~~~~~~~~⊰❂ unicode ❂⊱~~~~~~~~

“ကျပ်သိန်းတစ်ထောင်နဲ့ လုပ်မယ့်လုပ်ငန်းတွေအတွက် သက်ဆိုင်ရာ ကျေးရွာအုပ်ချုပ်ရေးနဲ့ လုပ်ဆောင်မယ့်အဖွဲ့တွေကို ထုတ်ပေးလိုက်တာပါ။ သူတို့လုပ်ငန်းလုပ်ဆောင်မှုတွေကို ကြီးကြပ်ရေးအဖွဲ့တွေက စိစစ်ပေးမှာပါ။ လျာထား ဘတ်ဂျက်အတိုင်း ဖြစ်ဖို့၊ အမှားအယွင်းမရှိဖို့ပေါ့။ ဒါပေမဲ့ တစ်ချို့ကျေးရွာတွေကျတော့ ဒီလိုရတယ်ဆိုရင် တအားဝမ်းသာတယ်။ သူတို့ပူးပေါင်းဆောင်ရွက်ကြတယ်။ ဥပမာ ကျွန်တော်တို့ လျာထားလမ်းက ပေ (၄၀၀)လောက်ဆိုရင် သူတို့လုပ်လိုက်တာက ပေ(၅၀၀)တို့ (၆၀၀)တို့ ဖြစ်သွားတာတွေလည်းရှိတယ်။ အဲဒီလို လုပ်တာတွေလည်း ရှိပါတယ်”ဟု မိုင်းဖြတ်မြို့နယ် ပြည်နယ်လွှတ်တော်ကိုယ်စားလှယ် ဦးအားကိုက တာချီလိတ်သတင်းအေဂျင်စီသို့ ပြောသည်။

မိုင်းဖြတ်မြို့နယ်အတွက် ဒေသဖွံ့ဖြိုးရေးရန်ပုံငွေကျပ်သိန်း(၁၀၀၀)အား မိုင်းဖြတ် မြို့ပေါ်ရပ်ကွက် (၃)ရပ်ကွက်၊ ကျေးရွာအုပ်စု (၁၆)အုပ်စုတွင် ဖေါ်ဆောင်မည့် ရေရရှိရေးလုပ်ငန်း (၁၆)ခုအတွက် ကျပ် (၁၆၇.၉၁)သိန်း၊ လမ်းတံတားလုပ်ငန်း (၂၁)ခုအတွက် ကျပ် (၈၀၂.၀၉)သိန်းနှင့် အထွေထွေလုပ်ငန်းအတွက် ကျပ်သိန်း(၃၀) အသုံးပြုသွားမည်ဖြစ်ပြီး အဆိုပါလုပ်ငန်းများ ဆောင်ရွက်မှုအား မြို့နယ်အဆင့်၊ ကျေးရွာအဆင့်ကြီးကြပ်ရေးအဖွဲ့များဖြင့် စိစစ်မှုလုပ်ဆောင်မည်ဖြစ်ကြောင်း သိရသည်။

အဆိုပါ ဒေသဖွံ့ဖြိုးရေးရန်ပုံငွေပေးအပ်ပွဲ အခမ်းအနားတွင် မိုင်းဖြတ် မြို့နယ်ဒေသဖွံ့ဖြိုးရေးလုပ်ငန်း အကောင်အထည်ဖေါ်ရေးအဖွဲ့ ဥက္ကဋ္ဌ ၊ ပြည်သူ့လွှတ်တော်ကိုယ်စားလှယ် ဦးလင်းဇော်ထွန်းနှင့်  မြို့နယ်ဒေသဖွံ့ဖြိုးရေး လုပ်ငန်း အကောင်အထည်ဖေါ်ရေးအဖွဲ့ အတွင်းရေးမှူး မြို့နယ်အုပ်ချုပ်ရေးမှူး ဦးစိုးလှိုင်တို့က အမှာစကားပြောကြားကြောင်းသိရပြီး အခမ်းအနားသို့ ပြည်နယ်လွှတ်တော် ကိုယ်စားလှယ် ဦးစိုင်းကျောက်၊ ပြည်နယ်လွှတ်တော် ကိုယ်စားလှယ် ဦးအားကိုနှင့် ရပ်ကွက်/ ကျေးရွာအုပ်စု အုပ်ချုပ်ရေးမှူးများ တက်ရောက်ကြကြောင်း သိရသည်။

ပြည်ထောင်စုလွှတ်တော်ဆိုင်ရာ ဒေသဖွံ့ဖြိုးရေး ရန်ပုံငွေဖြင့် အကောင်အထည်ဖေါ်မည့် ရေရရှိရေးလုပ်ငန်း (၁၆)ခုကို နမ့်ပန်ကျေးရွာအုပ်စုအတွင်းမှ ကြူးဆီရွာ၊ မိုင်းဝှီးရွာ၊ နားဖတ်ရွာ၊ အမောဒေရွာ၊ နန့်ယန်း(၂)ရွာ၊ ဟားပီပါရွာနှင့် ငါးဟေစွာဟောင်ရွာ၊ ဆားလို့ကျေးရွာအုပ်စုအတွင်းမှ နမ့်ဟွေလုံရွာ၊ နမ့်ဟက်ပုံကျေးရွာအုပ်စုမှ ဟွေလုံဝမ်းရွာ၊ မိုင်းဟဲကျေးရွာအုပ်စုအတွင်းမှ ပါဝုန်းရွာ၊ အိုက်ငို့ကျေးရွာအုပ်စုအတွင်းမှ နမ့်ပန်းနွဲ့ရွာ၊ လန်းဆတ်ကျေးရွာအုပ်စုအတွင်းမှ နမ့်ယန်းရွာနှင့် လန်းဆတ်ရွာ၊ နမ့်ကုန်းကျေးရွာအုပ်စုအတွင်းမှ ဆိုင်ဆတ်ရွာ၊ မွန်ကာကျောင်း ကျေးရွာအုပ်စုအတွင်းမှ ပါလောင်းရွာ၊ နမ့်ယွန်းကျေးရွာအုပ်စုအတွင်းမှ နားအယ်ရွာဟောင်းတို့တွင် လုပ်ဆောင်မည်ဖြစ်ကြောင်း သိရသည်။

လမ်းတံတားလုပ်ငန်း (၂၁)ခုကို မိုင်းဖြတ်ကျေးရွာအုပ်စုအတွင်း တောင်းပိုရွာနှင့် မော်ဝိန်းရွာ၊ ဝမ်လုံးကျေးရွာအုပ်စုအတွင်းမှ နားမွန်ရွာနှင့် ဝမ်လုံးရွာ၊ စျေးတန်းရပ်ကွက်မှ ကွက်သစ်၊ နမ့်နန်းကျေးရွာအုပ်စုအတွင်းမှ နန့်နန်း(အာခါ)ရွာ၊ နန့်နန်း(ရှမ်း)ရွာနှင့် ပါယောင်း(၁)ရွာ၊ နမ့်လောက်ကျေးရွာအုပ်စုမှ ဝမ်ဆာရွာ၊ နမ့်ဟက်ပုံကျေးရွာအုပ်စုမှ ဟားအိုရွာ၊ နမ့်လန်းကျေးရွာအုပ်စုမှ နမ့်လန်းရွာနှင့် ပါထွန်ရွာ၊ တောသူကျေးရွာအုပ်စုမှ တောသူရွာ၊ မွန်ကာကျောင်းကျေးရွာအုပ်စုမှ ဟာဝိုင်(၃)ရွာ၊ အိုက်လုံကျေးရွာအုပ်စုမှ ဟာကြားဒီရွာ၊ နမ့်ယွန်းကျေးရွာအုပ်စုတွင် မပဲကိုရွာမှ ငါးဟေရွာအထိ၊ မိုင်းဟဲကျေးရွာအုပ်စုအတွင်း ဝမ်ကပ်ရွာမှ တုံလုံရွာအထိ၊ လန်းဆတ်ကျေးရွာအုပ်စုအတွင်း လန်းဆတ်ပေါ်ရွာနှင့် နမ့်ယန်းရွာချင်းဆက်၊ စျေးတန်းရပ်ကွက်၊ ဝမ်ဟွေရပ်ကွက်၊ ဝမ်မိုင်ရပ်ကွက်များတွင် လုပ်ဆောင်သွားမည်ဖြစ်ကြောင်း သိရသည်။

အထွေထွေလုပ်ငန်းအတွက် ကျပ်သိန်း (၃၀)မှာ မိုင်းဖြတ်မြို့တွင် မီးသတ်ရေလှောင်ကန် တည်ဆောက်ရန်အတွက်ဖြစ်ကြောင်း သိရသည်။

သတင်း #ချယ်ရီထိုက်
ဓါတ်ပုံ #AK