မြန်မာအမျိုးသားလေကြောင်းလိုင်း (MNA) ခရီးစဉ်အမှတ် UB-202 စစ်တွေ - ရန်ကုန် Embraer-190 လေယာဉ် ခရီးစဉ်အား အောက်တိုဘာလ (၂၆)ရက်နေ့က ပျံသန်းနေစဉ် လေယာဉ်တွင်း လေယိုစိမ့်မှု ဖြစ်ပွားသဖြင့် စစ်တွေလေဆိပ်သို့ ပြန်လည်ဆင်းသက်ပြုပြင်ပြီးနောက် ရန်ကုန်သို့ အချိန်နောက်ကျ၍ ပျံသန်းနိုင်ခဲ့ကြောင်း သိရသည်။

"ကျွန်တော်တို့တွေ ပြင်ဆင်ပြီးသွားတော့ ဒုတိယအကြိမ် ပျံသန်းရာမှာ အမြင့်ပေ (၂၉၀၀၀)ကနေ ရန်ကုန်ကို ပျံသန်းခဲ့ပါတယ်။ ပျံသန်းမှုလုပ်ဆောင်ချက်ကလည်း ပုံမှန်ပါပဲ။ ည (၁၀)နာရီ (၁၀)မှာ ရန်ကုန်ကို ရောက်ရှိခဲ့ပါတယ်"ဟု မန်မာအမျိုးသားလေကြောင်းလိုင်း (MNA) မှ နည်းပြလေယာဉ်မှူးကြီး ဦးမြတ်မိုးအောင်က တာချီလိတ်သတင်းအေဂျင်စီသို့ ပြောသည်။

နည်းပြလေယာဉ်မှူးကြီး ဦးမြတ်မိုးအောင်နှင့် ဒုတိယလေယာဉ်မှူးကြီး ဦးရဲထွဋ်အောင်တို့လိုက်ပါလာသည့် အဆိုပါ လေယာဉ်သည် ၂၀၁၇ ခုနှစ် အောက်တိုဘာလ (၂၆) ရက် ည(၇)နာရီ (၁၇)မိနစ်တွင် စစ်တွေ လေဆိပ်မှ ရန်ကုန်အပြည်ပြည်ဆိုင်ရာ လေဆိပ်သို့ ပျံသန်းလာခဲ့ရာမှ ပျံသန်းချိန် (၁၅) မိနစ်၊ စစ်တွေမြို့မှရေ မိုင် (၄၀) ခန့် ၊ ရန်ကုန်မြို့သို့ ရေမိုင် (၂၃၀) ခန့် အကွာ အမြင့်ပေ (၁၈,၀၀၀) ခန့်တွင် လေယာဉ်ဦးခေါင်းပိုင်းမှ "ဒုတ်" ဟူသော အသံနှင့်အတူ လေစိမ့်ဝင်သံလေးကိုကြားခဲ့ရခြင်းဖြစ်ကြောင်း သိရသည်။

လေယာဉ်အင်ဂျင်နှင့် စက်ပိုင်းဆိုင်ရာ ဒိုင်ခွက်များ အား စစ်ဆေးကြည့်ရှုရာ လေယာဉ်အတွင်းရှိ လေထုဖိအားမှာ ရုတ်တရက် စတင်ထိုးတက်နေသည်ကို စစ်ဆေးတွေ့ရှိခဲ့ရသဖြင့် လေယာဉ်ကို မူလပျံသန်းမည့် ပေ (၂၉,၀၀၀) သို့ တက်နေခြင်းအား အမြင့်ပေ (၁၉,၀၀၀) ခန့်တွင် ချက်ချင်းရပ်တန့် ခဲ့ခြင်းဖြစ်ကြောင်း သိရသည်။

“လေယာဉ်ပျံရဲ့ လေယာဉ်တွင်းလေဖိအားထိန်းညှိမှု (Cabin Pressurization System)က လေယိုစိမ့်မှု အနည်းငယ်ဖြစ်တာလို့ သုံးသပ်ပြီး လေယာဉ်ပေါ် စီးနင်းလိုက်ပါလာတဲ့ ခရီးသည်တွေ ဘေးအန္တရာယ် ကင်းရှင်းရေးအတွက် ရေမိုင် (၄၀) ခန့်သာဝေးတဲ့ စစ်တွေလေဆိပ်ကို ပြန်လည်ဆင်းသက်ပြီး လေယာဉ်ကို စစ်ဆေးဖို့ ဆုံးဖြတ်ခဲ့ပါတယ်”ဟု မြန်မာအမျိုးသားလေကြောင်းလိုင်း (MNA) မှ နည်းပြလေယာဉ်မှူးကြီး ဦးမြတ်မိုးအောင်က ပြောသည်။

အဆိုပါ လေယာဉ်သည် စစ်တွေလေဆိပ်သို့ ည(၇) နာရီ (၅၄) မိနစ်တွင် ပြန်လည်ဆင်းသက်ခဲ့ပြီး လေယာဉ်ပြင်ပ ကိုယ်ထည်အား မျက်မြင်စစ်ဆေးကြည့်ရာ လေယာဉ်၏ ရှေ့ဘက် လေကြောင်းဆိုင်ရာ လျှပ်စစ်နှင့်နည်းပညာ သိုလှောင်ခန်း ၏ လေလုံရန်ပိတ်သောတံခါး Seal မှာ အပြင်သို့အနည်းငယ် ထွက်ရှိနေကြောင်း တွေ့ခဲ့ရသဖြင့် ရန်ကုန် မြို့မှ လေယာဉ်ပျံကျွမ်းကျင် အင်ဂျင်နီယာများဖြင့် ဆက်သွယ်၍ ၎င်းတို့၏ ညွှန်ကြားချက်အတိုင်း အဆိုပါတံခါးကို လေလုံ seal ဖြစ်စေရန် နည်းပြလေယာဉ်မှူးကြီးကိုယ်တိုင် ပြင်ဆင်ခဲ့ကြောင်း သိရသည်။

ယင်းနောက် လေယာဉ်အား မျက်မြင်စစ်ဆေးခြင်း၊ Embraer-190 လေယာဉ်တွင်ပါရှိသော အလိုလျောက် ချို့ယွင်းချက်ရှာသည့်စနစ်တြို့ဖင့် စစ်ဆေးခြင်းများကို အကြိမ်များစွာပြုလုပ်ရာ အန္တရာယ်ကင်းသည့် ကျေနပ်ဖွယ်ကောင်းသော ရလဒ်ကိုတွေ့ရသဖြင့် ည  (၉)နာရီ (၁၇)မိနစ်တွင် ရန်ကုန်မြို့သို့ ထွက်ခွာပျံသန်းလာခဲ့ရာ ရန်ကုန်အပြည်ပြည်ဆိုင်ရာလေဆိပ်သို့ ည(၁၀)နာရီ (၁၀) မိနစ်တွင် ဆင်းသက်နိုင်ခဲ့ခြင်းဖြစ်ကြောင်း သိရသည်။

မြန်မာအမျိုးသားလေကြောင်းလိုင်းသည် ၂၀၁၇ ခုနှစ်တွင် သက်တမ်း (၆၉)နှစ်ရှိပြီဖြစ်ပြီး ပြည်တွင်း၊ပြည်ပ ခရီးစဉ်များကို ပျံသန်းပြေးဆွဲနေသည့် နိုင်ငံပိုင်လေကြောင်းလိုင်းဖြစ်သည်။

သတင်း - ချယ်ရီထိုက်

~~~~~~~~⊰❂ unicode ❂⊱~~~~~~~~

⊰❂ #TachileikNewsAgency #TachileikOnlineNews  #တာချီလိတ်သတင်းအေဂျင်စီ www.tachileik.net  ❂⊱

~~~~~~ ကြော်ငြာ ~~~~~~