~~~~~~~~⊰❂ unicode ❂⊱~~~~~~~~

တောင်ကြီးမြို့နယ်အတွင်းမှ စားသောက်ကုန်ထုတ်လုပ်ငန်းရှင်များအား ထုတ်ကုန်ဆိုင်ရာဌာနများက ဆက်စပ်ဥပဒေများရှင်းလင်းဆွေးနွေး
***********
ရှမ်းပြည်နယ် (တောင်ပိုင်း) တောင်ကြီးမြို့နယ် ရပ်ကွက် (၁၉)ခုရှိ အသေးစား၊ အလတ်စားနှင့် အိမ်တွင်းမှုလုပ်ငန်းများမှ လုပ်ငန်းရှင် (၆၄)ဦးအား စားသုံးသူအခွင့်အရေးနှင့်အညီ ထုတ်ကုန်များထုုတ်လုပ်နိုင်ရေးအတွက် လိုက်နာရမည့်ဥပဒေများကို စားသုံးသူရေးရာဦးစီးဌာနက တောင်ကြီးမြို့၌ စက်တင်ဘာလ (၂၂)ရက်နေ့တွင် ရှင်းလင်းဆွေးနွေးကြောင်း သိရသည်။

“ကျွန်တော်တို့ဒေသတွင်း အသေးစားအလတ်စားလုပ်ငန်းတွေက အရည်အသွေးရှိတဲ့ ထုတ်ကုန်တွေ ထုတ်ဖို့လိုတယ်။ ဒါတွေကို ရှမ်းပြည်နယ်အစိုးရကို တင်ပြတယ်။ အငြင်းပွားမှုဖြေရှင်းရေးအဖွဲ့ကလည်း အတည်ပြုတယ်။ ဒီတော့ ဒေသတွင်းအခြေအနေတွေကို ကွင်းဆင်းလေ့လာတဲ့အခါ လုပ်ငန်းအတော်များများက မှတ်ပုံတင်မရှိဘူး။ ထုတ်ကုန်တွေမှာလည်း အရည်အသွေး ထောက်ခံချက်တွေမရှိသလို ဆက်စပ်ဥပဒေတွေကိုလည်း နားမလည်တာ တွေ့ရတယ်။ ဒီတော့ လုပ်ငန်းတွေ ရပ်ဆိုင်းခိုင်းရမယ့် အနေအထားတွေ တွေ့လာရတယ်။ သူတို့လုပ်ငန်းတွေ ရပ်ဆိုင်းခိုင်းတာထက် ခေါ်ယူတွေ့ဆုံပြီးတော့ လုပ်ငန်းမှတ်ပုံတင်တာ၊ အရည်အသွေးထောက်ခံချက်တွေ ယူဖို့လိုတာရှင်းပြမယ်။ လုပ်ခိုင်းမယ်။ သူတို့အတွက်လည်း အဆင်ပြေမယ်။ နိုင်ငံတော်အတွက်လည်း အခွန်အခရလာမယ်။ အရည်အသွေးရှိတဲ့ ကုန်စည်တွေလည်း ထုတ်လုပ်လာနိုင်မယ်ဆိုပြီး အခုလို လုပ်ငန်းရှင်တွေနဲ့ တွေ့ဆုံပွဲတွေကို စီစဉ်ဖြစ်တာပါ”ဟု ရှမ်းပြည်နယ်စားသုံးသူရေးရာဦးစီးဌာန လက်ထောက်ညွှန်ကြားရေးမှူး ဦးမင်းအောင်က တာချီလိတ်သတင်းအေဂျင်စီသို့ ပြောသည်။

အဆိုပါတွေ့ဆုံဆွေးနွေးပွဲတွင် စားသုံးသူရေးရာဦးစီးဌာန၊ ပြည်နယ်စည်ပင်သာယာရေးဌာန၊ ပြည်နယ်မွေးမြူရေးနှင့် ကုသရေးဦးစီးဌာန၊ ပြည်နယ် အသေးစားစက်မှုလက်မှုလုပ်ငန်း ဦးစီးဌာန၊ ပြည်နယ်စက်မှုကြီးကြပ်နှင့် စစ်ဆေးရေးဦးစီးဌာန၊ ပြည်နယ် အစားအသောက်နှင့် ဆေးဝါးကွပ်ကဲရေး ဦးစီးဌာနတို့က သက်ဆိုင်သည့် ဥပဒေများအကြောင်းကို လုပ်ငန်းရှင်များအား ဆွေးနွေးရှင်းလင်းခြင်းဖြစ်ကြောင်း သိရသည်။

ရှမ်းပြည်နယ်အတွင်း စားသုံးသူရေးရာဦးစီးဌာန၊  ပြည်နယ်စက်မှုကြီးကြပ်နှင့် စစ်ဆေးရေးဦးစီးဌာန၊ စည်ပင်သာယာရေးဦးစီးဌာနနှင့် အသေးစားစက်မှုလက်မှု လုပ်ငန်းဦးစီးဌာနတို့၏ ကွင်းဆင်းလေ့လာချက်များအရ ဒေသတွင်း ကုန်ထုတ်လုပ်ငန်းများ အရည်အသွေးရှိထုတ်ကုန်များအား ဥပဒေနှင့်အညီ ထုတ်လုပ်နိုင်ရေးအတွက် လုပ်ငန်းရှင်များအား ဆွေးနွေးရှင်းလင်းခြင်းအား ရှမ်းပြည်နယ်တောင်ပိုင်းဒေသတွင် ပထမဆုံးအကြိမ်အဖြစ် အောင်ပန်းမြို့တွင် ၂၀၁၇ ခုနှစ် ဇွန်လအတွင်းက လုပ်ဆောင်ခဲ့ကြောင်း သိရသည်။

“ အောင်ပန်းမှာက စားသောက်ကုန်ထုတ် အိမ်တွင်းမှုလုပ်ငန်းအများစုရှိတော့ အဲဒီမှာ ပထမဆုံး ကျင်းပတယ်။ ဒီလိုဆွေးနွေးပြီးတဲ့အခါမှာ လုပ်ငန်းတွေရဲ့ ၈၀ ရာခိုင်နှုန်းလောက် လမ်းမှန်ပေါ်ရောက်လာတယ်လို့ ကျွန်တော်တို့ သုံးသပ်ပါတယ်” ဟု ရှမ်းပြည်နယ်စားသုံးသူရေးရာဦးစီးဌာန လက်ထောက်ညွှန်ကြားရေးမှူး ဦးမင်းအောင်က ပြောသည်။

 ရှမ်းပြည်နယ်အတွင်း စားသုံးသူအခွင့်အရေးထိခိုက်စေသည့် စားသောက်ကုန်များ စျေးကွက်တွင် မရှိစေရေးအတွက် စားသောက်ကုန် တင်သွင်း၊ ရောင်းချ၊ ထုတ်လုပ်သူများအား ရက်(၉၀)စီမံချက်ဖြင့် လိုအပ်သည့် အထောက်အထားများ ရရှိစေရန် ကူညီဆောင်ရွက်ပေးခြင်း၊ ပညာပေးခြင်းတို့  လုပ်ဆောင်နေခြင်းဖြစ်ကြောင်း သိရသည်။

ရှမ်းပြည်နယ်အစိုးရနှင့် စားသုံးသူရေးရာဦးစီးဌာနတို့က ပြည်နယ်အတွင်း ဥပဒေပြဌာန်းချက်များနှင့်ညီညွတ်မှုမရှိသော စားသောက်ကုန်များ  ထုတ်လုပ်၊ တင်သွင်း၊ ရောင်းချမှုများအား ရှင်းလင်းရေးအတွက် သြဂုတ်လမှစ၍ ရက်(၉၀)စီမံချက်ဖြင့် ဆောင်ရွက်နေခြင်းဖြစ်ကြောင်း သိရသည်။

သတင်း၊ဓါတ်ပုံ #နိုနို