~~~~~~~~⊰❂ unicode ❂⊱~~~~~~~~

ဖရူဆိုမြို့နယ် ထီဖရူနူသဘာဝလိုဏ်ဂူဒေသတွင် ဖေါ်ဆောင်မည့် ရပ်ရွာအခြေပြုခရီးသွားလုပ်ငန်းအား ဒေသခံများ ကန့်ကွက်ရန်ကြိုးစား
*************
ကယားပြည်နယ်၊ ဖရူဆိုမြို့နယ် ၊ မူဆိုကျေးရွာအုပ်စု မော်သီဒိုကျေးရွာရှိ သဘာဝ ထီဖရူနူရေထွက် သဘာဝလိုဏ်ဂူဒေသတွင် ခရီးသွားများ လည်ပတ်မှုများလာပါက သဘာဝပတ်ဝန်းကျင်ပျက်စီးမှုနှင့် ရိုးရာ ဓလေ့ယဉ်ကျေးမှုများ ထိခိုက်မှုဖြစ်လာမည်ကို စိုးရိမ်သည့် ဒေသခံများက အဆိုပါဒေသတွင် ဖေါ်ဆောင်မည့် ရပ်ရွာအခြေပြုခရီးသွားလုပ်ငန်းအား ကန့်ကွက်ရန်ကြိုးစားနေကြောင်း သိရသည်။

ဖရူဆိုမြို့နှင့် ဆယ်မိုင်ခန့်အကွာရှိ ထီဖရူနူဂူတွင် ရေတံခွန်ငယ်များ၊ ကျောက်စက်ပန်းဆွဲများနှင့် မြေအောက်ဂူများရှိနေခြင်းကြောင့် ရပ်ရွာအခြေပြုခရီးသွားလုပ်ငန်း ဖေါ်ဆောင်ရန် ပြည်နယ်အစိုးရအဖွဲ့က လေ့လာနေခြင်းဖြစ်ကြောင်း သိရသည်။

" ကျွန်မတို့ ဘာလို့ ကန့်ကွက်လဲဆို ဒီနောက်ပိုင်း လာတဲ့သူတွေ အရမ်းများလာတယ်။ လာတာတော့ အစက ဘာမှ မဖြစ်ဘူး။ နောက်ပိုင်းကျတော့ အမှိုက်တွေ ပစ်ချင်တိုင်းပစ်ခဲ့တယ်။ ကျွန်မတို့တွေ လိုက်ကောက်ရတယ်။ အမှိုက်အိတ်ထားပေးလည်း ပစ်တာပဲ။ ဒီဂူက ကျွန်မတို့ရဲ့ ဘိုးဘွားစဉ်ဆက်က ရိုးရာသမိုင်းကြောင်းတွေနဲ့ ရှိခဲ့တာ။ နောက်ပြီး သမီးရည်းစားတွေ လာကြတယ်။ မဖွယ်မရာလုပ်တာတွေ ရှိတယ်။ ကိုယ်တိုင်လည်း မြင်ခဲ့ရတယ်။ လူငယ်တွေ အုပ်စုလိုက်လာတယ်။ အရက်သောက်တယ်။ ရန်ဖြစ်ကြတယ်ပေါ့။ ကြာလာရင် ဘယ်လိုမှ မဖြစ်နိုင်တော့ဘူး။ အရင်လိုပဲ ကျွန်မတို့ပြန်ထားတော့မယ်။ လာခွင့်မပြုတော့ဘူး။ အခု ဒီဂူနဲ့ သဘာဝပတ်ဝန်းကျင် ရွာ (၁၃) ရွာ လောက် လက်မှတ်ထိုးပြီး ကန့်ကွက်ကြမယ်"ဟု အဆိုပါလိုဏ်ဂူအနီးရှိ မော်သီဒိုကျေးရွာမှ ဒေါ်ဇူဇံနာက တာချီလိတ်သတင်းအေဂျင်စီသို့ပြောသည်။

အဆိုပါ သဘာဝလှိုဏ်ဂူမှာ ဖရူဆိုမြို့နှင့် ဒီးမော့ဆိုမြို့များ၏ အဓိကရေအရင်းမြစ်ဖြစ်ပြီး ငွေတောင်ချောင်း၊ ကွိုင်ငံရေထွက်ပေါက်တို့၏ အရင်းအမြစ်နေရာဖြစ်သဖြင့် စည်းကမ်းမဲ့အမှိုက်စွန့်ပစ်ခြင်းများက ရေထုညစ်ညမ်းမှုနှင့် ရေအရင်းအမြစ်အား ထိခို်က်စေမည်ကို စိုးရိမ်သည့်အပြင် ခရီးသွားလုပ်ငန်း ဧရိယာသတ်မှတ်ဖေါ်ဆောင်ပါက သဘာဝသားရဲတိရိစ္ဆာန်များ ရှားပါးခြင်းနှင့် အိမ်မွေးတိရစ္ဆာန်များအတွက် စားကျက်မြေများလည်း ကျဉ်းမြောင်းလာမည်ကို ဒေသခံများက စိုးရိမ်ခြင်းဖြစ်ကြောင်း သိရသည်။

" ဒီဂူရဲ့ ရေနဲ့ အနီးဆုံးနေရာမှာ ကျွန်တော်တို့ရွာ ရှိပါတယ်။ ဒီဂူရဲ့ ရေက ရေထွက်တွေရဲ့ငွေတောင်ချောင်းရဲ့ အဓိက အကျဆုံး ရေးအရင်းမြစ်ပါ။ ဒါတွေ ညစ်ညမ်းသွားမှာ။ ပြီးတော့ ဒီခရီးသွားလုပ်ငန်းသာလုပ်ရင် ကျွန်တော်တို့တောလိုက်နေကျ သားကောင်တွေရဲ့နေရာ ပြီးတော့ တောင်ယာတွေ လုပ်ဖို့နေရာတွေ တော်တော်ကျဉ်းမြောင်း လာမယ်။ ဒါကြောင့် မလုပ်စေချင်ဘူး။ ပြီးတော့ လင်းနို့ချေးကနေ ယမ်း လုပ်တာပေါ့။ ဒီလုပ်ငန်းလည်း ပျက်စီးလာမယ်။ ဒါကြောင့် ကန့်ကွက်မှာပါ။ အထူးအဆန်း ဒီဂူကို လာကြည့်ချင်တဲ့သူတော့ ရှိမှာပဲလေ။ ကျွန်တော့်တစ်ယောက်အမြင်အရဆို လာလို့ရတယ်။ ဒါပေမဲ့ စည်းကမ်းမဲ့တာ အဆိုးဆုံး၊ မဖွယ်မရာလုပ်တာတွေက လုံးဝ ဒီမကိုက်ဘူးပေါ့။ ဒါတွေ မရှိရင် တစ်မျိုးပေါ့" ဟု  ထီဖရူနူ ဂူအနီးရှိ ဟန်လီကျေးရွာမှ ဦးတောရယ်က ပြောသည်။

အဆိုပါကိစ္စနှင့် ပတ်သက်၍ အစိုးရအနေဖြင့့် လုပ်ငန်းအကောင်အထည်ဖေါ်မည်ဆိုပါက ဒေသခံများ၏စိုးရိမ်မှုများကို ထည့်သွင်းစဉ်းစားရန် လိုအပ်သည်ဟု အရပ်ဖက်အဖွဲ့များက ထောက်ပြ ပြောဆိုထားသည်။

" အဓိက ဒေသခံတွေကိုလေးစားဖို့ လိုတယ်။ သူတို့ အခုလိုစိုးရိမ်လာတာလည်း သဘာဝကျပါတယ်။ အဓိက ဒီလုပ်ငန်းတွေနဲ့ ပတ်သက်တဲ့ အသိပညာပေးမှုတွေ ပြီးတော့ အကျိုးအမြတ်ကို ဘယ်လိုယူရမလဲဆိုတာတွေ နောက်သူတို့အတွက် ဘယ်လို အာမခံချက်မျိုးပေးဖို့ဆိုတာတွေ ထည့်သွင်းစဉ်းစားရပါမယ်။ သူတို့က မသိပါဘူး ဆိုပြီး စီးပွားရေးလုပ်ငန်းရှင်တွေကပဲဖြစ်ဖြစ် အစိုးရကပဲဖြစ်ဖြစ် ဒါမလေးစားလို့မရဘူး။ သူတို့နဲ့ဆွေးနွေးရမယ်။ ဒီဂူနဲ့ ပတ်သက်တဲ့ရွာတွေ အကုန်ပေါ့ ခေါ်ယူဆွေးနွေးဖို့လိုတယ်။ သူတို့ လက်မခံရင် အတင်းမလုပ်ဖို့ပေါ့။ ဒါတွေအရေးကြီးပါတယ် "ဟု  ကရင်နီပြည်တောင်သူလယ်သမားသမဂ္ဂမှ ကိုဒီးဒီက ပြောသည်။

ဒေသတွင်း ရပ်ရွာအခြေပြုခရီးသွားလုပ်ငန်းအား ကန့်ကွက်လိုအနီးဝန်းကျင်ကျေးရွာများမှ ကိုယ်စားလှယများသည် အောက်တိုဘာလ (၁၉) ရက်နေ့က တွေ့ဆုံဆွေးနွေးကြပြီး  ကန့်ကွက်လက်မှတ်များ ရေးထိုးကာ ပြည်နယ်အစိုးရအဖွဲ့နှင့် သက်ဆိုင်ရာဌာန၊ အဖွဲ့အစည်းများထံ ပေးပို့သွားမည်ဖြစ်ကြောင်း သိရသည်။

သတင်း၊ဓါတ်ပုံ #ဆန်းဖြိုးထွန်း