~~~~~~~~⊰❂ unicode ❂⊱~~~~~~~~

မကွေးမြို့နယ် ဘောလုံးလက်ရွေးစင်ဟောင်းများအသင်း ပထမအကြိမ်သက်ကြီးပူဇော်ပွဲပြုလုပ်
**********
မကွေးမြို့နယ် ဘောလုံးလက်ရွေးစင်ဟောင်းများ ပထမအကြိမ် သက်ကြီးပူဇော်ပွဲကို အောက်တိုဘာ (၅)ရက်နေ့က မကွေးခရိုင်အားကစားကွင်းအတွင်း၌ ကျင်းပရာ အသက် (၇၀)ကျော် မြို့နယ်လက်ရွေးစင် ဘောလုံးသမားဟောင်း (၁၀)ဦး ကန်တော့ခံတက်ရောက်ကြကြောင်း သိရသည်။

"မကွေးမြို့နယ်အတွင်းက ဘောလုံးသမားဟောင်းကြီးတွေ တစ်နေရာထဲ တစ်ချိန်ထဲမှာ ပြန်လည် တွေ့ဆုံခွင့်ရတာကြောင့်ရယ် ၊ငယ်ဘဝအမှတ်တရအနေနဲ့ ဒီနေ့ဘောလုံးကစားခွင့်ရတာကြောင့်ရယ် အတိုင်းမသိ ဝမ်းသာကြည်နူးရပါတယ်" ဟု မကွေးတိုင်းဘောလုံးလက်ရွေးစင်ဟောင်း ဦးကျော်ထူးက တာချီလိတ်သတင်းအေဂျင်စီသို့ ပြောသည်။

မကွေးမြို့နယ်ဘောလုံးလက်ရွေးစင်ဟောင်းများအသင်းအား ၂၀၁၇ ခုနှစ် ဇန်နဝါရီလက ဖွဲ့စည်းခဲ့ခြင်းဖြစ်ပြီး ယနေ့ကျင်းပသည့် သက်ကြီးပူဇော်ပွဲတွင် အသက်(၇၀)ကျော် မြို့နယ်လက်ရွေးစင် ဘောလုံးသမားဟောင်း (၁၀)ဦးအား ငွေကျပ်သုံးသောင်း၊ အကျင်္ ီ၊ လုံချည် နှင့် မျက်နှာသုတ်ပုဝါတို့ဖြင့် ကန်တော့ကြပြီး ဘောလုံးသမားဟောင်းများ အမှတ်တရဘောလုံးပွဲနှင့် ညစာစားပွဲကျင်းပခဲ့ကြောင်း သိရသည်။

"အသင်းက အသက်(၇၀)နဲ့အထက် လက်ရွေးစင်ဟောင်းကြီးတွေကို ပထမဆုံးအကြိမ် ကန်တော့တဲ့ပွဲပါ။ အသင်းဖွဲ့စည်းရတဲ့ရည်ရွယ်ချက်က ဘောလုံးသမားဟောင်းကြီးတွေရဲ့ သာရေးနာရေးတို့ကို ဆောင်ရွက်ဖို့ရယ် ၊မကွေးတိုင်းရဲ့ဘောလုံးရာဇဝင်ကလည်း မညံ့ခဲ့တာကြောင့် နောက်မျိုးဆက်သစ်ဘောလုံးသမားတွေကိုလည်း စိတ်ဓာတ်နဲ့ စည်းလုံးညီညွတ်ပုံတွေကို လက်ဆင့်ကမ်းပြီး တိုင်းဂုဏ်ဆောင်နိုင်တဲ့ ဘောလုံးသမားကောင်းတွေ ပေါ်ထွက်လာဖို့ရယ် ရည်ရွယ်ဖွဲ့စည်းတာဖြစ်ပါတယ်" ဟု အသင်းဥက္ကဋ္ဌ တိုင်းလက်ရွေးစင် ဟောင်း ဦးအောင်ကျော်ဦးက ပြောသည်။

အဆိုပါ အသင်းအား မကွေးမြို့နယ်လက်ရွေးစင်ဘောလုံးသမားများထဲမှ မတည်ငွေထည့်ဝင်ပြီး အသင်းဝင် (၆၀)ကျော်က လစဉ် ကျပ်(၂၀၀၀) ရန်ပုံငွေထည့်ဝင်ခဲ့ခြင်းဖြစ်ကြောင်းသိရသည်။

သတင်း၊ ဓာတ်ပုံ #ဖီးနစ်