~~~~~~~~⊰❂ unicode ❂⊱~~~~~~~~

တာချီလိတ်မြို့ပေါ်တွင် တိုးလာနေသည့် အိမ်ခြေမဲ့များအရေး ဌာနဆိုင်ရာများ ပူးပေါင်းဖြေရှင်းနိုင်ရေး လုပ်ဆောင်နေ
***********
မြန်မာ - ထိုင်းနယ်စပ် ရှမ်းပြည်နယ်(အရှေ့ပိုင်း) တာချီလိတ်မြို့တွင် မြို့ပေါ်ရပ်ကွက် လမ်းဘေးဝဲယာများ၌ လှည့်လည်နေထိုင်နေသည့် အိမ်ခြေမဲ့များအား ခရီးစရိတ်ထောက်ပံ့ပြီး နေရပ်ပြန်ပို့ပေးခဲ့သော်လည်း လက်ရှိတွင် ထပ်တိုးရောက်လာနေသဖြင့် ဌာနပေါင်းစုံပူးပေါင်းဖြေရှင်းနိုင်ရန် ပြင်ဆင်နေကြောင်း သိရသည်။

“ဒီမှာက နယ်စပ်မြို့ဖြစ်တော့ ရွှေ့ပြောင်းလာရောက် အလုပ်လုပ်ကိုင်သူတွေထဲက တစ်ချို့လည်း မပြန်နိုင်ကြဘူး။ တစ်ချို့လည်း တစ်ဖက်နိုင်ငံကို အလုပ်သွားလုပ်တယ်။ အလုပ်မရှိတဲ့အခါ ပြန်စရာ လမ်းစရိတ်က မရှိဘူး။ ဒီမြို့မှာ လာသောင်တင်နေတယ်။ တစ်ချို့လည်း ရောက်အောင် ပြန်ပို့ပေးပါတယ်။ တစ်ချို့လည်း ပြန်ပို့ပေးတာတောင် မသွားကြတော့ဘူး။ ဒီကိစ္စကို ဒီမြို့မှာရှိတဲ့ အုပ်ချုပ်ရေးအဖွဲ့အစည်း တစ်ခုတည်းအနေနဲ့ ဖြေရှင်းပေးဖို့ကြတော့လည်း မဖြစ်နိုင်ဘူး။ ဌာနဆိုင်ရာအားလုံး၊ မြို့မိမြို့ဖအားလုံးပါရမယ်။ ကာယကံရှင်တွေ ကိုယ်တိုင်ကလည်း ပြန်ချင်စိတ်ရှိမှ ရမှာပေါ့”ဟု တာချီလိိတ်ခရိုင်စီမံခန့်ခွဲရေးကော်မတီ ဥက္ကဌ၊ တာချီလိတ်ခရိုင်အုပ်ချုပ်မှူး ဦးတင်ဝင်းရွှေက တာချီလိတ် သတင်းအေဂျင်စီသို့ ပြောသည်။

တာချီလိတ်မြို့လယ်မှ လိုင်းကားစောင့်သည့်နေရာနှစ်ခုတွင် ရက်ရှည်နေထိုင်နေသည့် အိမ်ခြေမဲ့နေထိုင်သူ အချို့အား စည်ပင်သာယာရေးဌာနက စက်တင်ဘာလ(၅)ရက်နေ့တွင် ရှင်းလင်းဖယ်ရှားခဲ့ရပြီး ယခင်ကလည်း အိမ်ခြေမဲ့များအား ဌာနဆိုင်ရာများ၊ အရပ်ဖက်အဖွဲ့များပူးပေါင်း၍ ခရီးစရိတ်ပံ့ပိုးပြီး နေရပ်ပြန်ပို့ပေးခဲ့သော်လည်း အိမ်ခြေမဲ့နေထိုင်သူများမှာ လတ်တလောတွင် ထပ်တိုးလာနေခြင်းဖြစ်သည်ဟု ခရိုင်စီမံခန့်ခွဲရေးကော်မတီထံမှ သိရသည်။

“ကျွန်တော်ထင်တာကတော့ နောက်ထပ် ထပ်ရောက်လာတာတွေအပြင် ဟိုအရင်ပြန်ပို့လိုက်တဲ့ တစ်သုတ်ကလည်း ပြန်ရောက်လာပြန်ပြီထင်တယ်။ အခုရက်ပိုင်းတွေမှာ ပိုများလာတာပေါ့။ အရင်ကလည်း ရှိတော့ရှိပါတယ်။ အခုတော့ ဘာဖြစ်လို့လဲမသိဘူး လမ်းဘေးထွက်လာကြတယ်။ မြို့ထဲလူမြင်ကွင်းမှာကျတော့ အမြင်မသင့်တော်တဲ့အတွက် မြို့နယ်အုပ်ချုပ်ရေးနဲ့ စည်ပင်တို့ကိုတော့ အဲဒီလိုမနေဖို့ဆိုပြီး ဖယ်ရှားပေးခိုင်းထား ပါတယ်” တာချီလိိတ်ခရိုင်စီမံခန့်ခွဲရေးကော်မတီ ဥက္ကဌ၊ တာချီလိတ်ခရိုင်အုပ်ချုပ်မှူး ဦးတင်ဝင်းရွှေက တာချီလိတ် သတင်းအေဂျင်စီသို့ ပြောသည်။

လမ်းဘေးဝဲယာတွင် အိမ်ခြေရာမဲ့များ နေထိုင်ခြင်းကြောင့် ရပ်ကွက်နေလူထုနှင့် လမ်းသွားလမ်းလာများ အနှောင့်အယှက်ဖြစ်ရသဖြင့် စည်ပင်သာယာဥပဒေအရ လူမြင်ကွင်းမှ ဖယ်ရှားပေးသော်လည်း ၎င်းတို့အား ပို့ဆောင်ရန်နေရာမရှိသဖြင့် အဆိုပါကိစ္စဖြေရှင်းရေးမှာ ဌာနတစ်ခုတည်းဖြင့် ဖြေရှင်းမရနိုင်ဖြစ်နေ၍ ပူးပေါင်းအဖြေရှာရန် ဌာနဆိုင်ရာများက ပြင်ဆင်နေဆဲဖြစ်ကြောင်း သိရသည်။

“ဒီလူတွေကို ဖမ်းပြီးအချုပ်ထဲထည့်ဖို့ကလည်း မဖြစ်ဘူး။ သူတို့သည် ပြစ်မှုတစ်စုံတစ်ရာမကျူးလွန်ရင်တော့ ဖမ်းလို့မရဘူးပေါ့။ ဒါပေမဲ့ စည်ပင်သာယာနယ်နမိတ်အတွင်းမှာဆိုတော့ စည်ပင်ဥပဒေအရတော့ အရေးယူလို့ရတာပေါ့။ အများပြည်သူအသုံးပြုတဲ့နေရာမှာ အမြင်မသင့်တော်အောင် နေထိုင်ခြင်းအရ ဖယ်ရှားလို့ရပါတယ်။ ဒီလိုဖယ်ရှားတဲ့အခါမှာ ဥပဒေအရ စည်ပင်သာယာရေးဝန်ထမ်းနဲ့ သက်ဆိုင်ရာရပ်ကျေးတွေက ကောင်းကောင်းမွန်မွန် ဖယ်ရှားပေးတာပါ။ ရဲဌာနက နယ်ထိန်းလိုမျိုးတွေ လိုက်တယ်ဆိုတာက ဒီလိုဖယ်ရှားတဲ့အခါမှာ မလိုလားအပ်တဲ့အခြေအနေလေးတွေ မဖြစ်ဖို့ လိုက်လံကြည့်ရှုပေးတဲ့သဘောပါပဲ။ ဒါကြောင့် ဒီအရေးကိစ္စကို ဖြေရှင်းဖို့က ဌာနတစ်ခုရဲ့ ဥပဒေတစ်ခုနဲ့ ဖြေရှင်းလို့ မရပါဘူး။ ဌာနပေါင်းစုံနဲ့ မြို့မိမြို့ဖတွေပေါင်းပြီး သူတို့အတွက်လည်း အကောင်းဆုံး ဖြေရှင်းနိုင်မယ့်နည်းတွေကို ရှာဖွေဖို့တော့ လိုပါလိမ့်မယ်”ဟု တာချီလိတ်ခရိုင် ရဲတပ်ဖွဲ့မှူး ဒုတိယရဲမှူးကြီး ထိန်ဝင်းက တာချီလိတ် သတင်းအေဂျင်စီသို့ ပြောသည်။

တာချီလိတ်မြို့ပေါ်ရပ်ကွက် (၁၁)ခုအနက် မြို့မသုသာန်နှင့်နီးသည့် ဝမ်ကောင်းနှင့် ပုန်းထွန် ရပ်ကွက်တို့တွင် အိမ်ခြေမဲ့နေထိုင်သူအများစုရှိနေပြီး အိမ်ခြေမဲ့နေထိုင်သူများတွင် စိတ်ဝေဒနာရှင်အချို့လည်း ပါဝင်နေကြောင်း တာချီလိတ်မြို့မှ ရပ်ကျေးအုပ်ချုပ်ရေးမှူးအချို့ထံမှ သိရသည်။

" တစ်မြို့လုံး လိုလိုပဲ။ လမ်းပေါ်လည်း လျှောက်သွားနေတာ။ အများဆုံးကတော့ သချုႋင်းနဲ့နီးတဲ့ ကျွန်တော်တို့ ရပ်ကွက်နဲ့ ပုန်းထွန်မှာပဲ။ အရင်ကဆို သုသာန်မှာ ခိုအောင်းနေတာတွေများတော့ သူတို့ကို အနီးအနား အိမ်တွေက အနှောင့်အယှက်ဖြစ်လို့ တိုင်ကြလို့ နှစ်ခါရှင်းလိုက်ရသေးတယ်။ ဆေးကြောင်နေတာတွေကနေ စိတ်မနှံ့တော့တာတွေပေါ့။ လက်ထဲမှာလည်း ဓားတွေဘာတွေလည်း ပါလာတတ်တယ်လေ"ဟု ဝမ်ကောင်းရပ်ကွက်အုပ်ချုပ်ရေးမှူး ဦးထွန်းထွန်းဝင်းက ပြောသည်။

တာချီလိတ်မြို့အတွင်း အိမ်ခြေမဲ့နေထိုင်သူများမှ စိတ်ကျန်းမာရေးမကောင်းသူများအား စိတ်ကျန်းမာရေး ဆရာဝန်ရှိသည့် ရှမ်းပြည်နယ် (အရှေ့ပိုင်း) ကျိုင်းတုံပြည်သူ့ဆေးရုံသို့ ပို့ဆောင်၍ ကုသမှုခံယူ နိုင်သော်လည်း အဆိုပါလူနာအတွက် အုပ်ထိန်းသူ သို့မဟုတ် သက်ဆိုင်ရာ ရပ်/ကျေးအဖွဲ့အနေဖြင့် အုပ်ထိန်းသူအဖြစ် တာဝန်ခံ၍ ပို့ဆောင်ပေးရန် လိုအပ်ကြောင်း သိရသည်။

“ဒီလိုလူနာတွေကို မိသားစုတွေ၊ အုပ်ထိန်းသူတွေက လာပို့ပေးတာတွေ များပါတယ်။ အိမ်ခြေမဲ့လူတွေထဲက စိတ္တဇဖြစ်တယ် ပတ်ဝန်းကျင်ကို ထိခိုက်စေတယ်ဆိုရင် သက်ဆိုင်ရာနယ်မြေက ရဲတပ်ဖွဲ့နဲ့ ရပ်ကွက်အုပ်ချုပ်ရေးမှူးက ဆေးရုံလာပို့ပေးရတယ်။ ဆေးရုံဖြစ်ပြီး ဂေဟာမဟုတ်တဲ့အတွက် ဆေးသောက်လို့ ကောင်းသွားပြီဆိုရင် ရပ်ကွက်အုပ်ချုပ်ရေးမှူးက လက်မှတ်ထိုးပြီး ပြန်လာခေါ်ရတယ်။ သူတို့ စိတ်ပြန်ဖေါက်လာရင် ဆေးပြန်လာတိုက်ပေါ့နော်။ အဲဒီလို လုပ်ရပါတယ်။ စိတ်ကျန်းမာရေးဆေးရုံအနေနဲ့က ရန်ကုန်နဲ့ မန္တလေးမှာပဲရှိပြီး ကျန်တဲ့မြို့ကြီးတစ်ချို့မှာတော့ ဆေးရုံတွေမှာပဲ စိတ်ကျန်းမာရေးဆရာဝန်တွေ ရှိပါတယ်။ ရှမ်းရှေ့မှာဆို ကျိုင်းတုံပြည်သူ့ဆေးရုံကြီးမှာ စိတ်ကျန်းမာရေးဆရာဝန် ရှိပါတယ်။ ပတ်ဝန်းကျင်လူထုအတွက် အနှောင့်အယှက်ဖြစ်စေပြီး အန္တရာယ်ဖြစ်စေပြီဆိုရင်တော့ ရပ်ကွက်အုပ်ချုပ်ရေးမှူးတွေက အုပ်ထိန်းသူအဖြစ် နေကောင်းရင် ပြန်ခေါ်ပါမယ်ဆိုတဲ့ လက်မှတ်ထိုးပြီး လာပို့ပေးလို့ရပါတယ်။ ဆေးရုံက ဆေးကုပေးရုံပဲဖြစ်ပြီး ဒီမှာဂေဟာလို လာထားလို့တော့ မရဘူးပေါ့နော်”ဟု စိတ်ကျန်းမာရေးဆရာဝန်တစ်ဦးဖြစ်သည့် ဒေါက်တာစောဖြိုးဝေလင်းက ပြောသည်။

လက်ရှိတွင် တာချီလိတ်မြို့တွင် တိုးလာနေသည့် အိမ်ခြေမဲ့များအား နေရပ်ပြန်ပို့သော်လည်း ပြန်ရောက်လာခြင်း၊ ၎င်းတို့အားထားရှိရန် ဂေဟာမရှိခြင်း၊ အလုပ်လက်မဲ့ ဖြစ်သူများအား သင့်လျော်သင့် အလုပ်အကိုင်ဖန်တီးမပေးနိုင်ခြင်း၊ အိမ်ခြေမဲ့နေထိုင်သူများကိုယ်တိုင် နေရပ်မပြန်လိုခြင်းများကြောင့် ဖယ်ရှားရန် အခက်အခဲဖြစ်နေရကြောင်း သိရသည်။

“ဒီမြို့မှာ ဒီအဖွဲ့တွေကို အလုပ်မရှိတဲ့သူတွေကို အလုပ်ပေးဖို့ဆိုတာကလည်း သူတို့နဲ့ကိုက်ညီတဲ့အလုပ်လည်း ရှိအုံးမှ။ သူတို့ကိုခိုင်းပေးနိုင်မယ့် အလုပ်ရှင်လည်း ရှိအုံးမှ။ နှစ်ဦးနှစ်ဖက်အဆင်ပြေမှ ရတာကိုး။ အခုလို ဘယ်မှလည်း ပို့စရာမရှိ လမ်းပေါ်မှာအိပ် လမ်းပေါ်မှာစားနေတာကတော့ နောက်ပိုင်းမှာ တစ်ဖြည်းဖြည်း ပိုများလာနေတယ်။ သူတို့အတွက် နေရာက မရှိဘူးခင်ဗျ။ ဒီလူတွေကို ထားစရာဂေဟာလည်းမရှိ။ ဒီမှာရှိတဲ့ မူးယစ်ဆေးဖြတ်စခန်းနေရာကို ခေါ်တော့လည်း မလိုက်ဘူး။ သူတို့မနေချင်ဘူး။ စိတ်မနှံ့တဲ့သူလည်းရှိတယ်။ စိတ်နှံ့တယ်သူလည်းရှိတယ်”ဟု တာချီလိတ်ခရိုင် အုပ်ချုပ်ရေးမှူး ဦးတင်ဝင်းရွှေက ပြောသည်။

အဆိုပါ အိမ်ခြေမဲ့နေထိုင်နေသူများမှာ နယ်စပ်မှပြန်ဝင်လာသည့် ရွှေ့ပြောင်းလုပ်သားများအပြင် တာချီလိတ်ခရိုင်နှင့် အနီးဝန်းကျင်ဒေသများမှ မူးယစ်ဆေးကြောင့် အိမ်ခြေမဲ့နေထိုင်သူများလည်း ပါဝင်သည်ဟု တာချီလိတ်မြို့နယ် မဲဆန္ဒနယ်အမှတ်(၂)မှ ပြည်နယ်လွှတ်တော်ကိုယ်စားလှယ် ဦးခင်မောင်တင့်က ဆိုသည်။

“ကျွန်တော်တို့ဒေသက နယ်စပ်ကဖြစ်နေတော့ နယ်စပ်ကပြန်ဝင်လာတာ များတယ်လို့လည်း ပြောကြတယ်။ ဒါပေမဲ့ ကျွန်တော်မြင်တာကတော့ ဒီဝန်းကျင်က လူတွေပဲများတယ်။ အဓိကကတော့ မူးယစ်ဆေးကြောင့် ဖြစ်တာများတယ်လို့ ကျွန်တော်ကတော့ မြင်ပါတယ်။ ဒါတွေက ပြဿနာဖြစ်နေတယ်လို့ ပြောလို့မရပေမဲ့ ပြဿနာတွေရဲ့အစလို့တော့ ရှုမြင်တယ်။ လုပ်သင့်တာကတော့ စာရင်းတွေ သေချာကောက်ယူမယ်။ သူတို့တွေ ဘယ်ကလဲ၊ နေရပ်ပြန်ချင်လားဆိုတာတွေ သေချာလုပ်ဖို့ လိုပါတယ်။ ပြီးစလွယ်တော့ လုပ်လို့မရဘူး ဒီကိစ္စက။ အရင်ကလည်း ဌာနဆိုင်ရာအဖွဲ့တွေနဲ့ အရပ်ဖက်အဖွဲ့တွေပေါင်းပြီး ကျွန်တော်တို့ စာရင်းကောက်ပြီး ပြန်မယ့်သူတွေကို ပြန်ပို့ပေးပါတယ်။ ဒါပေမဲ့ လမ်းမှာတင် ဆင်းပြီးနေခဲ့ကြတယ်။ ကျွန်တော်တို့ဆီမှာ ဒီလိုကူညီပေးဖို့ ထဲထဲဝင်ဝင်လုပ်ပေးတဲ့ လူမှုကူညီရေးအဖွဲ့တွေလည်း မရှိဘူး။ မဇ္ဇျိမတစ်ဖွဲ့တော့ ရှိပေမဲ့ သူတို့လည်း အတိုင်းအတာရှိနေတာပေါ့။ ကျွန်တော်တို့တွေရော၊ ဌာနဆိုင်ရာတွေရော၊ အရပ်ဖက်အဖွဲ့တွေရော၊ မြို့မိမြို့ဖတွေရော အားလုံးပူးပေါင်းပြီး စနစ်တကျလုပ်ဆောင်ဖို့ လိုမယ်လို့ယူဆပါတယ်”ဟု တာချီလိတ်မြို့နယ် မဲဆန္ဒနယ်အမှတ်(၂)မှ ပြည်နယ်လွှတ်တော်ကိုယ်စားလှယ် ဦးခင်မောင်တင့်က ပြောသည်။

လက်ရှိတွင် တာချီလိတ်မြို့၌ အိမ်ခြေမဲ့များအရေး ဌာနဆိုင်ရာများက ဖြေရှင်းနိုင်မည့်နည်းလမ်း ဆွေးနွေးညှိနှိုင်းနေကြဆဲဖြစ်ပြီး ဥပဒေနှင့်အညီဖြစ်စေရေးအတွက် ဥပဒေအကြံပြုချက်များလည်း တောင်းခံထားကြောင်း သိရသည်။

သတင်း #ချယ်ရီထိုက်