~~~~~~~~⊰❂ unicode ❂⊱~~~~~~~~

ရခိုင်ပြည်နယ် ကူညီထောက်ပံ့ရေးအတွက် တာချီလိတ်မှ (၁၁)ရက်အတွင်း လှူဒါန်းငွေ ကျပ်သိန်း (၃၇၀)ကျော်ရှိပြီး ကော်မတီသို့ အလှူငွေများ ဆက်လက်လှူဒါန်းနိုင်
***********
ရှမ်းပြည်နယ်(အရှေ့ပိုင်း) တာချီလိတ်မြို့တွင် ရခိုင်ပြည်နယ် ကူညီထောက်ပံ့ရေးကော်မတီ (တာချီလိတ်မြို့) ၏ အလှူခံဌာနဖွင့်လှစ်သည့် (၁၁)ရက်မြောက်နေ့ဖြစ်သော စက်တင်ဘာလ (၇)ရက်နေ့အထိရရှိသည့် အလှူငွေမှာ မတည်အလှူငွေအပါအဝင် စုစုပေါင်းကျပ် (၃၇၂)သိန်းကျော်နှင့် ထိုင်းဘတ်ငွေ (၁၉၀၀၀)ကျော် ဖြစ်ကြောင်း နေ့စဉ်ထုတ်ပြန်သည့်စာရင်းများအရ သိရသည်။

ရခိုင်ပြည်နယ် ကူညီထောက်ပံ့ရေးကော်မတီ (တာချီလိတ်မြို့) ၏ အလှူခံဌာနအား သြဂုတ်လ(၂၈)ရက် နေ့မှစ၍ စက်တင်ဘာလ (၇)ရက်နေ့အထိ ဗယ်လင်တိုင်းကဖေးရှေ့တွင် ဖွင့်လှစ်ခဲ့ခြင်းဖြစ်ပြီး အလှူခံဌာန ဆက်လက်ဖွင့်လှစ်ခြင်းမရှိတော့သော်လည်း ကော်မတီသို့ အလှူငွေများ ဆက်လက် လှူဒါန်းနိုင်ကြောင်း သိရသည်။

“အလှူခံက ရက်သိပ်ကြာလာရင် လုပ်အားပေးတွေလည်း ဝန်ထုပ်ဝန်ပိုးဖြစ်လာတယ်။ နောက် ဗယ်လင်တိုင်းဆို ကျွေးမွေးဧည့်ခံရတဲ့ စားရိတ်တွေလည်း အကုန်အကျများလာတယ်။ ဗယ်လင်တိုင်းမှာ အလှူခံဌာန ဆက်မဖွင့်ဘူးဆိုပေမဲ့ ကော်မတီရဲ့ဖုန်းနံပါတ်တွေကို ဆက်သွယ်ပြီး လှူဒါန်းနိုင်ပါတယ်။ လက်ရှိကောက်ခံရရှိထားတဲ့ အလှူငွေစာရင်း စုစုပေါင်းကို မနက်ဖြန်မှာ ထုတ်ပြန်ပေးပါမယ်။ ပြီးရင် ကော်မတီအစည်းအဝေးလုပ်ပြီးတော့ ဒီအလှူငွေတွေကို ရခိုင်ပြည်နယ်အစိုးရဆီကို ငွေသားပို့မလား၊ အလှူပစ္စည်းတွေ ပို့မလားဆိုတာ ဆုံးဖြတ်ပြီး ထုတ်ပြန်ပေးမှာပါ။ ဆက်ပြီး လှူဒါန်းတာတွေကိုလည်း အခုလိုပဲ မှတ်တမ်းတင်ဓါတ်ပုံတွေနဲ့ စာရင်းတွေ ထုတ်ပြန်ပေးသွားမှာပါ ”ဟု ကော်မတီဥက္ကဌ ဦးအောင်ဖြိုးရှိန်က တာချီလိတ်သတင်းအေဂျင်စီသို့ ပြောသည်။

ကော်မတီအနေဖြင့် ရခိုင်ပြည်နယ်တွင်း ပဋိပက္ခဖြစ်ပွားနေသည့်ဒေသအား ကူညီထောက်ပံ့ရေးနှင့် ရန်ပုံငွေရှာဖွေရေးလုပ်ငန်းများကို ဆက်လက်ဆောင်ရွက်သွားမည်ဖြစ်ရာ လှူဒါန်းလိုသူများအနေဖြင့် ကော်မတီနာယကများဖြစ်သည့် မြို့နယ်အုပ်ချုပ်ရေးမှူး ဦးထွန်းဝင်းအောင်၏ ဖုန်း ၀၉ ၄၅၂၈၀၈၀၄၄၊ မြို့နယ်ရဲတပ်ဖွဲ့မှူး ရဲမှူးသန်းနု၏ ဖုန်း ၀၉ ၂၀၁၆၉၇၄၊ ကော်မတီဥက္ကဌ ဦးအောင်ဖြိုးရှိန်၏ ဖုန်း ၀၉ ၄၃၁၃၆၄၃၁၊ ကော်မတီအတွင်းရေးမှူး ဦးစောထွန်းဦး၏ ဖုန်း ၀၉ ၅၂၄၂၀၄၉ တို့သို့ ဆက်သွယ်နိုင်ကြောင်း သိရသည်။

ရခိုင်ပြည်နယ် ကူညီထောက်ပံ့ရေးကော်မတီ (တာချီလိတ်မြို့)က ကောက်ခံရရှိထားသည့် အလှုငွေများအနက် ကျပ်သိန်း (၁၀၀)နှင့် ကျပ် (၁၀၂)သိန်းကျော်တန်ဖိုးရှိသည့် ဆန်နှင့်ဆီတို့ကိုလည်း ရခိုင်ပြည်နယ် အစိုးရအဖွဲ့သို့ ချိတ်ဆက်လှူဒါန်းထားပြီးဖြစ်ကြောင်း သိရသည်။

အစွန်းရောက် ဘင်္ဂါလီအကြမ်းဖက်သမားများနှင့် ARSA တို့ တိုက်ခိုက်ခံနေရသည့် ရခိုင်ပြည်နယ်အတွင်းမှ ဒေသခံပြည်သူများ၊ နိုင်ငံ့ဝန်ထမ်းများနှင့် တပ်မတော်သားများအား ထောက်ပံ့ပေးနိုင်ရန်အတွက် ရခိုင်ပြည်နယ် ကူညီထောက်ပံ့ရေးကော်မတီ (တာချီလိတ်မြို့)အား သြဂုတ်လ (၂၇)ရက်နေ့က ဖွဲ့စည်းလိုက်ခြင်းဖြစ်သည်။

အဆိိုပါကော်မတီ၏အလှူခံဌာနအား တာချီလိတ်မြို့ ဗယ်လင်တိုင်း ကဖေးနှင့်အအေး စားသောက်ဆိုင်တွင် ဖွင့်လှစ်ထားခြင်းဖြစ်ပြီး အလှူခံသည့်ကာလအတွင်း ကော်မတီဝင်များနှင့် လာရောက်လှူဒါန်းသူများကို အဆိုပါဆိုင်က အခမဲ့ဧည့်ခံကျွေးမွေးမှုများဖြင့် ဒါနပြုထားကြောင်း သိရသည်။