ကယားပြည်နယ်၊ ဒီးမော့ဆိုမြို့နယ် ခေါက်ပလော့ကျေးရွာတွင် စိတ်ကြွရူးသွပ် ဆေးပြားနှင့်အတူ ဆက်စပ်ပစ္စည်းများကို အမျိုးသားနှစ်ဦးထံက အောက်တိုဘာလ ၁၇ ရက်နေ့တွင် ဖမ်းဆီးရမိခဲ့ကြောင်း သိရသည်။

ခေါက်ပလော့ကျေးရွာရှိ ဦးစတဲဖားနို၏ နေအိမ်တွင် မူးယစ်ဆေးဝါးများ ရောင်းချနေကြောင်း သတင်းရရှိ၍ အောက်တိုဘာလ(၁၇)ရက်နေ့ နံနက် (၆)နာရီဝန်းကျင်အချိန်က ပူးပေါင်းအဖွဲ့ဖြင့် ဝင်ရောက်ရှာဖွေ ဖမ်းဆီးခြင်း ဖြစ်ကြောင်း သိရသည်။

အဆိုပါ နေအိမ်သို့ ဝင်ရောက်ရှာဖွေရာတွင် အိမ်ရှင် ဦးစတဲဖားနိုအား အသင့်တွေ့ရပြီး ဆက်လက် ရှာဖွေရာ စိတ်ကြွဆေးပြား စုစုပေါင်း (၁၉၅)ပြားနှင့် မူးယစ်ဆေးဝါး ရောင်းချရငွေဟု ယူဆရသည့် မြန်မာငွေစက္ကူရောရာ တစ်သိန်းတစ်သောင်းအား အစိမ်းရောင် ပြောက်ကျားအိတ်အတွင်းမှ တွေ့ရပြီး မူးယစ်ဆေးဝါးသုံးစွဲရာတွင် အသုံးပြုသော ဝါးရိုးနှစ်ချောင်းတပ် ပလတ်စတစ်ဘူးအားနေအိမ်ရှေ့ ကျောက်စည်ပိုင်းအတွင်းမှ တွေ့ရှိရ၍ ဒီးမော့ဆိုမြို့မ ရဲစခန်းမှ ရဲအုပ်အောင်အောင်ဝေ မှ သက်သေများရှေ့တွင် ရှာဖွေ ပုံစံဖြင့် သိမ်းဆည်းခဲ့သည်။

တစ်ဆက်တည်း နေအိမ်ဘေး အဖီရှိ အိပ်ခန်းတွင်း ထပ်မံရှာဖွေရာ ရန်နိုင်လင်းအား အိပ်လျက်တွေ့ရပြီး၎င်းအိပ်သည့် ခေါင်းရင်းအောက် ကာကီရောင်ဘေးလွယ်အိတ်အတွင်းမှ WY စာတမ်းပါ စိတ်ကြွရူးသွပ်ဆေးပြား (၉)ပြားပါ တစ်ထုပ်နှင့် wy စာတမ်းပါ စိတ်ကြွရူးသွပ်ဆေးပြား (၂)ပြား စုစုပေါင်း (၁၁)ပြားအား Red Ruby ဆေးလိပ် ဘူးခွံအတွင်း ထည့်လျက်တွေ့ရပြီး၎င်း အသုံးပြုသော Samsung  galaxy note7 အမျိုးအစား ဟန်းဆက်နှင့် ဆင်းကဒ်များကိုလည်းကောင်း အိပ်ခန်းရှေ့စားပွဲပေါ်မှ မူးယစ်ဆေးဝါးသုံးစွဲရာတွင် အသုံးပြုသည့် ဝါးရိုးတွင် ရာဘာပိုက်စွပ် အရိုးတပ်လျက် အချိုရည်ဘူးတစ်ဘူးအားလည်းကောင်း ရန်နိုင်လင်း ထံမှ သိမ်းဆည်းရမိခဲ့သည်။

စိတ်ကြွဆေးပြားများနှင့်အတူ ဖမ်းဆီးရမိသည့် ဦးစတဲဖားနိုနှင့် ရန်နိုင်လင်းတို့အား ဒီးမော့ဆိုမြို့မရဲစခန်း တွင် မယ(ပ)၁၀/၂၀၁၇| မူး/စိတ်ပုဒ်မ ၁၅/၁၆ (ဂ)/၁၉(က)/၂၀(က)/၂၁ အရ အမှုဖွင့်အရေးယူထားရှိပြီး အမှုအား ဒုရဲအုပ် မျိုးလင်းနိုင်မှ လက်ခံစစ်ဆေးလျက်ရှိကြောင်း သိရသည်။

သတင်း - #ဆန်းဖြိုးထွန်း