~~~~~~~~⊰❂ unicode ❂⊱~~~~~~~~

ဥပဒေနှင့်မညီသော စားသောက်ကုန်များ စျေးကွက်မှဖယ်ရှားရန် ကျိုင်းတုံမှလုပ်ငန်းရှင် ၃၀ ကျော်အား အသိပေးဆွေးနွေး
**************
ဥပဒေပြဌာန်းချက်များနှင့် ညီညွတ်မှုမရှိသော စားသောက်ကုန်များ ရက်(၉၀)အတွင်း ဖယ်ရှားရှင်းလင်းရေး အတွက် ရှမ်းပြည်နယ်(အရှေ့ပိုင်း) ကျိုင်းတုံမြို့ နောင်ကုန်ရွာအလယ်ဇရပ်တွင် လုပ်ငန်းရှင် (၃၀)ကျော်အား စားသုံးသူရေးရာဦးစီးဌာနက အောက်တိုဘာလ (၁၉)ရက်နေ့တွင် အသိပေးဆွေးနွေးကြောင်း သိရသည်။

“ လုပ်ငန်းရှင်တွေ လိုက်နာရမယ့် ဥပဒေ (၆)ခုကို ရက် (၉၀)စီမံချက်နဲ့ အသိပေးဆွေးနွေးတာပါ။ ဒီဥပဒေတွေကို မလိုက်နာဘူးဆိုရင် စီမံချက်ကာလကျော်တာနဲ့ တိုင်မှမဟုတ်တော့ဘူး။ ကွင်းဆင်းစစ်ဆေးပြီး အရေးယူတော့မှာပါ။ အခုက ဥပဒေ(၆)ခုကို မသိဘူးဆိုရင် ကူညီပေးနိုင်အောင်လို့ အသိပေးခြင်း လုပ်ဆောင်တာ၊ နောက်သူတို့အတွက် လိုအပ်တဲ့ထောက်ခံချက်ရယူခြင်းအပါအဝင် လုပ်ငန်းလိုင်စင် လုပ်တာတွေမှာ ဒီမှာတင် လုပ်ဆောင်နိုင်အောင် ကျွန်တော်တို့က ကူညီနေတာပါ။ အရေးမယူချင်လို့ မပိတ်သိမ်းချင်လို့ အသိပေးမှုကို လုပ်နေတာပါ။ တစ်ခုတော့ရှိတယ် နောက်ပိုင်းမှာ လုပ်တဲ့သူကလုပ်ပြီး မလုပ်တဲ့သူက မလုပ်ဘူးဆိုရင်တော့ ဥပဒေကြောင်းအရ အရေးယူတော့မယ်ဆိုတဲ့အကြောင်း ကျွန်တော်တို့က အသိပေးတာပါ”ဟု ကျိုင်းတုံခရိုင် စားသုံးသူအငြင်းပွားမှုဖြေရှင်းရေးအဖွဲ့ အတွင်းရေးမှူး ဦးသန်းစိုးက တာချီလိတ်သတင်းအေဂျင်စီသို့ ပြောသည်။

ရှမ်းပြည်နယ်အစိုးရနှင့် စားသုံးသူရေးရာဦးစီးဌာနတို့က ကုန်သွယ်ရေးဥပဒေ၊ ပြည်နယ်အစိုးရ စည်ပင်ဥပဒေ၊ စက်မှုကြီးကြပ်ဥပဒေ၊ စားသုံးသူကာကွယ်ရေးဥပဒေ၊ FDA ဥပဒေ၊ ကျန်းမာရေးဥပဒေစသည့် ဥပဒေ(၆)ခုနှင့့်မကိုက်ညီသည့် စားသောက်ကုန်များ ထုတ်လုပ်ခြင်း၊တင်သွင်းခြင်း၊ရောင်းချခြင်းမရှိစေရန် အသိပညာပေးသည့် ရက်(၉၀)စီမံချက်ကို သြဂုတ်လက စတင်ဆောင်ရွက်နေခြင်းဖြစ်ကြောင်း သိရသည်။

“ ကျိုငး်တုံမြို့မှာ ရပ်ကွက် (၁)၊ (၄)၊ (၅)၊ မနေ့က ကတ်တောင်အုပ်စုနဲ့ ဒီနေ့ နောင်ကုန်ရွာမှာ အသိပေးဆွေးနွေးမှုတွေ လုပ်ပြီးပါပြီ။ အခုလက်ရှိအချိန်ထိ တွေ့ရတာကတော့ သူတို့တွေအနေနဲ့ ဒီဥပဒေတွေကို မသိခဲ့တာတွေရှိတာ တွေ့ရတယ်။ စိတ်ဝင်စားမှုရှိကြပါတယ်။ နောက်ထပ်ဆက်ပြီးတော့ အသိပေးဆွေးနွေးမှုတွေကို ရပ်ကွက် (၂)၊ (၃)နဲ့ ယန်းလောမှာတော့ နှစ်ပိုင်းခွဲပြီး စီစဉ်မယ်လို့ ရပ်ကျေးအုပ်ချုပ်ရေးမှူးတွေဆီက သိရပါတယ်”ဟု ကျိုင်းတုံခရိုင် စားသုံးသူအငြင်းပွားမှုဖြေရှင်းရေးအဖွဲ့ အတွင်းရေးမှူး ဦးသန်းစိုးက ပြောသည်။

ရှမ်းပြည်နယ်အရှေ့ပိုင်းဒေသတွင် အသေးစား၊ အလတ်စား အိမ်တွင်းစက်မှုလက်မှုလုပ်ငန်းအများဆုံးရှိသည့် ကျိုင်းတုံမြို့နှင့် တာချီလိတ်မြို့တို့အနက် ကျိုင်းတုံမြို့တွင်သာ အသိပေးဆွေးနွေးမှုများ လုပ်ဆောင်နိုင်နေပြီး တာချီလိတ်မြို့တွင် အဆိုပါစီမံချက်နှင့်ပတ်သက်၍ အသိပညာပေးရှင်းလင်းခြင်းများ မလုပ်ဆောင်နိုင်သေးကြောင်း သိရသည်။

လက်ရှိတွင် ကျိုင်းတုံမြို့မှ ရေသန့်လုပ်ငန်းများအပါအဝင် စားသောက်ကုန်ထုတ်လုပ်ငန်းများအနေဖြင့်  လိုအပ်သည့်ထောက်ခံချက်များရရှိရန် ဆောင်ရွက်နေဆဲဖြစ်ပါက ထုတ်လုပ်သည့်ပစ္စည်းများအား ကိုယ်တိုင်တာဝန်ယူစေပြီး ဆက်လက်ထုတ်လုပ်ခွင့်ပြုထားကြောင်း သိရသည်။

သတင်း #ချယ်ရီထိုက်
ဓါတ်ပုံ #စားသုံးသူရေးရာ