~~~~~~~~⊰❂ unicode ❂⊱~~~~~~~~

Hotel ACE ကုမ္ပဏီဥက္ကဋ္ဌ ဖြိုးကိုကိုတင့်ဆန်းပါ (၁၅)ဦးအား အမှုပေါင်း ၁၇ မှုဖွင့်၍ အထူးအမှုစစ်အဖွဲ့ဖြင့် ဆက်လက်စစ်ဆေးနေ
*************
Hotel ACE ကုမ္ပဏီဥက္ကဋ္ဌ ဖြိုးကိုကိုတင့်ဆန်းပါ (၁၅)ဦးအား ဖမ်းဆီးရမိထားသည့် မူးယစ်ဆေးဝါး၊ ဆက်သွယ်ရေးစက်၊ လက်နက်ခဲယမ်းနှင့် ဆက်စပ်ပစ္စည်းများနှင့် ပတ်သက်၍ အမှုပေါင်း (၁၇)မှုဖွင့်ထားပြီး အထူးအမှုစစ်အဖွဲ့ဖြင့် ဆက်လက်စစ်ဆေးဖေါ်ထုတ်နေကြောင်း မြန်မာနိုင်ငံရဲတပ်ဖွဲ့၏ အသိပေးထုတ်ပြန်ချက်တွင် ဖေါ်ပြထားသည်။

ဖြိုးကိုကိုတင့်ဆန်းပါ (၁၅)ဦးအား ၎င်းတို့ထံတွင် ဝှက်သိမ်းထားသော လက်နက် ခဲယမ်းများ ရှိ/ မရှိ စိစစ်ဖော်ထုတ်မှု၊ လက်နက် ခဲယမ်းများ ဝယ်ယူ၊ သယ်ဆောင်ရာ လမ်းကြောင်းနှင့် ကွင်းဆက် တရားခံ ဖော်ထုတ်မှု၊ မူးယစ်ဆေးဝါးနှင့် ပတ်သက်သည့် ကွင်းဆက် တရားခံ ဖော်ထုတ်မှု၊ တရားဝင် လုံခြုံရေး အဖွဲ့အစည်းနှင့် ဆင်တူသည့် တူညီဝတ်စုံများ၊ တံဆိပ် အမှတ်အသားများ၊ မော်တော်ယာဉ်များ၊ ခွင့်ပြုချက် မရှိဘဲ အသုံးပြုသော Drone များ၊ ဆက်သွယ်ရေးစက်များ၊ လုံခြုံရေး တပ်ဖွဲ့သုံး ဆက်စပ် ပစ္စည်းများအား အသုံးပြုနေမှုတို့နှင့် ပတ်သက်၍  အထူးအမှုစစ်အဖွဲ့ ဖွဲ့စည်း၍ ဆက်လက် စစ်ဆေးလျက် ရှိကြောင်း သိရသည်။

နေပြည်တော် အပြည်ပြည်ဆိုင်ရာ လေဆိပ်မှ မြန်မာ့အမျိုးသား လေကြောင်းလိုင်း၊ နေပြည်တော်- ရန်ကုန် ခရီးစဉ်အမှတ် UB-142 ဖြင့် လိုက်ပါမည့် ခရီးသည် ဖြိုးကိုကိုတင့်ဆန်း၊ ရဲမင်းဆွေ၊ ဇော်ဝင်းထိုက်တို့အား အောက်ိုဘာလ (၁၅)ရက်နေ့ ည (၇)နာရီအချိန်တွင် ၎င်းတို့နှင့်အတူ ပါရှိသော ခရီးဆောင်အိတ်အတွင်းမှ WY စာတန်းပါ စိတ်ကြွ ရူးသွပ်ဆေးပြား (၁၂)ပြားနှင့် ICE ဟုယူဆရသော (အဖြူရောင်အခဲ) (၁.၅)ဂရမ်၊ ပစ္စတို (၂)လက်နှင့် ကျည်မျိုးစုံ (၇၂)တောင့်၊ National Security Council (US-609) စာတန်းပါ လည်ဆွဲကဒ် (၁)ခု၊ Drone (၁)ခု၊ PHYO KO KO TINT SAN (US-609) အမည်ပါ အထူးနိုင်ငံကူးလက်မှတ် (၁)အုပ်၊ အနက်ရောင် မှန်ဘီလူး (၁)လက်၊ ကင်မရာမျိုးစုံ (၆)လုံး၊ စကားပြောစက် (၃)လုံးနှင့် အခြားဆက်စပ် ပစ္စည်းများ သိမ်းဆည်းရမိခဲ့ပြီး ၎င်းတို့ လေဆိပ်သို့ စီးနင်းလာသည့် YGN 2C-5759 နံပါတ်ပါ အနက်ရောင် HUMMER မော်တော်ယာဉ် (၁)စီးတို့နှင့်အတူ ဖမ်းဆီးရမိခဲ့၍ လယ်ဝေးမြို့နယ်၊ အေလာနယ်မြေရဲစခန်း မယ(ပ) ၃/၂၀၁၇၊ မူးယစ်ဆေးဝါးနှင့် စိတ်ကို ပြောင်းလဲစေတတ်သော ဆေးဝါးများ ဥပဒေပုဒ်မ ၁၅/၁၆(ဂ)/ ၂၂(ခ)/ ၂၁ ဖြင့် စတင် အမှုဖွင့် အရေးယူခဲ့ခြင်းဖြစ်ကြောင်း သိရသည်။

ယင်းနောက် စစ်ဆေး ဖော်ထုတ်ချက်များအရ အောက်တိုဘာလ (၁၆) ရက်နေ့တွင် နေပြည်တော်၊ ဒက္ခိဏသီရိ မြို့နယ်ရှိ ဖြိုးကိုကိုတင့်ဆန်းပိုင် Hotel ACE တွင် ရှာဖွေရာ ပစ္စတိုမျိုးစုံ (၈)လက်၊ ကျည်မျိုးစုံ (၈၉၅)တောင့်၊ ကျည်ကာအကျႌ (၁)ထည်၊ စနိုက်ပါမှန်ပြောင်း (၁)လက်နှင့် ဆက်စပ်ပစ္စည်းများ ထပ်မံ သိမ်းဆည်း ရမိခဲ့ပြီး Hotel ACE မှ ဝန်ထမ်းများ ဖြစ်သော သီဟ၊ အောင်နိုင်၊ ရန်အောင်စိုး၊ ဂျိုးဇက်(ခ) စယောသ၊ ဇင်ကိုလတ်(ခ) ဇင်ကို၊ အောင်ရဲဖြိုး၊ မျိုးမြင့်ဇော်(ခ) ကိုမျိုးနှင့် ခင်မျိုးဝင်းတို့ (၈)ဦးအား အမှုဖြင့် ဖမ်းဆီး စစ်ဆေးခဲ့ကြောင်း သိရသည်။

ရန်ကုန် တိုင်းဒေသကြီး၊ သာကေတမြို့နယ်ရှိ ဖြိုးကိုကိုတင့်ဆန်းပိုင် ACE Group of Companies အဆောက်အဦကို အောက်တိုဘာလ (၁၆)ရက်နေ့တွင် ရှာဖွေ စစ်ဆေးရာ ACE ဟိုတယ် မန်နေဂျာ ဖြိုးဗိုလ်ဗိုလ်နှင့် အတူ M-16 သေနတ် (မောင်းတုံးမပါ) (၁)လက်၊ M-16 ပုံစံ သံဘောစေ့ ထည့်ပစ်ရသည့် ပြောင်းရှည် သေနတ် (၁)လက်၊ ကျည်ကာ အကျႌပုံစံ ချုပ်ထားသော အနက်ရောင်တူညီ ဝတ်စုံ Waist Coat (၁၅)ထည်၊ Drone (၅)ခု၊ ၉မမ ပစ္စတိုကျည် (၂)တောင့်၊ သံဘောစေ့ (၁၀၀)လုံး၊ WY စာတန်းပါ စိတ်ကြွ ရူးသွပ်ဆေးပြား (၈)ပြား၊ လက်နက်ငယ် သေနတ်တွင် တပ်ဆင် အသုံးပြုသည့် ပြောင်းရှည် (၁)ခု၊ မောင်းတုံး (၁)ခု၊ စကားပြောစက် (၉)လုံး၊ အဝေးကြည့် မှန်ပြောင်း (၁)လက်၊ စနိုက်ပါမှန် ပြောင်း(၁)လက်၊ ကွန်ပျူတာ လက်တော့ (၂)လုံးနှင့် ဆက်စပ် ပစ္စည်းများ သိမ်းဆည်းရမိပြီး ဖြိုးကိုကိုတင့်ဆန်း ငှားရမ်း နေထိုင်သည့် ဗဟန်းမြို့နယ်၊ ရွှေတောင်ကြား (၁)ရပ်ကွက်၊ ငွေဝတ်မှုန် ရိပ်သာလမ်းရှိ နေအိမ်တွင် ရှာဖွေရာ စကားပြောစက် (၁)လုံး၊ ၅.၅၆ ကျည်(၃) တောင့်၊ WY စာတန်းပါ စိတ်ကြွရူးသွပ် ဆေးပြား (၂)ပြားတို့အား သိမ်းဆည်း ရမိခဲ့ခြင်းဖြစ်ကြောင်း သိရသည်။

ရန်ကုန်မြို့ရှိ ACE Group of Companies အဆောက်အဦရှေ့ ယာဉ်ရပ်နားကွင်းတွင် ရပ်ထားသော YGN 2N-5445 နံပါတ်ပါ HUMMER အနက်ရောင် မော်တော်ယာဉ်ပေါ်မှ ပလပ်စတစ် ဘောစေ့ ထည့်ပစ်ခတ်ရသော ပလပ်စတစ် ကိုယ်ထည် ပစ္စတိုပုံစံ(၁) လက်၊ ACE ဝန်ထမ်း စိုးမြင့်ကျော်နှင့် ချမ်းငြိမ်းအောင်တို့ထံမှ စကားပြောစက် (၁)လုံး၊ မူးယစ် ဆေးဝါးသုံးစွဲရာ၌ အသုံးပြုသော ဆက်စပ် ပစ္စည်းများ၊ သံဘောစေ့ဖြင့် ပစ်ခတ်ရသည့် ပစ္စတို သေနတ် (၂)လက်၊ ၅.၅၆ ကျည် (၁၀) တောင့်တို့အား အောက်တိုဘာလ (၁၇)ရက်နေ့တွင် သိမ်းဆည်းရမိပြီး အဆိုပါနေ့မှာပင် နေပြည်တော် Hotel ACE အခန်းများနှင့် ခြံဝင်းအတွင်း ဝှက်ထားသည့် Drone (၇)ခု၊ ပစ္စတို (၃)လက် (အပျက် ၁ လက် အပါအဝင်)၊ M-21 (၁)လက် (အပျက်)၊ M-16 (၄)လက်၊ ကျည်မျိုးစုံ (၂၁၇) တောင့်တို့အား ထပ်မံ သိမ်းဆည်း ရရှိခဲ့ကြောင်း သိရသည်။
နေပြည်တော်ရှိ Hotel ACE လုံခြုံရေး ရုံးခန်းအတွင်းမှ စကားပြောစက် (၂၁)လုံး၊ ဒူးလေး (၃)လက်နှင့် ဆက်စပ် ပစ္စည်းများအား အောက်တိုဘာလ (၁၈)ရက်နေ့တွင်  ထပ်မံသိမ်းဆည်းရမိကာ အောက်တိုဘာလ (၁၉)ရက်နေ့တွင် အဆိိုပါဟိုတယ်ဝင်း အတွင်းမှ National Security Council စတစ်ကာ တံဆိပ်များ တပ်ထားပြီး ယာဉ်ခေါင်မိုးပေါ်တွင် မီးတန်းများ တပ်ဆင်ထားသည့် အနက်ရောင် HUMMER မော်တော်ယာဉ် (၃)စီး၊ စစ်စိမ်းရောင် အကျႌလက်တို (၁)ထည်၊ ပြောက်ကျားအကျႌ (၁)ထည်တို့အား သိမ်းဆည်းရမိခဲ့ကြောင်း သိရသည်။

သိမ်းဆည်းရမိသည့် NATIONAL SECURITY COUNCIL ကြေးပြားတံဆိပ်များကို နေပြည်တော်၊ ဇမ္ဗူသီရိမြို့နယ်၊ သစ္စာလမ်းရှိ နန်းသပြေဆိုင်တွင် ပြုလုပ်ကြောင်း သိရသဖြင့် အောက်တိုဘာလ (၁၉)ရက်နေ့တွင် အဆိုပါ ဆိုင်အား ရှာဖွေပြီး ဆိုင်ရှင်ကိုလည်း အမှုဖွင့် အရေးယူထားကြောင်း သိရသည်။
နေပြည်တော်၊ ဒက္ခိဏသီရိမြို့နယ်၊ ရှုမဝလမ်းနှင့် ရွှေသပြေလမ်းဒေါင့်ရှိ ဖြိုးကိုကိုတင့်ဆန်း၏ နေအိမ်အား အောက်တိုဘာလ (၂၀)ရက်နေ့တွင် ရှာဖွေရာ ပစ္စတိုသေနတ် (၁)လက်၊ ၉မမကျည် (၈)တောင့်တို့အား သိမ်းဆည်းရမိပြီး အောက်တိုဘာလ (၂၃)ရက်နေ့တွင် အဆိုပါသိမ်းဆည်း ရရှိထားသော M-16 သေနတ်ဒင်၊ ဘက်ထရီ ထည့်သည့် အပေါက်အတွင်းမှ ICE အဖြူရောင်အခဲ (၃.၀၅) ဂရမ်နှင့်  နေပြည်တော် Hotel ACE ရုံးခန်းအတွင်းမှ Drone (၁)ခုတို့အား ထပ်မံ သိမ်းဆည်း ရမိခဲ့ကြောင်း သိရသည်။

ဖြိုးကိုကိုတင့်ဆန်းသည် မြန်မာနိုင်ငံ မြားပစ်အဖွဲ့ချုပ် ဥက္ကဋ္ဌနှင့် မြန်မာနိုင်ငံ သေနတ်ပစ် အဖွဲ့ချုပ် ဒုတိယဥက္ကဋ္ဌ အဖြစ် တာဝန်ယူ ဆောင်ရွက်လျက်ရှိပြီး ၂၀၀၅ ခုနှစ်က တရုတ်နိုင်ငံ၊ ရှန်ဟိုင်းမြို့တွင် ကျင်းပသော အာရှအားကစား ပြိုင်ပွဲသို့ မြန်မာနိုင်ငံ မြားပစ်အဖွဲ့ချုပ် ဥက္ကဋ္ဌအဖြစ် သွားရောက်စဉ်က ထုတ်ပေးထားသည့် အထူးနိုင်ငံကူးလက်မှတ်အား ပြန်လည် ရောက်ရှိချိန်က သက်ဆိုင်ရာ ဝန်ကြီးဌာနသို့ အပ်နှံရမည် ဖြစ်သော်လည်း အပ်နှံခြင်းမရှိဘဲ  လက်ဝယ်တွင် ကိုင်ဆောင်ထားမှုနှင့် မော်တော်ယာဉ်များတွင် လုံခြုံရေး ဆောင်ရွက်သည့် ယာဉ်များကဲ့သို့ မီးတန်းများ တပ်ဆင်ခြင်း၊ National Security Council (SPECIAL FORCE) SPIRIT DISPILINE POWER စတေကာကပ်တပ်ဆင်၍ အသုံးပြုမှုတို့ကိုလည်း အမှုဖွင့် အရေးယူ စစ်ဆေးလျက် ရှိကြောင်း သိရသည်။

 ဖြိုးကိုကိုတင့်ဆန်း ပါ (၁၅) ဦးတို့နှင့်အတူ  WY စိတ်ကြွ ရူးသွပ်ဆေးပြား(၂၂)ပြား၊ ICE ၄.၅၅ ဂရမ်ခန့်နှင့် စိတ်ကြွဆေးပြား သုံးစွဲရာ၌ အသုံးပြုသည့် ဆက်စပ်ပစ္စည်းများ၊ ပစ္စတိုသေနတ် (၁၄)လက် (အပျက် ၁ လက် အပါအဝင်)နှင့် ၎င်းကျည် (၁၀၈၂)တောင့်၊ မောင်းပြန်ရိုင်ဖယ် (၆)လက် (အပျက် ၁ လက်၊ မောင်းတုံးမပါ ၁ လက်)၊ ၎င်းကျည် (၁၂၅)တောင့်နှင့် ဆက်စပ် ပစ္စည်းများ၊ သံဘောစေ့/ ပလပ်စတစ် ဘောစေ့ဖြင့် ပစ်ခတ်ရသည့် သေနတ် (၄)လက် (ပလပ်စတစ်/ သံကိုယ်ထည် ပစ္စတိုပုံစံ ၃ လက်၊ M-16 ပုံစံ ၁ လက်)၊ စကားပြောစက် (၃၅)လုံး (အထိုင်စက် ၃ လုံးပါ)နှင့် ဆက်စပ် ပစ္စည်းများ၊ Drone (၁၄)ခု၊ တရားမဝင် တံဆိပ်များ၊ ကျည်ကာ အကျႌပုံစံ ချုပ်ထားသော အနက်ရောင် တူညီဝတ်စုံ Waist Coat (၁၅)ထည်၊ ဒူးလေး (၃)လက် (ကြိုးပါ ၁၊ ကြိုးမပါ ၂)၊ ကျည်ကာအကျႌ (၁)ထည်တို့အား သိမ်းဆည်း ရမိခဲ့ခြင်းဖြစ်ကြောင်း သိရသည်။

အဆိုပါ ဖမ်းဆီးရမိမှုများနှင့်ပတ်သက်၍ နေပြည်တော်နှင့် ရန်ကုန် တိုင်းဒေသကြီးတို့ရှိ သက်ဆိုင်ရာ ရဲစခန်းများတွင် မူးယစ်ဆေးဝါးနှင့် စိတ်ကို ပြောင်းလဲ စေတတ်သော ဆေးဝါးများ ဆိုင်ရာ ဥပဒေပုဒ်မ ၁၅/ ၁၆(ဂ)/ ၂၂(ခ)/ ၂၁ အရ အရေးယူမှု (၂)မှု၊ ၁၅/ ၁၆(ဂ)အရ အရေးယူမှု (၁)မှု၊ ၁၆(ဂ)/၂၂(ခ)အရ အရေးယူမှု (၁)မှု ပေါင်း(၄)မှု၊ ဆက်သွယ်ရေး ဥပဒေပုဒ်မ ၆၇ အရ အရေးယူမှု (၄)မှု၊ ပို့ကုန်/ သွင်းကုန်ဥပဒေ ပုဒ်မ ၈ အရ အရေးယူမှု (၃)မှု၊ မြန်မာနိုင်ငံတော် အစိုးရ လျှို့ဝှက်ချက် အက်ဥပဒေပုဒ်မ ၆(၁) (က) (င) အရ အရေးယူမှု(၃)မှု၊ လက်နက် (ယာယီ ပြင်ဆင်ချက်) အက်ဥပဒေပုဒ်မ ၁၉-က အရ အရေးယူမှု(၁)မှု၊ လက်နက်ဥပဒေ ပုဒ်မ ၁၉(စ)အရ အရေးယူမှု (၁)မှု ပေါင်း (၂)မှု၊ ရာဇသတ်ကြီး ပုဒ်မ ၄၈၄ အရ အရေးယူမှု (၁)မှု၊ စုစုပေါင်း (၁၇)မှုဖြင့် အမှုဖွင့် အရေးယူ စစ်ဆေး ဆောင်ရွက်လျက် ရှိကြောင်း သိရသည်။

ဓါတ်ပုံ #ပြည်ထဲရေး