~~~~~~~~⊰❂ unicode ❂⊱~~~~~~~~

ဂျပန်ဦးနှောက်ရောင်ရောဂါကာကွယ်ဆေးအကြောင်း တိုးချဲ့ကာကွယ်ဆေးထိုးလုပ်ငန်းမှ တာဝန်ရှိသူများ၏ ဖြေကြားချက်များ
*************
ဂျပန်ဦးနှောက်ရောင်ကာကွယ်ဆေးထိုးအစီအစဉ်နှင့်ပတ်သက်သည့် မေးခွန်းများကို ကျန်းမာရေးနှင့် အားကစားဝန်ကြီးဌာန၊ တိုးချဲ့ကာကွယ်ဆေးထိုးလုပ်ငန်းမှ တာဝန်ရှိသူများက ဖြေကြားပေးထားသည်များကို တာချီလိတ်သတင်းအေဂျင်စီက ပြန်လည်ဖေါ်ပြပေးပါသည်။

သေဆုံးမှုနှုန်းများသည့်အပြင် နောက်ဆက်တွဲဆိုးကျိုးများ ပြင်းထန်စွာဖြစ်ပွားတတ်သည့် ဂျပန် ဦးနှောက်ရောင်ရောဂါအတွက် ကာကွယ်ဆေးကို ကျန်းမာရေးနှင့်အားကစားဝန်ကြီးဌာနက လုပ်ဆောင်နေသည့် အသက်(၅)နှစ် အောက်ကလေးများအတွက် ပုံမှန်ကာကွယ်ဆေးထိုး အစီအစဉ်၏ ကာကွယ်ဆေး (၁၀)မျိုးတွင် ထည့်သွင်းထားခြင်းမရှိသေးသည့်အတွက် တိုးချဲ့ကာကွယ်ဆေးထိုးအစီအစဉ်ဖြင့် ထိုးနှံပေးသွားမည်ဖြစ်သည်။

အဆိုပါကာကွယ်ဆေးအား အသက် (၉) လမှ (၁၅)နှစ်အရွယ် ကလေး (၁၄) သန်းခန့်ကို ၂၀၁၇ ခုနှစ်၊ နိုဝင်ဘာလ (၁၅) ရက်မှ (၂၃) ရက်အတွင်း ကျောင်းအခြေပြုကာကွယ်ဆေးထိုး လုပ်ငန်းအစီအစဉ်နှင့် ၂၀၁၇ ခုနှစ် ဒီဇင်ဘာလ (၁၁) ရက်မှ (၂၀) ရက်အတွင်း ပြည်သူလူထုအခြေပြု ကာကွယ်ဆေးထိုး အစီအစဉ်တို့ဖြင့် ထိုးနှံပေးသွားမည်ဖြစ်ရာ ကာကွယ်ဆေးနှင့်ပတ်သက်၍ သိလိုသည်များ၊ ကာကွယ် ဆေးထိုးအစီအစဉ်နှင့်ပတ်သက်၍ သိလိုသည်များကို စုစည်းဖြေကြားပေးထားသည်များကို ပြန်လည်ဖေါ်ပြပါသည်။

မေး။ ။ ဂျပန်ဦးနှောက်ရောင် ကာကွယ်ဆေးက ထိုးပြီးဘယ်လောက်ထိ  အာနိသင် ရှိနေမှာလဲ။  ဘယ်နှနှစ်လောက်အထိ ကာကွယ်ပေးနိုင်လဲ။
ဖြေ။ ။ ကျန်းမာရေးနှင့် အားကစားဝန်ကြီးဌာနက လက်ရှိထိုးနှံပေးမယ့်ဆေးဟာ တစ်ကြိမ်ထိုးနှံပြီးနောက် (၈၅) ရာခိုင်နှုန်းကနေ (၉၅) ရာခိုင်နှုန်းအထိ ရောဂါကာကွယ်နိုင်စွမ်းရှိပါတယ်။ ပိုးအရှင်ကို အားပျော့အောင်လုပ်ထားတဲ့ ကာကွယ်ဆေးတွေဟာ တစ်ကြိမ်ထိုးထားရင် တစ်သက်တာနီးပါး ကာကွယ်ပေးနိုင်ပါတယ်။

မေး။ ။ ကလေးကို ကာကွယ်ဆေးထိုးပေးဖို့အတွက် ဘယ်လောက်ကုန်မှာလဲ။ ဆေးတန်ဖိုး ဘယ်လောက်ရှိသလဲ။
ဖြေ။ ။ အခမဲ့ ထိုးနှံပေးသွားမှာပါ။

မေး။ ။ ဆေးမထိုးခင်နဲ့ ဆေးထိုးပြီး ဆောင်ရန်၊ ရှောင်ရန်လေးတွေ ပြောပြပေးပါ။
ဖြေ။ ။ ဆေးမထိုးခင် ကလေးမှာ ပြင်းထန်တဲ့ ဓာတ်မတည့်ခြင်းမျိုးရှိမရှိ၊ တခြား ရောဂါအခံတွေရှိ၊မရှိနဲ့ လက်ရှိ သောက်သုံးနေရတဲ့ ဆေးဝါးတွေရှိရင် ဆေးထိုးပေးမယ့်ဆရာမကို ကြိုတင်ပြောပြထားဖို့လိုပါမယ်။ ဆရာဝန်နဲ့ ကြိုတိုင်ပင်ရင် ပိုကောင်းပါတယ်။ ဖျားနေတဲ့ ကလေးဆိုရင်တော့ ရက်ရွှေ့ဆိုင်းပြီးမှ ထိုးနှံရပါမယ်။ ကာကွယ်ဆေးထိုးပြီးပါက ဆေးထိုးစုရပ်မှာ နာရီဝက်ခန့် စောင့်ဆိုင်းပြီး ကလေးအခြေအနေကို စောင့်ကြည့်ဖို့ လိုပါတယ်။ ကလေးမှာ ပုံမှန်မဟုတ်တဲ့ လက္ခဏာတွေတွေ့့ရင် ဆေးထိုးပေးတဲ့ ဆရာမကို ချက်ချင်း အကြောင်းကြားပါ။

မေး။ ။ အစိုးရကထိုးပေးတဲ့ဆေးနဲ့ အပြင်ဆေးခန်းမှာ ဝယ်ထိုးတဲ့ဆေးက တူတူပဲလား။ ကွာခြားမှုရှိပါသလား။ ဆေးနာမည် ဘယ်လိုခေါ်ပါသလဲ။
ဖြေ။ ။ ကျန်းမာရေးနှင့် အားကစားဝန်ကြီးဌာနက ထိုးနှံပေးမယ့်ဆေးက CD-JEV (SA 14-14-2) ဖြစ်ပါတယ်။ ကမ္ဘာ့ကျန်းမာရေးအဖွဲ့ (WHO) ရဲ့ အရည်အသွေး အသိအမှတ်ပြု ကာကွယ်ဆေးဖြစ်ပါတယ်။

မေး။ ။ ဦးနှောက်အမြှေးရောင် ကာကွယ်ဆေးနဲ့ ဦးနှောက်ရောင် ကာကွယ်ဆေး တူပါသလား။ တစ်မျိုးထိုးပြီးရင် နောက်တစ်မျိုးထပ်ထိုးဖို့ လိုပါသလား။
ဖြေ။ ။ မတူပါဘူး။ ရောဂါဖြစ်စေတဲ့ပိုး အမျိုးအစားမတူသလို ဖြစ်တဲ့ရောဂါချင်းလည်းမတူပါဘူး။ ဒါကြောင့် ဦးနှောက်အမြှေးရောင်ကာကွယ်ဆေးထိုးထားဖူးလည်း ဂျပန်ဦးနှောက်ရောင်ကာကွယ်ဆေးကို ထပ်မံထိုးနှံရပါမယ်။

မေး။ ။ ၁ နှစ် ၅ လပြည့်မထိုးရသေးဘူး။ ယခုလပြည့်ပြီးဆိုတော့ ကျန်းမာရေးဆရာမ လာရင် ၁နှစ်ခွဲ အတွက် ကာကွယ်ဆေးတွေထိုးရမှာ ဘယ်ဟာအရင်ထိုးရမလဲ။ ဝက်သက်ကာကွယ်ဆေးထိုးဖို့ရှိတော့ အခုဒီဇင်ဘာမှာ ဂျပန်ဦးနှောက်ရောင် ကာကွယ်ဆေးကိုထိုးပေးလို့ရမလား သိချင်လို့ပါ။
ဖြေ။ ။ ကလေးအသက်တစ်နှစ်ခွဲမှာ ထိုးပေးမယ့် ဝက်သက်ဂျိုက်သိုး ကာကွယ်ဆေးနဲ့အတူ ဂျပန်ဦးနှောက်ရောင် ကာကွယ်ဆေးကို တစ်ပြိုင်နက်တည်း ထိုးနှံပေးနိုင်ပါတယ်။ အသက် (၉) လနဲ့ အသက် (၁၈) လ မှာ ဝက်သက်ဂျိုက်သိုး ကာကွယ်ဆေး ထိုးရမယ့်ကလေးတွေအတွက် ကျန်းမာရေးဝန်ထမ်းများက ထိုးရမယ့်လ ချိန်းပေးပါလိမ့်မယ်။

မေး။ ။ ၉ လအောက်ကလေးကမထိုးရဘူးဆိုတော့ ရောဂါမဖြစ်ဘူးလို့ပြောနိုင်ပါသလား။
ဖြေ။ ။ မိခင်ရဲ့ ဝမ်းထဲမှတဆင့် ပဋိပစ္စည်းရခဲ့လို့ ကာကွယ်မှုရှိနေနိုင်ပါတယ်။ ပဋိပစ္စည်းလျော့နည်းသွားမည့် (၉) လ အရွယ်တွင် စထိုးလျင် ကာကွယ်မှု ပိုမိုရရှိနိုင်ပါတယ်။

မေး။ ။ သွားတိုက်ဆေးထဲမှာ Carbamide ပါတာကြောင့် သွားတိုက်ဆေးနဲ့ ဓာတ်မတည့်သူတွေ ထိုးလို့မရဘူးဆိုတာ ဟုတ်ပါသလား။
ဖြေ။ ။ ကာကွယ်ဆေးမှာ Carbamide ပါတာနည်းပေမယ့် Carbamide နဲ့ ဓာတ်မတည့်ဘူးတဲ့သူ မထိုးသင့်ပါဘူး။

မေး။ ။ သားသားမှာအရေပြားယားတာ ဆေးခန်းပြရင်ခဏဘဲသက်သာပြီး မကြာမကြာပြန်ပေါ်ပါတယ်။ ဂျပန်ဦးနှောက်ရောင် ကာကွယ်ဆေးထိုးလို့ရပါသလား။
ဖြေ။ ။ အရေပြားယားတဲ့အတွက် Steriods ဆေးသောက်နေရင် မထိုးသင့်ပါဘူး။ ဆရာဝန်နဲ့ ကြိုတိုင်ပင်သင့်ပါတယ်။

မေး။ ။ တီဘီ ဆေးသောက်နေတယ်။ ၂၀၁၈ (၁) လပိုင်း (၇) ရက်နေ့မှ (၆) လပြည့်မှာ၊ ဂျပန်ဦးနှောက်ရောင် ကာကွယ်ဆေးထိုးလို့ရပါသလား။
ဖြေ။ ။ ရပါတယ်။ ဆေးထိုးမယ့်အချိန်မှာ တီဘီဆေးသောက်ပြီး (၂) လကျော်ရင် ထိုးလို့ရပါတယ်။

မေး။ ။ ဆေးထိုးပြီးဓာတ်မတည့်ရင်ဖြေလို့ရပါသလား။ အသက်အန္တရာယ်ရှိပါသလား။
ဖြေ။ ။ ဆေးထိုးပြီး နာရီဝက် စောင့်ဆိုင်းစေပြီး စောင့်ကြည့်ပါတယ်။ ဓာတ်မတည့်ရင် ချက်ချင်းကုသပေးဖို့ ဆေးထိုးစုရပ်တိုင်းမှာ အဆင်သင့် ပြင်ဆင်ထားပါတယ်။

#ကျန်းမာရေးနှင့် အားကစားဝန်ကြီးဌာန၊ တိုးချဲ့ကာကွယ်ဆေးထိုးလုပ်ငန်း