~~~~~~~~⊰❂ unicode ❂⊱~~~~~~~~

ကျိုင်းတုံ - မိုင်းဖြတ် ပြည်ထောင်စုလမ်းမတွင် ယာဉ်မတော်တဆအများဆုံးဖြစ်သည့်နေရာများ၌ လမ်းဘေးအရံအတားများ တပ်ဆင်နေ
***********
ရှမ်းပြည်နယ်(အရှေ့ပိုင်း) ကျိုင်းတုံ-တာချီလိတ်ပြည်ထောင်စုလမ်းမကြီးမှ ယာဉ်မတော်တဆမှုအများဆုံးနှင့် လူသေပျောက်မှု အများဆုံးဖြစ်ပွားသည့် မိုင်းဖြတ်မြို့နှင့် ဆိုင်းလေကျေးရွာကြား လမ်းပိုင်းတွင် လမ်းဘေးအရံအတားများ တပ်ဆင်နေရာ စက်တင်ဘာလ (၉)ရက်နေ့တွင် မိုင်းဖြတ်မှ တာကျောက်အထိ ပြီးစီးသွားပြီဖြစ်ကြောင်း သိရသည်။

“သော်တာဝင်းကုမ္ပဏီက တာဝန်ရှိသူတွေကတော့ သူတို့ တစ်ဖြည်းဖြည်းနဲ့ ကျိုင်းတုံအထိတော့ တပ်သွားမယ်လို့ ပြောပါတယ်။ မနေ့က လိုက်စစ်ကြည့်တဲ့အနေအထားမှာတော့ အတော်လေးကို ခိုင်ခိုင်ခန့်ခန့်လုပ်ထားတာ တွေ့ရပါတယ်။ သတိပေးဆိုင်းဘုတ်ကိုလည်း အများမြင်သာအောင် ပြန်ပြင်ဖို့ လမ်းဦးစီးဌာနကို ကျွန်တော် မနေ့ကပြောခဲ့ပါတယ်”ဟု အဆိုပါလမ်းပိုင်းအား စက်တင်ဘာလ (၈)ရက်နေ့က လိုက်လံစစ်ဆေးခဲ့သည့် မိုင်းဖြတ်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးလင်းဇော်ထွန်းက တာချီလိတ်သတင်းအေဂျင်စီသို့ ပြောသည်။

မိုင်းဖြတ်မြို့နယ်အတွင်း ယာဉ်မတော်တဆမှုမကြာခဏဖြစ်ပွားသဖြင့် ပြည်နယ်လွှတ်တော်တွင် ၂၀၁၆ ခုနှစ်က တင်ပြပြီးနောက် ကျိုင်းတုံ - တာချီလိတ်ကားလမ်းအား လုပ်ကိုင်ခွင့်ရထားသည့် သော်တာဝင်းကုမ္ပဏီက မိုင်းဖြတ်မြို့နယ်အတွင်း ယာဉ်မတော်တဆမှု မကြာခဏဖြစ်ပွားသည့်နေရာများအား လမ်းဘေးအရံအတားများ တပ်ဆင်ခြင်းကို ၂၀၁၇ ခုနှစ် သြဂုတ်လတွင် စတင်လုပ်ဆောင်နေခြင်းဖြစ်ကြောင်း သိရသည်။

 “ကျွန်တော်က မိုင်းဖြတ်ကိုယ်စားလှယ်ဆိုတော့ မိုင်းဖြတ်မြို့နယ်အတွင်း လမ်းပိုင်းမှာ မတော်မဆမှု အဖြစ်များတဲ့ နေရာတွေအတွက် ဆောင်ရွက်ပေးဖို့ ၂၀၁၆ ခုနှစ် ဒီဇင်ဘာလ ၆ ရက်နေ့က ကျင်းပတဲ့ အရေးပေါ်အစည်းအဝေး ၁/၂၀၁၆ မှာ တင်ပြခဲ့တာဖြစ်ပါတယ်။ ဒီလမ်းပိုင်းမှာ ကားတွေပြုတ်ကျပြီး လူတွေ ခဏခဏသေတယ်။ ဒါကို ပြည်နယ်အစိုးရက လုပ်ပေးမလား ဒါမှမဟုတ် သက်ဆိုင်ရာကုမ္ပဏီက တာဝန်ယူလုပ်ပေးမှာလားဆိုတာ မေးတော့ ၂၀၁၇ - ၂၀၁၈ ဘဏ္ဍာရေးနှစ်မှာ သက်ဆိုင်ရာကုမ္ပဏီက လုပ်ပေးပါ့မယ်ဆိုပြီး ပြည်နယ် လမ်းပန်းဆက်သွယ်ရေးဝန်ကြီးက ဖြေသွားပါတယ်။ အခုဘတ်ဂျက်မှာ သြဂုတ်လကစပြီး လမ်းဘေးအရံအတားတွေ လုပ်နေတာ အခုက တာကျောက်အထိတော့ ပြီးသွားပါပြီ”ဟု မိုင်းဖြတ်မြို့နယ် ပြည်နယ်လွှတ်တော်ကိုယ်စားလှယ် ဦးအားကိုက တာချီလိတ်သတင်းအေဂျင်စီသို့ ပြောသည်။

မိုင်းဖြတ်မြို့နယ်အထွေထွေအုပ်ချုပ်ရေးဦးစီးဌာန၊ မိုင်းဖြတ်မြို့နယ် ပြည်သူ့ဆောက်လုပ်ရေး ဦးစီးဌာနနှင့် မိုင်းဖြတ်မြို့နယ်ရဲတပ်ဖွဲ့တို့ထံမှ (၅)နှစ်စာမှတ်တမ်းများအရ ကျိုင်းတုံ - တာချီလိတ်လမ်းမှ မိုင်းဖြတ်မြို့နယ် အတွင်း ယာဉ်မတော်တဆမှုအများဆုံးဖြစ်ပွားသည့် (၅)နေရာတွေ့ရသဖြင့် လမ်းဘေးအရံအတားများ လုပ်ဆောင်ပေးရန် ပြည်နယ်လွှတ်တော်သို့ တင်ပြရန်ဆုံးဖြတ်ခဲ့ခြင်းဖြစ်ကြောင်း ပြည်သူ့လွှတ်တော်ကိုယ်စားလှယ် ဦးလင်းဇော်ထွန်းထံမှ သိရသည်။

“ဒီလမ်းပိုင်းပြင်ဖို့အတွက် မိုင်းဖြတ်နဲ့ ဆိုင်းလေကြား ငါးနှစ်စာ စာရင်းကောက်တယ်။ အုပ်ချုပ်ရေးဦးစီးဌာန၊ လမ်းဦးစီးနဲ့ နောက်ရဲနဲ့ ကျွန်တော်တို့ ငါးနှစ်စာ စာရင်းပြန်ကြည့်ပြီး အဖြစ်အများဆုံးနေရာတွေ ဆွဲထုတ်လိုက်တဲ့အခါမှာ (၅)နေရာထွက်လာတယ်။ အဲဒီ (၅)နေရာကို ကျွန်တော်တို့ဆီက ဦးအားကိုကို လွှဲပေးပြီး လွှတ်တော်မှာ တင်ခိုင်းလိုက်တယ်။ ဝန်ကြီးဌာနကလည်း BOT ရထားတဲ့ ကုမ္ပဏီကို ညွှန်ကြားပါတယ်။ အခုလည်း အဲဒီနေရာတွေကို အဓိကထား တပ်ဆင်နေပါတယ်”ဟု ပြည်သူ့လွှတ်တော် ကိုယ်စားလှယ် ဦးလင်းဇော်ထွန်းက ပြောသည်။

လက်ရှိတွင် အဆိုပါလမ်းပိုင်းမှ မြေပြိုသည့်နေရာများအား ရှင်းလင်းနေသဖြင့် လမ်းဘေးအရံအတား ကာရံခြင်းအား ခေတ္တရပ်နားထားသော်လည်း ဆက်လက်လုပ်ဆောင်သွားမည်ဖြစ်ကြောင်း သိရသည်။

သတင်း #ချယ်ရီထိုက်
ဓါတ်ပုံ #ULZT