“မနေ့ကအထိ ရပ်ကွက် (၃)ခုက လုပ်ငန်းရှင်တွေနဲ့ တွေ့ဆုံဆွေးနွေးအပြီးမှာ ငံပြာရည်၊ မုန့်တီခြောက်၊   ကိတ်မုန့်စတဲ့ စားသောက်ကုန်ထုတ်လုပ်ငန်းတွေက ထောက်ခံချက်ရရှိဖို့ လုပ်လာကြပါတယ်။ ကျွန်တော်တို့ ဆက်လုပ်သွားမှာပါ။ ကျန်တဲ့မြို့ပေါ်ရပ်ကွက်နှစ်ခုအပြင် အနီးဝန်းကျင်က ကျေးရွာအုပ်စုတွေပါ သွားဖို့ ရပ်ကွက်/ကျေးရွာ အုပ်ချုပ်ရေးမှူးတွေဆီမှာ စာလည်းပို့ထားပြီးပါပြီ။ အနီးဝန်းကျင်က ကုန်ထုတ်လုပ်မှုရှိတဲ့ ရွာတွေကလည်း လာရှင်းလင်းဆွေးနွေးပေးဖို့ဆိုပြီး ဖိတ်ခေါ်တာတွေလည်း ရှိပါတယ်။ အဲဒီလိုဆိုရင်လည်း သွားပြီး ရှင်းလင်းပေးမှာပါ”ဟု ကျိုင်းတုံခရိုင် စားသုံးသူအငြင်းပွားမှုဖြေရှင်းရေးအဖွဲ့ အတွင်းရေးမှူး ဦးသန်းစိုးက တာချီလိတ်သတင်းအေဂျင်စီသို့ ပြောသည်။

ကျိုင်းတုံမြို့ ရပ်ကွက်(၄)နှင့် ရပ်ကွက်(၅)တို့မှ စားသောက်ကုန် တင်သွင်း၊ ရောင်းချ၊ ထုတ်လုပ်သူစုစုပေါင်း (၁၄၄) ဦးအား စားသောက်ကုန်များကို ဥပဒေနှင့်အညီ  တင်သွင်း၊ ထုတ်လုပ်၊ ရောင်းချခြင်းလုပ်ငန်းစဉ်များ ရှင်းလင်းခြင်းနှင့် ဥပဒေနှင့်အညီဖြစ်စေရန် လိုအပ်သည့် ထောက်ခံချက်များကို စားသုံးသူအငြင်းပွားမှုဖြေရှင်းရေးအဖွဲ့က ကူညီဆောင်ရွက်ပေးမည့်အကြောင်းတို့အား စက်တင်ဘာလ (၈)ရက်နေ့မှ (၁၀)ရက်နေ့အထိ လိုက်လံရှင်းလင်းခဲ့ခြင်းဖြစ်ကြောင်း သိရသည်။

ပြည်နယ်အစိုးရနှင့် စားသုံးသူရေးရာဦးစီးဌာနတို့က ရှမ်းပြည်နယ်အရှေ့ပိုင်းဒေသတွင် စားသုံးသူအခွင့်အရေး ထိခိုက်စေသည့် စားသောက်ကုန်များ စျေးကွက်တွင် မရှိစေရေးအတွက် စားသောက်ကုန် တင်သွင်း၊    ရောင်းချ၊ ထုတ်လုပ်သူများအား ရက်(၉၀)စီမံချက်ဖြင့် လိုအပ်သည့် အထောက်အထားများ ရရှိစေရန်     ကူညီဆောင်ရွက်ပေးခြင်း၊ ပညာပေးခြင်းတို့ လုပ်ဆောင်နေခြင်းဖြစ်ကြောင်း သိရသည်။

ဥပဒေပြဌာန်းချက်များနှင့်ညီညွတ်မှူမရှိသော စားသောက်ကုန်များ ရက်(၉၀)အတွင်းဖယ်ရှားရှင်းလင်းရေးအတွက် စီးပွားရေးလုပ်ငန်းရှင်များအား အသိပညာပေးမှုကို သြဂုတ်လအတွင်းက ကျိုင်းတုံမြို့ ရပ်ကွက်(၁)နှင့် စျေးများတွင် အသိပညာပေး ရှင်းလင်းခဲ့ပြီးနောက် လုပ်ငန်းရှင်များနှင့် တွေ့ဆုံဆွေးနွေးခြင်းကို စက်တင်ဘာလအတွင်း ဆက်လက်ဆောင်ရွက်နေခြင်းဖြစ်ကြောင်း သိရသည်။

သတင်း #ချယ်ရီထိုက်
ဓါတ်ပုံ #စားသုံးသူရေးရာ