ရှမ်းပြည်နယ်(တောင်ပိုင်း) တောင်ကြီးမြို့ မြို့မရဲစခန်းမှ အချုပ်တရားခံ(၅)ဦးက စက်တင်ဘာလ (၃၀)ရက်နေ့ ညနေ (၃)နာရီခန့်တွင် တာဝန်ကျရဲတပ်ဖွဲ့ဝင်(၅)ဦးအား တိုက်ခိုက်၍ ထွက်ပြေးသဖြင့် အချုပ်မှထွက်ပြေးရန် ကြံစည်မှု၊ ပြည်သူ့ဝန်ထမ်းအား တာဝန်ထမ်းဆောင်ခြင်းမှ ဟန့်တားရန် နာကျင်စေမှုနှင့် အားပေးကူညီမှုတို့ဖြင့် အမှုဖွင့်စစ်ဆေးနေကြောင်း သိရသည်။

မြို့မရဲစခန်း အချုပ်ခန်း အမှတ်(၁)ရှိ အမျိုးသား အချုပ်သားများ၏ အိပ်ယာထုပ်များအား ကင်းမှူး ရဲတပ်ကြပ်နှင့် ကင်းသားများဖြစ်သည့် ရဲဒုတပ်ကြပ်၊ ရဲတပ်သားနှစ်ဦး စုစုပေါင်း(၄)ဦးက အချုပ်ခန်း ဗူးတံခါးအားဖွင့်၍ သွင်းနေစဉ် အဆိုပါ အချုပ်ခန်းအတွင်းရှိ မူးယစ်ဆေးဝါးမှုဖြင့် တရားရုံး စစ်ဆေးဆဲဖြစ်သည့် စိုင်းပြည့်စုံသူက ရဲတပ်ကြပ် စိုးဦးအား အချုပ်သားများ၏ စားကြွင်းစားကျန် ငါးပိရည်ဖြင့်ပက်၍ လက်သီးဖြင့်ထိုးပြီး မူးယစ်ဆေးဝါးမှုများဖြင့် အမှုရင်ဆိုင်နေရသူများဖြစ်သည့် မောင်မောင်သိန်း၊ နိုင်ထူး၊ မောင်မောင်ဖြိုး(ခ)အင်းသားနှင့် မြင့်မောင်မောင်(ခ) စမန်တို့ လေးဦးက အမှတ်(၁)ဗူးတံခါးအား ဆွဲဖွင့်ကာ အိပ်ယာထုပ်များ ထည့်နေသည့် ရဲတပ်ကြပ် စိုးဦးပါ တပ်ဖွဲ့ဝင်(၄)ဦးအား ဝိုင်းဝန်းထိုးကြိတ်ခဲ့ကြခြင်းဖြစ်ကြောင်း သိရသည်။

ထွက်ပြေးရန်ကြိုးစားသည့် တရားခံ(၅)ဦးအား တားဆီးသည့် တာဝန်ကျရဲတပ်ဖွဲ့ဝင် (၄)ဦးနှင့် စခန်း အုပ်ချုပ် ရဲတပ်ကြပ်ကြီးတို့အား အချုပ်ခန်းဗူးတံခါး ချည်နှောင်ထားသည့် သံကြိုး၊ ကင်းသံချောင်းများဖြင့် တိုက်ခိုက်ခဲ့သဖြင့် ရဲတပ်ကြပ်ကြီး ကျော်ထွန်း၊ ရဲတပ်ကြပ် စိုးဦး၊ ရဲတပ်သား စိုင်းနော်ဆိုင်ဖ၊ ရဲတပ်သား ရဲကျော်ကျော်၊ ရဲဒုတပ်ကြပ် ဝေမင်းအောင်နှင့် ရဲတပ်ကြပ် စိုးဦးတို့တွင် ဒဏ်ရာအသီးသီးရသွားကြောင်း သိရသည်။

ရဲတပ်ဖွဲ့ဝင်(၅)ဦးအား ဝိုင်းဝန်းထိုးကြိတ်၍ အချုပ်ခန်းတွင်းမှ ထွက်ပြေးရန် အချုပ်ခန်း လျှောက်လမ်း အတွင်းသို့ ရောက်ရှိလာသည့် အချုပ်တရားခံ(၅)ဦးအား ရဲအုပ်ထွန်းထွန်းဝင်းပါ ရဲတပ်ဖွဲ့ဝင်(၄)ဦးနှင့် စခန်းသို့ ရောက်ရှိနေသည့် အရပ်သား(၂)ဦးတို့က ပူးပေါင်း၍ထိန်းသိမ်းနိုင်ခဲ့ခြင်းဖြစ်ကြောင်း သိရသည်။

အချုပ်တရားခံများ တိုက်ခိုက်မှုကြောင့် ဒဏ်ရာရရဲတပ်ဖွဲ့ဝင်များအနက် ရဲတပ်ကြပ်ကြီး ကျော်ထွန်း ပါ(၃)ဦးအား စဝ်စံထွန်းဆေးရုံသို့ ပို့ဆောင်ခဲ့ရကြောင်း သိရသည်။

အချုပ်ခန်းမှထွက်ပြေးရန်ကြိုးစားသည့် တရားခံ မောင်မောင်သိန်း ပါ(၅)ဦးအား တောင်ကြီးမြို့မ ရဲစခန်းတွင် (ပ)၈၇၂/၂၀၁၇၊ ရာဇသတ်ကြီးပုဒ်မ ၂၂၄/ ၃၃၂/၁၁၄ (အချုပ်မှ ထွက်ပြေးရန် ကြံစည်မှု/ပြည်သူ့ဝန်ထမ်းအား တာဝန်ထမ်းဆောင်ခြင်းမှ ဟန့်တားရန် နာကျင်စေမှု/အားပေးကူညီမှု)ဖြင့် အမှုဖွင့် စစ်ဆေးလျက်ရှိကြောင်း သိရသည်။

အချုပ်ခန်းမှ ထွက်ပြေးရန်ကြံစည်သူ(၅)ဦးမှာ ပင်းလောင်မြို့မ ရဲစခန်း မယ (ပ)၃၄/၂၀၁၇၊ မူး/စိတ်ပုဒ်မ ၁၅/၁၉(က)/၂၁ အမှုမှ တရားရုံးစစ်ဆေးဆဲ တရားခံ စိုင်းပြည့်စုံသူ၊ တောင်ကြီးမြို့မရဲစခန်း မယ(ပ)၃၂/၂၀၁၆၊ မူး/စိတ်ပုဒ်မ ၁၅/၁၉(က) တရားရုံး စစ်ဆေးဆဲ တရားခံ မောင်မောင်သိန်း၊ တောင်ကြီး နယ်မြေရဲစခန်း မယ(ပ)၉၀/၂၀၁၆၊ မူး/စိတ်ပုဒ်မ ၁၅/၁၉(က)/၂၁ အမှုဖြင့် စက်တင်ဘာလ ၂၉ ရက်နေ့တွင် တရားရုံးမှ ထောင်ဒဏ်(၁၁)နှစ် ပြစ်ဒဏ် ချမှတ်ခဲ့သည့် တရားခံ နိုင်ထူး၊ တောင်ကြီးမြို့မ ရဲစခန်း မယ(ပ) ၃၀/၂၀၁၇၊မူး/စိတ်ပုဒ်မ ၁၅/၁၉(က) အမှုဖြင့် တရားရုံးစစ်ဆေးဆဲ တရားခံ မောင်မောင်ဖြိုး (ခ)အင်းသားနှင့် ပင်လောင်းမြို့မရဲစခန်း မယ(ပ)၃၄/၂၀၁၇၊ မူး/စိတ်ပုဒ်မ ၁၅/၁၉(က)/၂၁ အမှုဖြင့် တရားရုံးစစ်ဆေးဆဲ တရားခံ မြင့်မောင်မောင်(ခ)စမန် တို့ဖြစ်ကြောင်း သိရသည်။

သတင်း #နန်းဟွမ်ခမ်း