖြစ်ရင် (၁၀၀) ရာခိုင်နှုန်း ဆုံးရှုံးခဲ့ပါတယ်။ ဒါကြောင့် သူများမြို့နယ်တွေထက် သီပေါက ကလေးတွေဟာ ဂျပန်ဦးနှောက်ရောင်ရောဂါကို ပိုကာကွယ်ဖို့ လိုအပ်ပါတယ်”ဟု သီပေါမြို့ ပြည်သူ့ဆေးရုံမှ ဆေးရုံအုပ်ကြီး ဒေါက်တာနန္ဒဝင်းက တာချီလိတ်သတင်းအေဂျင်စီသို့ ပြောသည်။

လက်ရှိတွင် သီပေါမြို့နယ်အတွင်း  အသက် (၉)လမှ (၁၅)နှစ်အောက်ကလေးများအား ဂျပန်ဦးနှောက်ရောင်ရောဂါကာကွယ်ဆေးထိုးနှံခြင်းကို ကျောင်းအခြေပြု ထိုးနှံပေးမှုတွင် (၉၂)ရာခိုင်နှုန်း အောင်မြင်ခဲ့ပြီး လူထုအခြေပြုတွင် (၇၂.၆) ရာခိုင်နှုန်း၊ ဝေးလံခက်ခဲဒေသတွင် (၅၇.၉၈)ရာခိုင်နှုန်းနှင့် ကောက်သင်းကောက် ထိုးနှံပေးမှုတွင် (၀.၇)ရာခိုင်နှုန်း လွှမ်းခြုံနိုင်ခဲ့ပြီး ကာကွယ်ဆေးမထိုးနှံသည့်ကလေး (၂၂.၅)ရာခိုင်နှုန်းရှိကြောင်း သိရသည်။

ဂျပန်ဦးနှောက်ရောင်ရောဂါဖြစ်ပွားပါက သေဆုံးနိုင်မှု (၃၀)ရာခိုင်နှုန်း၊ မစွမ်းသန်ဖြစ်နိုင်မှု (၃၀)ရာခိုင်နှုန်းနှင့် ပြန်လည်ကောင်းမွန်နိုင်မှု (၃၀)ရာခိုင်နှုန်းရှိသည်ဟုဆိုသော်လည်း သီပေါမြို့နယ်တွင် ဖြစ်ပွားခဲ့မှုများတွင် သေဆုံးနှင့် မစွမ်းသန်ဖြစ်ပွားခဲ့သဖြင့် ကလေးများအား ကာကွယ်ဆေးရာနှုန်းပြည့် ထိုးပေးရန် လိုအပ်နေသော်လည်း ကျန်းမာရေးဌာနမှ လုံးဝအဝင်မခံသည့် ကျေးရွာများလည်းရှိခဲ့ကြောင်း သိရသည်။

“နောင်အန်းတို့ ဘာတို့ပေါ့။ အဲဒီနားက လေးရွာလောက်က လုံးဝမထိုးရသေးဘူး။ သူတို့နဲ့ ပတ်သက်နေတဲ့ တိုင်းရင်းသားလက်နက်ကိုင်အဖွဲ့တစ်ခုက လုံးဝမထိုးနဲ့လို့ ပြောထားတာရှိတဲ့အတွက် ရွာသားတွေက မလာရဲကြဘူး။ သူတို့(လက်နက်ကိုင်အဖွဲ့)ကတော့ အလွယ်တကူပဲ အမိန့်ထုတ်လိုက်တာပေါ့။ ထိုးလို့ တစ်ခုခုဖြစ်ရင် ကိုယ့်ဖြစ်ကိုယ်ခံတို့ ဘာတို့ အဲဒီလို ပြောထားတာဖြစ်တဲ့အတွက် ပြည်သူတွေက မလာရဲဘူး။ မလာရဲတော့ အဲဒီမှာ သူတို့ဘက်က စကားပေါက်ရောက်တဲ့သူနဲ့ ပြောရတာပေါ့”ဟု သီပေါမြို့ ပြည်သူ့ဆေးရုံမှ ဆေးရုံအုပ်ကြီး ဒေါက်တာနန္ဒဝင်းက ပြောသည်။

သီပေါမြို့နယ်အတွင်း ဝက်၊ကျွဲ၊နွားစသည့် တိရိစ္ဆာန်မွေးမြူမှုများနှင့် ဒေသအနေအထားအရ ခြင်ပေါသည့် ဒေသဖြစ်သဖြင့် ခြင်မှကူးစက်သည့် ဂျပန်ဦးနှောက်ရောင်ရောဂါဖြစ်ပွားနိုင်မှုမြင့်သဖြင့် ပတ်ဝန်းကျင် သန့်ရှင်းရေးနှင့် ခြင်နှိမ်နှင်းရေး စီမံချက်များကို အဓိကထားရေးဆွဲသွားရန် စီစဉ်နေကြောင်း ဆေးရုံအုပ်ကြီးထံမှ သိရသည်။

သတင်း #ချယ်ရီထိုက်
ဓါတ်ပုံ #တိုးချဲ့ကာကွယ်ဆေးထိုးလုပ်ငန်း